ပြည်ခရိုင်၊ ပြည်မြို့အတွင်းရှိ မှော်ဇာကျေးရွာအုပ်စုတွင် ဟင်းသီးဟင်းရွက်များကို နှစ်ပတ်လည်စိုက်ပျိုးရောင်းချကြောင်း သိရပါသည်။ မှော်ဇာကျေးရွာအုပ်စုတွင် ကျေးရွာခွဲ (၁၅)ရွာရှိပြီး စိုက်ပျိုးရေးလုပ်ငန်းကို အဓိကထား၍လုပ်ကိုင်ကြပြီး အဓိကထား၍လုပ်ကိုင်ကြသော သီးနှံများမှာ ဖူးစားပြောင်း၊ မြေပဲ၊ နှမ်း၊ ပဲတီစိမ်း၊ ပဲစင်းငုံနှင့် ဟင်းသီးဟင်းရွက်များကို အများဆုံး စိုက်ပျိုးကြပါသည်။ မိုးရာသီတွင် မိုးစပါးစိုက်ပျိုးပြီး၊ ဆောင်းရာသီတွင် ဟင်းသီးဟင်းရွက်နှင့် မြေပဲ၊ ပဲတီစိမ်း၊ မတ်ပဲ၊ ကြက်သွန်နီ၊ ကြက်သွန်ဖြူနှင့် ဖူးစားပြောင်းများကိုလည်း စိုက်ပျိုးကြပါသည်။
မှော်ဇာကျေးရွာအုပ်စုတွင် ဟင်းသီးဟင်းရွက်ကို အများဆုံးစိုက်ပျိုးသော ကျေးရွာများမှာ တောင်လုံးညိုကျေးရွာ၊ ကုလားတန်ကျေးရွာ၊ ကြို့ပင်ကျေးရွာ၊ ဆင်ဖြူကုန်းကျေးရွာနှင့် ရွှေကြို့ပင် ကျေးရွာများတွင် စိုက်ပျိုးကြပါသည်။ ထိုကျေးရွာများရှိ အိမ်ခြံမြေများတွင်လည်း တစ်နိုင်တစ်ပိုင် သက်တမ်းတိုသီးနှံများဖြစ်သော မုန်လာဥ၊ ကြက်သွန်နီ၊ ဘူး၊ သခွား၊ နံနံပင်နှင့် ပြောင်းဖူးများကို စိုက်ပျိုးကြပါသည်။ မှော်ဇာအုပ်စုမှထွက်ရှိလာသော ဟင်းသီးဟင်းရွက်များကို အခင်းဖြတ်စနစ်ဖြင့် လည်းကောင်း၊ ကုန်စိမ်းဒိုင်များသို့ အရောက်ပို့စနစ်ဖြင့်လည်းကောင်း၊ ကြားပွဲစားများမှ ဝယ်ယူခြင့်ဖြင့်လည်းကောင်း ဈေးကွက်တင်ပို့ရောင်းချကြပါသည်။ မှော်ဇာကျေးရွာ အုပ်စုတွင် ဆောင်းသီးနှံဖြစ် ဟင်းသီးဟင်းရွက်များကို နှစ်စဉ် နိုဝင်ဘာလနှင့် ဒီဇင်ဘာလတို့တွင် စိုက်ပျိုးကြ သော်လည်း ယခုအချိန်တွင် ဟင်းသီးဟင်းရွက်များကို ရေလောင်း၍ စိုက်ပျိုးကြသောကြောင့် ရာသီမရွေးသီးနှံများထွက်ပေါ်ရောင်းချလျက်ရှိပါသည်။ ရာသီချိန်မဟုတ်ဘဲ ထွက်ပေါ် လာသော သီးနှံများမှာ ရာသီချိန်သီးနှံလောက် ဖွံ့ဖြိုးမှုမရှိတာ တွေ့ရပါသည်။ ဒါပေမယ့် စားသုံးသူများက ရာသီပေါ်သီးနှံမဟုတ်ပေမယ့် ဝယ်ယူစားသောက်ကြသဖြင့် ဈေးကောင်းရရှိကြောင်း သိရပါသည်။ ထို့ကြောင့် ဟင်းသီးဟင်းရွက်စိုက်ပျိုးသူ တောင်သူများအနေဖြင့် ဈေးကောင်းရ၍ ရာသီချိန်မဟုတ်သော်လည်း ရေလောင်း၍စိုက်ပျိုးကြပါသည်။ ထိုကြောင့် တောင်သူများအနေဖြင့် အကျိုးအမြတ်များစွာရရှိကြောင်း သိရပါသည်။ မှော်ဇာကျေးရွာအုပ်စုတွင် ကုန်စိမ်းဒိုင် (၅)ခုထက်မနည်းရှိပြီး ထွက်ရှိလာသောသီးနှံများကို ပြည်မြို့ရှိဈေးကွက်များသို့ တင်ပို့ရောင်းချသလို ရန်ကုန်မြို့ရှိ သီရိမင်္ဂလာဈေးနှင့် ဒညင်းကုန်းဈေးများသို့ တင်ပို့ရောင်းချကြောင်း သိရပါသည်။
DOCA(ပဲခူး)