စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနနှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းတို့ ပူးပေါင်းစီစဉ်မှုဖြင့် စားသုံးသူပြည်သူများ သက်သာသောစျေးနှုန်းဖြင့် စားသုံးဆီများ ဝယ်ယူရရှိနိုင်ရန် ရည်ရွယ်၍ ဗဟိုဘဏ်မှ ရည်ညွှန်းငွေလဲနှုန်းဖြင့် တိုက်ရိုက်ရောင်းချပေးသည့် နိုင်ငံခြားငွေ အမေရိကန် ဒေါ်လာ (၁၇) သန်းဖြင့် မှာယူတင်သွင်းခဲ့သည့် စားအုန်းဆီများကို (၁၇.၁.၂၀၂၂)ရက် (တနင်္လာနေ့)မှ စတင်၍ တိုင်းဒေသကြီး/ပြည်နယ်များရှိ လက်ကားရောင်းချပေးသူများသို့ ဖြန့်ဖြူးရောင်းချပေးလျက်ရှိပါသည်။
ယခုအခါ မန္တလေးတိုင်းဒေသကြီး၊ မိတ္ထီလာမြို့နယ်မှ စားအုန်းဆီ ပီပါ (၃၀၀) ခွဲတမ်းရရှိခဲ့ရာ အဆိုပါ စာအုန်းဆီများအား မိတ္ထီလာမြို့ ဆီကုန်သည်နှင့်ဆီလုပ်ငန်းရှင်များအသင်း ကိုယ်စားလှယ် (၃၄) ဦးမှ သတ်မှတ်စျေးနှုန်း တစ်ပိဿာလျှင် (၄၅၀၀)ကျပ်နှုန်းဖြင့် (၂၃.၁.၂၀၂၂) ရက်နေ့တွင် ပြည်သူများ အခက်အခဲမရှိစေရေးအတွက် ဆီဆိုင်(၃၃)ဆိုင်မှ တပြိုင်နက် ရောင်းချပေးလျက်ရှိပါသည်။
မိတ္ထီလာခရိုင်ဦးစီးမှူးရုံးအနေဖြင့် ဆီလုပ်ငန်းရှင်ကိုယ်စားလှယ်များမှ စားအုန်းဆီများအား ပြည်သူလက်ဝယ်သို့ သတ်မှတ်စျေးနှုန်းများဖြင့် အမှန်တကယ်ရောင်းချခြင်းရှိ/မရှိ၊ အလေးချိန်၊ အခြင်အတွယ် မှန်ကန်မှုရှိ/မရှိ ကြပ်မတ်ဆောင်ရွက်နိုင်ရေးအတွက် (၂၃.၁.၂၀၂၂) ရက်နေ့တွင် မိတ္ထီလာမြို့ စျေးများအတွင်း စားသုံးသူရေးရာဦးစီးဌာနမှ ဦးစီးအရာရှိ၊ ဦးသန်းစိုးနှင့်ဝန်ထမ်းများ၊ မိတ္ထီလာဆီကုန်နှင့် ဆီလုပ်ငန်းရှင်များအသင်းဥက္ကဌ ဦးညွှန်လှိုင်နှင့်အဖွဲ့ဝင်များပူးပေါင်း၍ စျေးကွက်စောင့်ကြည့်စစ်ဆေးခြင်း လုပ်ငန်းများကိုဆောင်ရွက်ခဲ့ကြောင်း သိရှိရပါသည်။
စားသုံးသူရေးရာဦးစီးဌာန
မန္တလေးတိုင်းဒေသကြီး