စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်း ဒေသကြီး၊ ပခုက္ကူခရိုင်ဦးစီးမှူးရုံးမှ ဒု-ခရိုင်ဦးစီးမှူးနှင့်ဝန်ထမ်းများသည် တိုင်း/ခရိုင် ဦးစီးမှူးတို့၏ လမ်းညွှန်ချက်ဖြင့် စားသုံးသူများ လုံခြုံစိတ်ချရမှုရှိစေရန်နှင့် ထုတ်လုပ်လျက်ရှိသော ကုန်စည်များ တွင် စားသုံးသူကာကွယ်ရေးဥပဒေအရ ကုန်အညွှန်းအမှတ်အသားများ ပြည့်စုံစွာပါဝင်နိုင်ရေးအ တွက် ရည်ရွယ်၍ (၂၆.၁.၂၀၂၂)ရက်နေ့၊ နံနက်(၁၀:၀၀)အချိန်တွင် မိတ်ဖက်ဌာနဖြစ်သော မြို့နယ် စည်ပင်သာယာရေးအဖွဲ့နှင့်ပူးပေါင်း၍ ပခုက္ကူမြို့ပေါ်ရှိ သောက်ရေသန့်လုပ်ငန်းရှင်များနှင့် သွားရောက်တွေ့ဆုံဆွေးနွေးခဲ့ပါသည်။
အဆိုပါသောက်ရေသန့်လုပ်ငန်းများသို့ သွားရောက်၍ တွေ့ဆုံဆွေးနွေးအသိပညာပေးရာတွင် ဒု-ခရိုင်ဦးစီးမှူးက လုပ်ငန်းရှင်များအနေဖြင့် ထုတ်လုပ်သော သောက်ရေသန့်အမျိုးမျိုးတွင် စားသုံးသူကာကွယ်ရေးဥပဒေပါ အခန်း(၁၈) ကုန်အညွှန်းအမှတ်အသားများ ပြည့်စုံစွာ ပါဝင်ရမည့်အပြင် မြန်မာနိုင်ငံ စားသုံးသူကာကွယ်ရေးကော်မရှင်မှထုတ်ပြန်ထားသည့် ညွှန်ကြားချက်အမှတ်(၂/၂၀၁၉) အရ ကုန်ပစ္စည်း၏ အမျိုးအမည်၊ အရွယ်အစား၊ အရေအတွက်၊ အသားတင် ပမာဏ၊ ထားသိုသိမ်းဆည်းပုံအညွှန်းတို့ကို မြန်မာဘာသာဖြင့် မဖြစ်မနေ ဖော်ပြရမည်ဖြစ်ကြောင်း၊ ကုန်အညွှန်းအမှတ်အသားများကို ပြည့်စုံစွာ ဖော်ပြခြင်းသည် စားသုံးသူအား မိမိတို့ထုတ်လုပ်သော ကုန်စည်နှင့်ပတ်သက်၍ ပြည့်စုံမှန်ကန်သော သတင်းအချက်အလက်ပေးခြင်းဖြစ်သောကြောင့် လုပ်ငန်းရှင်များဘက်မှလည်း လိုက်နာဆောင်ရွက်ပေးရန်လိုအပ်ကြောင်း၊ ကုန်အညွှန်းအမှတ်အသားများ ပြည့်စုံစွာပါဝင်သည့် သောက်ရေသန့်လုပ်ငန်းများ၏ ကုန်အမှတ်တံဆိပ်နမူနာများအား စိစစ်အတည်ပြုပေးနိုင်ရန်အတွက် စားသုံးသူရေးရာဦးစီးဌာန၊ မကွေးတိုင်းဒေသကြီးဦးစီးမှူးရုံးသို့ ဆက်လက်တင်ပြ ဆောင်ရွက်သွားမည်ဖြစ်ကြောင်း အသေးစိတ်ရှင်းလင်းဆွေးနွေးခဲ့ပြီး စားသုံးသူကာကွယ်ရေးဥပဒေ စာအုပ်နှင့် မြန်မာနိုင်ငံ စားသုံးသူကာကွယ်ရေးကော်မရှင်မှ ထုတ်ပြန်ထားသည့် ညွှန်ကြားချက်အမှတ် (၂/၂၀၁၉)ပါ လက်ကမ်းစာစောင်များအား ဖြန့်ဝေခဲ့ကြောင်း သတင်းရရှိပါသည်။
DOCA(မကွေး)