စစ်ကိုင်းတိုင်းဒေသကြီး၊ မုံရွာမြို့နယ်အတွင်း ချင်းတွင်းမြစ်ရိုးအရှေ့ဘက်တွင်တည်ရှိသော ညောင်ဖြူပင်၊ သစ်ဆိမ့်၊ ထနောင်းတော၊ နဂါးတွင်းကျေးရွာများသည် ဥယျာဉ်ခြံမြေစိုက်ပျိုးခြင်းလုပ်ငန်းကို အဓိကထားလုပ်ကိုင်လျက်ရှိသည်။
တောင်သူများအနေဖြင့် ပန်းမုန်လာကို စက်တင်ဘာလနှင့် အောက်တိုဘာလဆန်းတွင် ပျိုးထောင်၍ ၃၅ရက်သားတွင် စတင်စိုက်ပျိုးကြောင်း၊ ရက်ပေါင်း ၉၀ခန့်တွင် ခူးဆွတ်ရကြောင်း၊း မြေပြုပြင်ခြင်း၊ မျိုး၊ စိုက်ပျိုးခြင်း၊ သွင်းအားစုနှင့် လုပ်သားခများအပါအဝင် တစ်ဧကစိုက်ပျိုးထုတ်လုပ်မှုကုန်ကျစရိတ်မှာ ကျပ်(၈)သိန်းကုန်ကျပြီး ကျပ်(၁၅)သိန်းခန့်ပြန်လည်ရရှိရာ အကျိုးအမြတ်အနေဖြင့် ကျပ်(၇)သိန်းခန့်ကျန်ရှိကြောင်းသိရှိရပါသည်။
ခူးဆွတ်ပြီးသော ပန်းမုန်လာပွင့်များကို အရွယ်အစားအလိုက် တစ်ပွင့်လျှင် ငွေကျပ် (၁၅၀၀-၂၀၀၀) ခန့်အထိဖြင့်ရောင်းချကြောင်း၊ ပွဲစားများက ကျေးရွာများသို့ လာရောက်ဝယ်ယူကြပြီး မြို့ပေါ်ပွဲရုံများနှင့် ရန်ကုန်၊ မန္တလေးမြို့ကြီးများအထိပါ တင်ပို့ရောင်းချလျက်ရှိရာ ပန်းမုန်လာပွင့် စိုက်တောင်သူများအနေဖြင့် တွက်ခြေကိုက်ကာ ဝင်ငွေကောင်းနေကြောင်းသိရှိရပါသည်။
DOCA(စစ်ကိုင်း)