မန္တလေးတိုင်းဒေသကြီး ၊ ကျောက်ဆည်ခရိုင် ၊ ကျောက်ဆည်မြို့နယ်သည် အညာဒေသ လယ်တွင်းကိုးခရိုင်တွင် တစ်ခုအပါအဝင်ဖြစ်ပြီး စိုက်ပျိုးရေးကို အခြေခံ၍ စပါး၊ နှမ်း၊ ပဲမျိုးစုံ၊ ငရုတ်၊ သရက်၊ငှက်ပျော စသည့်သီးနှံများအားအဓိကစိုက်ပျိုးလျက်ရှိပါသည်။၄င်းသီးနှံများအနက် ငှက်ပျော သီးနှံစိုက်ပျိုးမှုအား တစ်ပိုင်တစ်နိုင် စိုက်ပျိုးမှုမှစီးပွားဖြစ်စိုက်ပျိုးလာကြပါသည်။ ငှက်ပျောကို မေလ နှင့် ဇွန်လများတွင် စတင်စိုက်ပျိုးကြပြီး တစ်ပင်နှင့်တစ်ပင်(၈)ပေခြားကာ စိုက်ပျိုးရပြီး (၉-၁၀)လ အကြာတွင် ငှက်ပျောဖူးများ စတင်ထွက်ရှိ၍ ငှက်ပျောဖူးထွက်ပြီး(၃)လကြာလျှင် ရောင်းတန်းဝင် ငှက်ပျောခိုင်များရရှိလာပါသည်။
ကျောက်ဆည်ဒေသ၌ အများအားဖြင့် ဖီးကြမ်းငှက်ပျောမျိုးများကို အဓိကထား စိုက်ပျိုးကြပါသည်။ ငှက်ပျောစတင်စိုက်ပျိုးသည့်အချိန်တွင်ငှက်ပျောအပင်ပေါက်တစ်ပင်လျှင် (၅၀/-)ကျပ် နှုန်းဖြင့်ဝယ်ယူစိုက်ပျိုးရပြီး ငှက်ပျောတစ်ဧကလျှင် အပင်(၈၀၀)စိုက်ပျိုးကြောင်း၊ တစ်ဧကကုန်ကျစရိတ်အနေဖြင့် ငှက်ပျောအပင်ပေါက် ဝယ်ယူခ၊ ကျင်းတူးခ၊ စိုက်ခ၊ စက်မောင်းခ ၊ သွင်းအားစု ၊ လုပ်သားခ ၊ စုစုပေါင်း(၉၀၀၀၀ဝိ/-)ကျပ် ဝန်းကျင်ခန့်ကုန်ကျကြောင်းနှင့် တစ်ဧက အထွက်နှုန်းအနေဖြင့် ငှက်ပျောအခိုင်(၄၀)ပါ လှည်းအစီး ပျမ်းမျှ(၁၆-၁၇)စီးခန့် ထွက်ရှိကြောင်း ငှက်ပျောစိုက်တောင်သူများထံမှ လေ့လာသိရှိရပါသည်။
ငှက်ပျော စျေးနှုန်းအနေဖြင့် ကိုဗစ်-၁၉ ရောဂါမဖြစ်ပွားမီ ငှက်ပျောအခိုင်(၄၀)ပါ လှည်းတစ်စီးကို (၁၄၀,၀၀ဝိ/-မှ၁၅၀,၀၀ဝိ/-)ကျပ်အထိ စျေးနှုန်းရရှိခဲ့ကြောင်း၊ ကိုဗစ်-၁၉ ရောဂါဖြစ်ပွားသည့် ကာလတွင် လမ်းပန်းဆက်သွယ်ရေး အခက်အခဲများကြောင့် ငှက်ပျောလှည်းတစ်စီးလျှင် (၈၀၀၀ဝိ/- မှ ၈၅၀၀ဝိ/-)ကျပ်သာ ရရရှိခဲ့ပြီး၊ ယခုအချိန်တွင်ကိုဗစ်-၁၉ရောဂါဖြစ်ပွားမှုလျော့နည်းလာ သည့်အတွက် ငှက်ပျောစျေးနှုန်းများ ပြန်လည်မြင့်တက်လာပြီး ငှက်ပျောအခိုင်(၄၀)ပါ လှည်း တစ်စီးလျှင်(၁၁၀၀၀ဝိ/- မှ ၁၂၀၀၀ဝိ/-)ကျပ် စျေးနှုန်းများဖြင့် အရောင်းအဝယ်ဖြစ်နေကြောင်း၊ တစ်ဧကအကျိုးအမြတ်အနေဖြင့်(၈၀၀၀၀ဝိ/-)ကျပ်ဝန်းကျင်ခန့် အကျိုးအမြတ်ဖြစ်ထွန်းလျက်ရှိကြောင်း သိရှိရပါသည်။
