စားသုံးသူကာကွယ်ရေးနှင့်ပတ်သက်၍ အနောက်နိုင်ငံများတွင် ၁၉၆၀ ခုနှစ် နောက်ပိုင်း အရေးဆိုဆောင်ရွက်လာမှုများအပေါ် အမေရိကန်ပြည်ထောင်စုသမ္မတ ဂျွန်အက်(ဖ်)ကနေဒီမှ စတင်၍ စားသုံးသူအခွင့်အရေးများနေ့ကို ၁၉၆၂ခုနှစ်၊ မတ်လ (၁၅)ရက်နေ့ကို သတ်မှတ်ပေးခဲ့ ပါသည်။ စားသုံးသူအခွင့်အရေးဖြစ်ပေါ်လာပုံမှ ဂျွန်အက်(ဖ်)ကနေဒီ ပြောကြားချက်မှာ “ စားသုံးသူ တွေထဲမှာလည်း ကျွန်တော်တို့အားလုံးပါဝင်ပါတယ်၊ အဲဒီ စားသုံးသူတွေဆိုတာဟာ ကမ္ဘာပေါ်မှာ စီးပွားရေးအရ အင်အားအကြီးဆုံးအုပ်စုတစ်ခု အစိုးရဘက်ကရော ပုဂ္ဂလိဘက်ကပါ စီးပွားရေးနှင့် ပတ်သက်လို့ချမှတ်လိုက်တဲ့ ဆုံးဖြတ်ချက်မှန်သမျှရဲ့ ကောင်းမွေ ဆိုးမွေကို ခံစားရတဲ့သူတွေပါ၊ အဲဒီစားသုံးသူတွေဟာ အဲသလောက်ကို အရေးကြီးတဲ့အုပ်စုပေါ့၊ သို့ပေမယ့် အဲဒီလူတွေရဲ့ အသံကိုကျတော့ နားမထောင်ဘဲငေးနေကြပါတယ်” လို့ပြောကြားခဲ့သည်။ စားသုံးသူအခွင့်အရေးများနေ့ကို ကမ္ဘာ့စားသုံးသူများအဖွဲ့ (Consumer International)မှ ဦးဆောင်၍ နှစ်စဉ် မတ်လ(၁၅)ရက်နေ့ ရောက်တိုင်းစားသုံးသူများ၏ အခွင့်အရေးများကို အလေးထား ဂရုပြုမြင့်တင်သည့်အနေဖြင့် ကျင်းပပြုလုပ်လျက်ရှိကြောင်း သိရှိရပါသည်။
ASEAN Economic Community –AEC Blueprint အရ အာဆီယံနိုင်ငံများသည် ၂၀၁၅ ခုနှစ်တွင် စားသုံးသူအကာအကွယ်ပေးရေးဥပဒေပြဌာန်းနိုင်ရေး ဦးစားပေးရည်မှန်းချက်ထား ဆောင်ရွက်လျက်ရှိရာ၊ မြန်မာနိုင်ငံအနေဖြင့် ၂၀၁၉ခုနှစ်၊ မတ်လ(၁၅)ရက်နေ့တွင် ပြဌာန်းခဲ့သည့် စားသုံးသူကာကွယ်ရေးဥပဒေနှင့်အညီ လုပ်ငန်းများဆောင်ရွက်လျက်ရှိပါသည်။
ပြည်ထောင်စုသမ္မတမြန်မာနိုင်ငံတော်တွင် ပထမဆုံးအကြိမ် ကမ္ဘာ့စားသုံးသူအခွင့်အရေး များနေ့ကို ၂၀၁၆ခုနှစ် မတ်လ(၂၆)ရက်နေ့တွင် ရန်ကုန်တိုင်းဒေသကြီးဦးစီးမှူးရုံးတွင် လည်း ကောင်း၊ ဒုတိယအကြိမ် ၂၀၁၇ခုနှစ် မတ်လ(၁၅)ရက်နေ့ ကမ္ဘာ့စားသုံးသူအခွင့်အရေးများနေ့ကို မန္တလေးတိုင်းဒေသကြီး၊ မြို့တော်ခန်းမတွင်လည်းကောင်း၊ တတိယအကြိမ် ၂၀၁၈ခုနှစ် မတ်လ (၁၅)ရက်နေ့တွင် ကမ္ဘာ့စားသုံးသူအခွင့်အရေးနေ့ကို ပြည်ထောင်စုနယ်မြေ၊ နေပြည်တော်ရှိ Horzion Lake View Resort Hotel တွင်လည်းကောင်း၊ စတုတ္တအကြိမ်၂၀၁၉ခုနှစ် မတ်လ(၁၅) ရက်နေ့တွင် ဧရာဝတီတိုင်းဒေသကြီး ပုသိမ်မြို့၊ မြို့တော်ခန်းမတွင်လည်းကောင်း၊ အလှည့်ကျ
