မကွေးတိုင်းဒေသကြီး၊ မကွေးခရိုင်၊ ရေနံချောင်းမြို့နယ်အတွင်းရှိ ကမ္မ၊ သပွတ်စု၊ လက္ခုပ္ပင်၊ သားလူးကန်၊ မန်ကျည်းတိုင်း၊ ဝါရိုး၊ ကျောက်ဆူကျေးရွာတို့တွင် ဆီထွက်သီးနှံတစ်မျိုးဖြစ်သော မြေပဲသီးနှံကို စီးပွားဖြစ်စိုက်ပျိုးကြကြောင်းသိရှိရပါသည်။
မြေပဲအမျိုးအစားများစွာရှိသည့်အနက် ပင်ထောင်နှင့်ပင်ပြန့်ကိုသာ အဓိကထား၍စိုက်ပျိုးကြောင်း၊ စိုက်ပျိုးရာတွင် မြေဧက(၁)ဧကလျှင် မြေပဲဆံ(၂)တင်းခန့်စိုက်ပျိုးရပြီး ကဆုန်လနှင့်နယုန်လတို့တွင် မိုးရွာသွန်းမှုကိုအခြေခံ၍ စတင်စိုက်ပျိုးပါကြောင်း၊ ယခုနှစ်တွင် မျိုးဘိုး၊ ထွန်ယက်ခ၊ သွင်းအားစု၊ ပေါင်းရှင်းခအပါအဝင် စုစုပေါင်း မြေပဲ(ပင်ပြန့်)(၁)ဧကလျှင် ကျပ်(၂၈၀၀၀၀)၊ မြေပဲ(ပင်ထောင်)(၁) ဧကလျှင် ကျပ်(၂၆၀၀၀၀)ခန့်ကုန်ကျပါကြောင်း၊ မြေပဲ(ပင်ပြန့်)များအား သီတင်းကျွတ်လနှင့် မြေပဲ (ပင်ထောင်)များအား တော်သလင်းလပြည့်ကျော်တွင် တူးဖော်ပြီးဖြစ်ပါကြောင်း၊ မြေဧက(၁)ဧကလျှင် မြေပဲအထွက်နှုန်းသည် မိုးရွာသွန်းမှုအပေါ်မူတည်၍ မိုးရွာသွန်းမှုများပါက မြေပဲတောင့် တင်း(၇၀မှ ၈၀) အထိရရှိနိုင်ပြီး မိုးရွာသွန်းမှုနည်းပါက မြေပဲတောင့် တင်း(၄၀မှ ၅၀)အထိရရှိနိုင်ကြောင်း၊ မြေပဲဖော်ရာတွင် မြေပဲ(၁)တင်းလျှင် မြေပဲဆွတ်ခူးရန်အတွက် လုပ်အားခအနေဖြင့် အလုပ်သမားတစ်ဦးကို ကျပ် (၂၀၀၀မှ ၃၀၀၀) ထိပေးချေရကြောင်း၊ ရောင်းချရာတွင် ပင်ထောင် (အစို)(၁)တင်းလျှင် ကျပ်(၁၃၀၀၀မှ ၁၄၀၀၀)၊ ပင်ထောင်(အခြောက်) (၁)တင်းလျှင် ကျပ်(၁၈၀၀၀မှ ၂၀၀၀၀)ရရှိပြီး ပင်ပြန့်(အစို) (၁) တင်းလျှင် ကျပ် (၁၅၀၀၀မှ ၁၆၀၀၀)၊ ပင်ပြန့်(အခြောက်) (၁)တင်းလျှင် ကျပ်(၂၀၀၀၀မှ ၂၂၀၀၀)ဖြင့်ရောင်းချကြောင်း၊ ဈေးကွက်အနေဖြင့် မကွေးမြို့နှင့်ရေနံချောင်းမြို့သို့ရောင်းချပါကြောင်း သားလူး ကန်ကျေးရွာနေ မြေပဲစိုက်ပျိုးသူ ဦးမြင့်အောင်ထံမှသိရှိရပါသည်။
DOCA(မကွေး)