ကျောက်ဆည်မြို့နယ်ရှိ ငှက်ပျောပွဲစားများသည် တောင်သူများ၏ ငှက်ပျောခြံအထိ လာရောက်ဝယ်ယူလေ့ရှိကြပြီး၊ အဓိကစျေးကွက်အနေဖြင့် ရန်ကုန်၊မန္တလေး၊ပဲခူးသို့ တင်ပို့ခြင်းနှင့် ကျောက်ဆည်မြို့နယ်၊ ရွှေသိမ်တော်ဘုရားရှိ ကန်တော့ပွဲရောင်းချသည့်ဆိုင်များသို့ ပေးပို့ရောင်းချ လျက်ရှိပါသည်။ ရွှေသိမ်တော်ဘုရားသည် ဆုတောင်းပြည့်စေတီဖြစ်၍ အနယ်နယ် အရပ်ရပ်မှ ဘုရားဖူးများစဉ်ဆက် မပြတ်လာရောက်ကြပြီး ကန်တော့ပွဲထိုး၍ ဆုတောင်းအဓိဌာန်များ ပြုလုပ်ကြသဖြင့် ငှက်ပျောသီးဈေးကွက်ခိုင်မာမှုရှိပြီး လက်လီ/လက်ကား ရောင်းဝယ်မှု အနေဖြင့် လည်း ဈေးကွက်အသင့်အတင့်ရှိပြီး၊ ကိုဗစ်-၁၉ရောဂါဖြစ်ပွားသော အချိန်တွင် ဘုရားစေတီများ ဖူးမျှော်ခြင်းကို ယာယီပိတ်ထားသောကြောင့် ငှက်ပျောစျေးနှုန်းများ ကျဆင်းလာ၍ တောင်သူများ အတွက် အကျိုးအမြတ်ဖြစ်ထွန်းမှု နည်းပါးခဲ့ကြောင်း၊ ယခုအချိန်တွင် ကိုဗစ်-၁၉ရောဂါ ဖြစ်ပွားမှုများ တဖြည်းဖြည်း လျော့နည်းလာပြီဖြစ်ရာ ဘုရားစေတီဖူးမျှော်ခြင်းများအား ပြန်လည် ဖွင့်လှစ်ပေးခဲ့သည့်အတွက် ငှက်ပျောစျေးကွက်များမှာ ယခင်နှင့်မတူဘဲ အရောင်းအဝယ် အားကောင်းလာပြီး တောင်သူများအတွက် အကျိုးအမြတ်ဖြစ်ထွန်းမှု ရှိလာပြီဖြစ်ကြောင်း လေ့လာသိရှိရသည်။
ငှက်ပျောပင်များသည် စိုက်ပျိုးပြီး(၁)နှစ်နီးပါး အချိန်ကြာကြာစောင့်ရသော်လည်း စိုက်ပျိုးပြီးစီး၍ ရောင်းတန်း ဝင်အပင်များဖြစ်လာပါက ငှက်ပျောခိုင်၊ အရွက်၊ ငှက်ပျောအပင်ပေါက်ကလေးများပါ ရောင်းချရသည့်အတွက် ဖီးကြမ်းငှက်ပျောမျိုးများကို စီးပွားဖြစ် ပိုမိုတိုးချဲ့စိုက်ပျိုးသင့်ပါကြောင်း ရေးသားတင်ပြလိုက်ရပါသည်။
စားသုံးသူရေးရာဦးစီးဌာန(မန္တလေးတိုင်းဒေသကြီး)