ပဲခူးတိုင်းဒေသကြီး၊ ပဲခူးမြို့၌ ကိုဗစ်ကာလအတွင်း ငှက်ပျောဈေးကွက် အနည်းငယ် အေးစက်နေခဲ့ပြီး ယခုအခါ ပြန်လည်ကောင်းမွန်လာနေပြီဖြစ်သည်။ ကိုဗစ်ကာလအတွင်း လမ်းပန်း ဆက်သွယ်ရေးအခက်အခဲများ၊ အလှူပွဲ၊ မင်္ဂလာပွဲများနှင့် ပွဲလမ်းသဘင်များနည်းပါးခြင်းကြောင့် ငှက်ပျောသီး ဈေးနှုန်း ကျဆင်းခြင်း၊ အရောင်းအဝယ်အေးစက်ခြင်းများ ဖြစ်ပေါ်ခဲ့ကြောင်း ပဲခူးမြို့၊ ညောင်ဝိုင်း၊ ဈေးကြီးတွင် ငှက်ပျောသီးရောင်းဝယ်သူ ကုန်သည်တစ်ဦးကပြောကြားခဲ့ပါသည်။
ယခင် ကိုဗစ်-၁၉ ရောဂါဖြစ်ပွားနေသည့်ကာလအတွင်း ဖီးကြမ်းတစ်ဖီး(၁၈၀၀-၂၀၀၀)ကျပ်၊ သီးမွှေးတစ်ဖီး(၁၅၀၀-၁၈၀၀)ကျပ်၊ ရခိုင်တစ်ဖီး(၇၀၀-၈၀၀)ကျပ်အသီးသီးဖြစ်ပေါ်ခဲ့ရာမှ ယခုအခါ၊ နိုဝင်ဘာလ မှစတင်၍ အလှူပွဲ၊ မင်္ဂလာပွဲများ၊ ရိုးရာနတ်တင်ခြင်းများကြောင့် သီးမွှေးငှက်ပျောနှင့် ရခိုင်ငှက်ပျောများ အရောင်းအဝယ်သွက်လျက်ရှိရာ သီးမွှေးတစ်ဖီး(၂၀၀၀-၂၅၀၀)ကျပ်၊ ရခိုင်တစ်ဖီး (၉၀၀-၁၀၀၀)ကျပ်အထိ ရောက်ရှိခဲ့ပြီး ဈေးနှုန်း/ဈေးကွက် ပြန်လည်ကောင်းမွန် လာကြောင်း သိရှိရပါသည်။
ယခု ဒီဇင်ဘာလ အတွင်း အအေးဓာတ်ပိုကဲလာခြင်းကြောင့် ငှက်ပျောသီးစားသုံးနှုန်း ကျဆင်းကာ အရောင်းအဝယ် ဈေးကွက်အနည်းငယ် အေးသော်လည်း ငှက်ပျောသီးဈေးနှုန်းမှာ ကောင်းမွန်လျက်ရှိကြောင်း သတင်းရရှိပါသည်။
DOCA(ပဲခူး)