အသိအမှတ်ပြုထားမှုမရှိသော စပါးမျိုးများကို စိုက်ပျိုးခြင်းမပြုရန် ထိုင်းဝန်ကြီးက သတိပေး

    ထိုင်းနိုင်ငံ၌ လယ်သမားများအနေဖြင့် သက်ဆိုင်ရာအာဏာပိုင်များက အသိအမှတ်ပြု ထားခြင်းမရှိသော ဗီယက်နမ်နိုင်ငံမှ ထွက်ရှိသည့် စပါးများကို မှောင်ခိုသွင်းခြင်း သို့မဟုတ် စိုက်ပျိုးခြင်းများ မပြုလုပ်ရန် အစိုးရက သတိပေးပြောကြားခဲ့သည်။

    ဗီယက်နမ်နိုင်ငံမှ တိုင်ကြားလာပါက ထိုင်းလယ်သမားများအနေဖြင့် ဒုက္ခတွေ့ကြုံနိုင် ကြောင်း၊ အဆိုပါကိစ္စရပ်များသည် နှစ်နိုင်ငံဆက်ဆံရေးနှင့် တိုင်းပြည်၏ဂုဏ်သိက္ခာကို ထိခိုက် စေနိုင်ကြောင်း၊ ဗီယက်နမ်နိုင်ငံမှ စပါးမျိုးကွဲများသည် ထိုင်းစပါးမျိုးကွဲများထက် အထွက်နှုန်း မြင့်မားသဖြင့် လယ်သမားများအတွက် ဝင်ငွေပိုမိုရရှိနိုင်သည်မှာ မှန်သော်လည်း အိမ်နီးချင်းနိုင်ငံ များမှ မှောင်ခိုတင်သွင်းလာသည့် စပါးမျိုးကွဲများကို ထိုင်းစိုက်ပျိုးရေးဌာန အနေဖြင့် အသိအမှတ် ပြုရန် မဖြစ်နိုင်ကြောင်းဖြင့် ၈-၁၂-၂၀၂၃ ရက်နေ့၌ သတိပေးချက်ထုတ်ပြန်ရာတွင် စိုက်ပျိုးရေး နှင့် သမဝါယမဝန်ကြီး Thamanat Prompow က ပြောကြားခဲ့သည်။

    ဝန်ကြီး Thamanat က ၎င်းအနေဖြင့် အရည်အသွေးကောင်းမွန်ပြီး အထွက်နှုန်းမြင့်မား သည့် ဒေသထွက် စပါးမျိုးစေ့အသစ်များအား သုတေသနပြု ထုတ်လုပ်သွားရန် ဆန်စပါးဦးစီး ဌာနသို့  ညွှန်ကြားထားကြောင်း၊ သို့မှသာ ရှေ့လာမည့် သီးနှံရာသီ၌ စိုက်ပျိုးရာတွင် လယ်သမား များအနေဖြင့် ၎င်းမျိုးများကို အသုံးပြုနိုင်မည်ဖြစ်ကြောင်း ဆက်လက်ပြောကြားခဲ့သည်။

    ဖိလစ်ပိုင်နိုင်ငံ၊ စီဘူးမြို့တွင် နိုဝင်ဘာလ ၂၈ ရက်နေ့မှ ၃၀ ရက်နေ့အထိ ကျင်းပခဲ့သည့် ကမ္ဘာ့ဆန်စပါးညီလာခံ၌ ပြုလုပ်သော ၂၀၂၃ ခုနှစ်၏ ကမ္ဘာ့အကောင်းဆုံးဆန်ပြိုင်ပွဲတွင် နိုင်ငံ ပေါင်း ၃၀ ကျော်မှတင်သွင်းသော ဆန်မျိုးကွဲများအနက် ဗီယက်နမ်နိုင်ငံ၏ Ong Cua ST25 ဆန်သည် ပထမဆုရရှိခဲ့ကြောင်း The Rice Trader (TRT) မှ ၅-၁၂-၂၀၂၃ ရက်၊ အင်္ဂါနေ့တွင် ထုတ်ပြန်ကြေညာခဲ့သည်။ ဒုတိယဆုကို ကမ္ဘောဒီးယားနိုင်ငံနှင့် တတိယဆုကို အိန္ဒိယနိုင်ငံတို့မှ အသီးသီး ရရှိခဲ့ကြသည်။

   ထိုင်းဆန်၏ မြင့်မားသောအရည်အသွေးနှင့် စံချိန်စံညွှန်းတို့ကို ကျယ်ပြန့်စွာ အသိအမှတ် ပြုထားသော်လည်း ယခုနှစ်ပြိုင်ပွဲတွင် ထိုင်းနိုင်ငံမှ ပါဝင်မှုမရှိခဲ့ကြောင်း ထိုင်းဆန်တင်ပို့သူများ အသင်းက ပြောကြားခဲ့သည်။ ထိုင်းနိုင်ငံ၏ Hom Mali 105 ဆန်သည် ၂၀၂၀ ပြည့်နှစ်နှင့် ၂၀၂၁ ခုနှစ်တို့တွင် ၂ နှစ်ဆက်တိုက် ကမ္ဘာ့အကောင်းဆုံးဆန်ဆုကို ရရှိခဲ့သည်။ သို့သော်လည်း ကမ္ဘော ဒီးယားနိုင်ငံ၏ Phka Rumduol ဆန်သည် ထိုင်းနိုင်ငံ၏ Hom Mali ဆန်ကို ကျော်လွန်ကာ ၂၀၂၂ ခုနှစ်တွင် ကမ္ဘာ့အကောင်းဆုံး ဆန်ဆုကို ရရှိခဲ့သည်။

   ထိုင်းဆန်သည် ကမ္ဘာ့ချန်ပီယံဖြစ်ခဲ့ပြီး ကမ္ဘာတစ်ဝှမ်းတွင် အကောင်းဆုံးဆန်အမျိုးအစား ၃ မျိုးစာရင်း၌ အမြဲပါဝင်နေသော်လည်း ပြိုင်ပွဲတွင် ပါဝင်ယှဉ်ပြိုင်ရန် ကျရှုံးခဲ့ခြင်းကြောင့်  ထိုင်း ပြည်သူလူထုအကြား တုန်လှုပ်မှုကို ဖြစ်ပေါ်စေခဲ့သည်။ ဒေသထွက်စပါး၏ အထွက်နှုန်းနည်းပါးမှု  ရှိသော်လည်း အရည်အသွေးအရ နှိုင်းယှဉ်ပါက ထိုင်းဆန်သည် အခြားဆန်မျိုးများထက် နိမ့်ကျမှု မရှိကြောင်း ဝန်ကြီး Thamanat က အခိုင်အမာပြောကြားခဲ့သည်။

Source: Bangkok Post, 9 Dec 2023(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)