စားသုံးသူရေးရာဦးစီးဌာနအနေဖြင့် လုပ်ငန်းတာဝန်တစ်ရပ်ဖြစ်သော ပြည်တွင်းကုန်သွယ်မှု မြှင့်တင်ရေးလုပ်ငန်းများ ဆောင်ရွက်ရန်အတွက် စစ်ကိုင်းခရိုင်ဦးစီးမှူးနှင့် ဝန်ထမ်းများသည် စစ်ကိုင်းမြို့၊ စက်မှုဇုန်ရှိ AT ပဲပုတ်ဆီစက်ပိုင်ရှင် ဦးအောင်သိုက်နှင့် ဒီဇင်ဘာ ၁၆ ရက်နေ့က စစ်ကိုင်းခရိုင်ဦးစီးမှူးရုံး၌ တွေ့ဆုံခဲ့ပါသည်။
စစ်ကိုင်းခရိုင်တွင် ပဲပုတ်သီးနှံလျာထား စိုက်ဧကတစ်သောင်းကျော်အနက် ယနေ့ထိ ဧကခုနှစ်ထောင်ခန့် စိုက်ပျိုးပြီးစီးကြောင်း သိရှိရပါသည်။ AT ဆီစက်သည် ပဲပုတ်သီးသန့် ကြိတ်ခွဲသည့် ဆီစက်ဖြစ်ပြီး ကုန်ကြမ်းပဲပုတ်သီးနှံကို တိုင်းတွင်းနှင့် တိုင်းပြင်ပ ရှမ်းပြည်နယ် များမှ ဝယ်ယူကြောင်း၊ (၃)တင်းဝင် တစ်အိတ်လျှင် ကျပ်(၈) သောင်းခန့်ဈေးရှိပြီး ပဲနို့နှင့်ပဲပြား ပြုလုပ်သည့် ပဲပုတ်(၃)တင်းဝင် တစ်အိတ်လျှင် ကျပ် (၁သိန်း၂သောင်း မှ ၁သိန်း၃သောင်းကြား) ဈေးရှိကြောင်း၊ ကုန်ကြမ်း (၃)တင်းဝင် တစ်အိတ်ကြိတ်ခွဲလျှင် ကုန်ချော ပဲပုတ်ဆီ (၅) ပိဿာ နှင့် ပဲပုတ်ဖတ် (၄၃)ပိဿာ ထွက်ရှိကြောင်း၊ ပဲပုတ်ဆီ တစ်ပိဿာလျှင် (၃၀၀၀) ကျပ်၊ ပဲပုတ်ဖတ် တစ်ပိဿာလျှင် (၁၃၀၀ မှ ၁၄၀၀ )ကျပ် ဈေးနှုန်းအသီးသီးဖြင့် ရောင်းချရကြောင်း၊ အမှာစာ(Order)များ လက်ခံ၍ ကြိတ်ခွဲကြောင်း၊ တစ်လလျှင် ကုန်ကြမ်း ပိဿာ (၅) သောင်းခန့် ကြိတ်ခွဲရာ ကုန်ချော ပဲပုတ်ဆီ ပိဿာ (၂၀၀၀) ခန့်နှင့် ပဲပုတ်ဖတ် ပိဿာ (၄) သောင်းခန့် ထွက်ရှိကြောင်း၊ ထွက်ရှိသည့် ကုန်ချောများကို မန္တလေးမြို့၊ ပြင်ဦးလွင်မြို့၊ ရန်ကုန်တိုင်း ဒေသကြီးနှင့် ဧရာဝတီတိုင်း ဒေသကြီးများသို့ တင်ပို့ရောင်းချပါကြောင်း၊ ဆီစက်များအနေဖြင့် ခေတ်မီစက်ကိရိယာများနှင့် ဆီသန့်စင်သည့် နည်းပညာများ ပိုမိုတိုးတက်လာပါက အရည်အသွေး၊ အဆင့်အတန်းမြင့်မားသော နိုင်ငံတကာဈေးကွက်ဝင် ကုန်ချောများ ထွက်ရှိလာနိုင်မည်ဟု AT ပဲပုတ်ဆီစက်ပိုင်ရှင် ဦးအောင်သိုက် ထံမှ သိရှိခဲ့ရပါသည်။
စားသုံးသူရေးရာဦးစီးဌာန(စစ်ကိုင်းတိုင်းဒေသကြီး)