“ကော့မှူးမြို့နယ်၊ ဈေးကွက်အတွင်းရှိ ဆေးနှင့်ဆေးပစ္စည်းဆက်စပ်ပစ္စည်းဈေးနှုန်းအခြေအနေအား ကွင်းဆင်းစစ်ဆေးခြင်း”

    ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်တွင် ဆေးနှင့်ဆေးပစ္စည်းဆက်စပ်ပစ္စည်းများဝယ်ယူသုံးစွဲသူများ အဆင်ပြေရန်ရည်ရွယ်၍ စည်ပင်သာယာမြို့မဈေးအတွင်း/အပြင် နှင့် ရပ်ကွက်များ၌ ရောင်းချလျက်ရှိသောဆေးဆိုင်နှင့် ဆေးစတိုးဆိုင်များအား ၂၀၂၄ခုနှစ်၊ ဖေဖော်ဝါရီလ (၂၁) ရက်နေ့၊ နံနက် (၁၁း၃၀) နာရီအချိန်တွင်  လုပ်ငန်းရှင်ဆေးဆိုင်ပိုင်ရှင်များနှင့် သွားရောက်တွေ့ဆုံပြီး ဈေးကွက်အတွင်း ကွင်းဆင်းစစ်ဆေးခဲ့ကြောင်းသိရှိရပါသည်၊၊

   ထိုသို့ကွင်းဆင်းစစ်ဆေးခဲ့ရာတွင် မြို့နယ်ကျန်းမာရေးဦးစီးဌာနမှ ဝန်ထမ်းများ၊ မြို့နယ်စည်ပင်သာယာရေးဦးစီးဌာနမှ ဈေးတာဝန်ခံ၊ စားသုံးသူရေးရာဦးစီးဌာနမှ မြို့နယ်တာဝန်ခံတို့ပူးပေါင်းအဖွဲ့သည် စည်ပင်သာယာမြို့မဈေးအတွင်းအပြင်နှင့် ဗိုလ်ချုပ်လမ်းမကြီး၊ မြို့မရပ်ကွက်၊ မကျီးတန်းရပ်ကွက်များရှိ ဆေးနှင့်စတိုးဆိုင်၊ ဆေးဆိုင်များမှ ဆိုင်ပိုင်ရှင်လုပ်ငန်းရှင်များနှင့် သွားရောက်တွေ့ဆုံပြီး ကိုဗစ်-၁၉ ရောဂါကုသရာတွင်အသုံးပြုသည့် ဆက်စပ်ဆေးပစ္စည်းများနှင့် တခြားဆေးနှင့် ဆေးပစ္စည်းများကို ဈေးကွက်အတွင်း ဝယ်ယူဖြန့်ဖြူးရောင်းချရာတွင် ဈေးနှုန်းအဆမတန်မြှင့်တင်ရောင်းချခြင်းများမပြုလုပ်ကြရန်နှင့် အစားအသောက်နှင့်ဆေးဝါးကွပ်ကဲရေးဦးစီးဌာန၏ ခွင့်ပြုချက်မပါရှိသော တရားမဝင်ဆေးဝါးများ၊ သက်တမ်းလွန်နေသော ဆေးဝါးများအား အဆိုပါဆေးဆိုင်များတွင်  ဖြန့်ဖြူးရောင်းချခြင်းမပြုလုပ်ကြရန်၊ ကုန်ညွှန်းအမှတ်အသားဖော်ပြချက်ပြည့်စုံစွာပါရှိသော ဆေးဝါးများကိုသာရောင်းချကြရန်နှင့် စားသုံးသူပြည်သူများအတွက် အဓိကကျသော  ကိုဗစ်-၁၉ ရောဂါကာကွယ်ရေးဆေးဝါးများ ဈေးကွက်အတွင်း ပြတ်လပ်မှုမျိုးမဖြစ်စေရန် အထူးဂရုပြုစေလိုကြောင်း အသိပညာပေးပြောကြားခဲ့ကာ ဆေးနှင့်ဆေးပစ္စည်းဆက်စပ်ပစ္စည်းဈေးနှုန်းအခြေအနေများအား မေးမြန်းစုံစမ်းခဲ့ပြီး ဈေးကွက်အတွင်း ကွင်းဆင်းစစ်ဆေးခဲ့ကြောင်းသိရှိရပါသည်၊၊

DOCA(ရန်ကုန်)