ပြည်ပဲဈေးကွက်သို့ ပဲတီစိမ်းသစ်များ အထွက်လှိုင်ချိန်ဖြစ်လို့ အမြောက်အမြား ဝင်ရောက်လာပြီ ဖြစ်ပါသည်။ ပြည်အနီးတဝိုက်ဒေသများဖြစ်သော ဝက်ထီးကန်၊ ပေါင်းတလည်၊ ပေါက်ခေါင်း ဒေသများအပြင် ဘက်ရဲ၊ ကြံခင်းစသည့် ဧရာဝတီတိုင်းဒေသကြီးဖက်မှ ဝင်ရောက်မှု ရှိကြပါသည်။ မကွေးတိုင်းဒေသကြီး၊ မင်းတုန်း၊ ကံမမြို့နယ်များမှလည်း နေ့စဉ်ဝင်ရောက်လာခဲ့ကြောင်း သိရပါသည်။ နိုဝင်ဘာ ပထမပတ်မှစ၍ ဆောင်းပဲသစ်များ ဝင်ရောက်လာခြင်းဖြစ်ပြီး ယခုဒီဇင်ဘာ အတွင်း ဆက်လက်ဝင်ရောက်လာတာကြောင့် အိတ် (၂၀၀၀) ကျော်အထိ ပဲအဝင်များ လာခဲ့ပါသည်။ ပြည်ခရိုင်တွင် ပဲတီစိမ်းသီးနှံရောင်းဝယ်မှုအနေဖြင့် မိုးပဲတီစိမ်းနှင့် ဆောင်းပဲတီစိမ်းဆိုပြီး ရာသီ (၂) မျိုး စိုက်ပျိုးမှုရှိခဲ့တာကြောင့် မိုးပဲတီစိမ်းရာသီတွင် ဩဂုတ်၊ စက်တင်ဘာလများတွင် မိုးပဲများ အဝင်များပြီး အရောင်းအဝယ်ဖြစ်ခဲ့သလို ဆောင်းပဲရာသီ ယခုကာလမှာတော့ ဆောင်းပဲသစ်များ အဝင်လှိုင်ချိန်ဖြစ်ခဲ့ပါသည်။ ပဲတီစိမ်းသီးနှံသည် မတ်ပဲသီးနှံကဲ့သို့ တစ်နှစ်တာလုံး ဈေးကွက်မှာ ရောင်းချခြင်းမျိုးမဟုတ်ဘဲ ပဲအထွက်လှိုင်ချိန်တွင်သာ အဓိကထား ရောင်းချရသည့် သီးနှံဖြစ်ပါသည်။ ဝယ်လက်များအနေဖြင့် မန္တလေးဝယ်လက်အဓိက ဝယ်ယူမှုရှိပြီး ရန်ကုန် ဝယ်လက် တစ်ခါတစ်ရံအဝယ်ရှိကြောင်း သိရပါသည်။ ယခုဒီဇင်ဘာ လဆန်းရက်မှစ၍ ပဲဈေးနှုန်း မြင့်တက်လာခဲ့တာကြောင့် ပိဿာ (၂၀) တစ်တင်း ၆၀၀၀၀ မှ ၆၀၅၀၀ကျပ်ထိ အရောင်းအဝယ်ဖြစ်ကာ ပဲအရည်အသွေးလိုက်၍ ဈေးအနည်းငယ်စီ ကွာခြားမှုရှိကြောင်း သိရပါသည်။ ယခင်နှစ်က ပဲတီစိမ်းသီးနှံ၏ ကာလတူအချိန် ပေါက်ဈေးနှုန်း ကျပ် ၅သောင်းအောက်လျော့ခဲ့လို့ ကျပ် ၄သောင်း ကျော်သာ ရောင်းချရပြီး ယခင်နှစ်မှာတော့ ဈေးအေးနေတယ်ဆိုသော်လည်း ယခင်နှစ်ဈေးထက် ဈေးပိုရနေတယ်လို့ဆိုရမှာ ဖြစ်ပါသည်။ ယခင်နှစ်ကတည်းက ပဲတီစိမ်းသီးနှံသည် ပြည်ပ ဝယ်လက်ရှိသော ပဲဈေးကွက်မှာ ဈေးအေးလျက်ရှိပြီး မတ်ပဲ၊ ကုလားပဲ၊ ပဲစင်းငုံသီးနှံများထက် ဈေးလျော့နည်း ဈေးအေးတဲ့သီးနှံဖြစ်ခဲ့ကာ ယခုနှစ်မှာလည်း ပဲတီစိမ်းသီးနှံသည် သိသိသာသာ ဈေးမြင့်တက်လာခြင်းမရှိဘဲ ယခင်နှစ်ထက် အနည်းငယ်ဈေးပိုရလာသည်ဆိုသော်ငြား အခြားပဲ များထက် ဈေးအေးနေတဲ့ သီးနှံဖြစ်ကြောင်း လေ့လာသိရှိရပါသည်။
DOCA(ပဲခူး)