စည်ကားသိုက်မြိုက်စွာ ကျင်းပပြုလုပ်ခဲ့ပါသည်။ ပဉ္စမအကြိမ် ၂၀၂၀ပြည့်နှစ်၊ မတ်လ(၁၅) ရက်နေ့ တွင် ကမ္ဘာ့စားသုံးသူအခွင့်အရေးများနေ့ (World Consumer Rights Day )ကို မွန်ပြည်နယ် မော်လမြိုင်မြို့ ပြည်နယ်ခန်းမတွင်စည်ကားသိုက်မြိုက်စွာ ကျင်းပပြုလုပ်ရန် စီစဉ်ဆောင်ရွက်ခဲ့ သော်လည်းယင်းအချိန်အခါတွင်ကမ္ဘာ့နိုင်ငံပေါင်း (၁၀၁)နိုင်ငံ၌ ပြန့်ပွားလျက်ရှိသော Coronavirus Disease (COVID-19)ကြောင့် လူစုလူဝေးဖြင့် ပွဲလမ်းသဘင်များ ရှောင်ကြည်ကြရန်အတွက် နှိုးဆော်မှုများကြောင့် ကမ္ဘာ့စားသုံးသူအခွင့်အရေးများနေ့ကို မွန်ပြည်နယ် မော်လမြိုင်မြို့ ပြည်နယ်ခန်းမတွင် စည်ကားသိုက်မြိုက်စွာ ကျင်းပနိုင်ခြင်းမရှိခဲ့ပါ။
သို့သော် မွန်ပြည်နယ် စားသုံးသူရေးရာဦးစီးဌာနအနေဖြင့် မတ်(၁၉)ရက်နေ့တွင် ကျရောက်မည့် (၄၆)ကြိမ်မြောက် မွန်ပြည်နယ်နေ့အထိမ်းအမှတ်ပြပွဲတွင် စားသုံးသူရေးရာ ဦးစီးဌာန ပြခန်းများ ဖွင့်လှစ်ဆောင်ရွက်သည့်အပြင် ကမ္ဘာ့စားသုံးသူအခွင့်အရေးများနေ့ Campaign အဖြစ် အသိပညာပေးလုပ်ငန်းများ ဆောင်ရွက်ခြင်း၊ စားသုံးသူကာကွယ်ရေး အသိပညာပေးလက်ကမ်း စာစောင်များ ဖြန့်ဝေပေးခြင်း အစီအစဉ်များပြုလုပ်ခဲ့သည်။ တခြားတိုင်းဒေသကြီးနှင့်ပြည်နယ် များတို့တွင်လည်း ကမ္ဘာ့စားသုံးသူအခွင့်အရေးများနေ့ ( World Consumer Rights Day ) အထိမ်းအမှတ်အဖြစ်ဖြင့် ကျင်းပခဲ့ကြပါသည်။
၂၀၂၁ခုနှစ် မတ်လ (၁၅) ရက်နေ့တွင်လည်း Coronavirus Disease (COVID-19)ကြောင့် ကမ္ဘာ့စားသုံးသူအခွင့်အရေးများနေ့အခမ်းအနားကို ကျင်းပပြုလုပ်ခြင်းမရှိခဲ့ပါ။ စားသုံးသူများ၏ အခွင့်အရေးများကို အလေးထား၍ စားသုံးသူရေးရာဦးစီးဌာနသည် မြန်မာနိုင်ငံစားသုံးသူများ အတွက် စားသုံးသူကာကွယ်ရေးဥပဒေ (၂၀၁၉)၏ ရည်မှန်းချက်များအတိုင်း စားသုံးသူကာကွယ် ရေးနှင့်စားသုံးသူအကျိုးစီးပွားကာကွယ်ခြင်းများဖြင့် စဉ်ဆက်မပြတ်ဆောင်ရွက်ပေးလျက်ရှိပါသည်။
၂၀၁၉ခုနှစ် ကမ္ဘာ့စားသုံးသူအခွင့်အရေးများနေ့ (World Consumer Rights Day) ဆောင်ပုဒ်မှာ “စိတ်ချယုံကြည်ဒီဂျစ်တယ်ထုတ်ကုန်များဆီ” (Trusted Smart Products) ဖြင့် လည်းကောင်း၊ ၂၀၂၀ပြည့်နှစ် ကမ္ဘာ့စားသုံးသူအခွင့်များနေ့ (World Consumer Rights Day) ဆောင်ပုဒ်မှာ “စားသုံးသူအရေးစဉ်ဆက်မပြတ်ဆောင်ရွက်ပေး” (The Sustainable Consumer) ဖြင့်လည်းကောင်းသိရှိခဲ့ရသည်။ ယခုနှစ်၂၀၂၂ခုနှစ်တွင်ကျရောက်မည့် ကမ္ဘာ့စားသုံးသူအခွင့်အရေး
များနေ့ (World Consumer Rights Day)ဆောင်ပုဒ်နှင့်အတူ မတ်လ(၁၅)ရက်နေ့ ကမ္ဘာ့စားသုံး သူအခွင့်အရေးများနေ့ (World Consumer Rights Day) နေ့အား ကြိုဆိုရင်း စားသုံးသူများ စားသုံးသူအခွင့်အရေးနှင့်အညီ ကုန်စည်/ဝန်ဆောင်မှုများ ထုတ်လုပ်ဆောင်ရွက်နိုင်ရေးအတွက် စားသုံးသူရေးရာဦးစီးဌာနမှ ဆောင်ရွက်ပေးလျက်ရှိကြောင်း တင်ပြအပ်ပါသည်။
DOCA(မွန်)