“အုန်းပင်စိုက်ပျိုးဝင်ငွေတိုး”

    မန္တလေးတိုင်းဒေသကြီး၊ ကျောက်ဆည်ခရိုင်တွင် သီးနှံမျိုးစုံစိုက်ပျိုးဖြစ်ထွန်းလျက်ရှိပြီး နှစ်ရှည်သီးနှံများကိုလည်း စိုက်ပျိုးလျက်ရှိပါသည်။ နှစ်ရှည်သီးနှံများဖြစ်သည့် သရက်၊ မာလကာ၊ လျော်ဖြူနှင့် အုန်းပင်များကိုလည်းစိုက်ပျိုးကြပါသည်။ ၄င်းသီးနှံများအနက် အုန်းသီးပင်ကို ကျောက်ဆည်မြို့နယ်တွင် (၂၃)ဧက၊ စဉ်ကိုင်မြို့နယ်တွင် (၁၂)ဧက၊ မြစ်သားမြို့နယ်တွင် (၉၃)ဧက၊ စုစုပေါင်း (၁၂၈)ဧကစိုက်ပျိုးထားရှိပြီး ဧကအားလုံး အုန်းသီးများထွက်ရှိလျက်ရှိပါသည်။ အုန်းပင်သည် နှစ်ရှည်ပင်ဖြစ်သည့်အတွက် စိုက်ပျိုးပြီး (၆-၇)နှစ်တွင် အသီးများစတင်ခူးဆွတ်ရောင်းချရကြောင်း၊ အုန်းပင်တစ်ပင်တွင် အုန်းဆီ(၁၀-၁၂)လုံးပါ အခိုင်(၃-၄)ခိုင်သီးကြောင်း၊ အုန်းပင်သည် တစ်နှစ်ပတ်လုံးသီးသော အပင်မျိုးဖြစ်ပြီး အညာဒေသတွင် အများဆုံးစိုက်ပျိုးသောမျိုးမှာ ပင်မြင့်မျိုးများဖြစ်သည်။ ပင်မြင့်မျိုးတွင် အလုံးကြီးမျိုးနှင့် အလုံးသေးမျိုးဟူ၍ (၂)မျိုးရှိကြောင်း၊ အလုံးကြီးမျိုးကို ရိုးရာနတ်ဖြစ်သော အိမ်တွင်းအုန်းဆွဲရန်အတွက် ဝယ်ယူအသုံးပြုကြပြီး အလုံးသေးမျိုးကို အုန်းရေသောက်သုံးရန်နှင့် အုန်းဆံနုနုလေးများစားသုံးရန်အတွက် ဝယ်ယူအသုံးပြုကြပါသည်။ အုန်းသီးရောင်းချရန်အတွက် အုန်းသီးကို အုန်းပင်ပေါ်မှချရပါသည်။ အုန်းသီးချရန်အတွက် အုန်းပင်တက်အလုပ်သမားကို အုန်းပင်တစ်ပင်လျှင် (၅၀၀၀/-)ကျပ်ပေးရကြောင်း၊ နတ်အုန်း၊ ကန်တော့ပွဲအုန်းသီးတစ်လုံးလျှင် (၂၅၀၀/-)ကျပ်ဖြင့် ရောင်းချကြောင်း၊ အုန်းစိမ်းရေသောက်ရန်နှင့် အုန်းစိမ်းနုနုလေးများစားသုံးရန်အတွက် အုန်းသီးတစ်လုံးလျှင် (၁၀၀၀-၁၅၀၀)ကျပ်၊ အုန်းသီးခြောက်တစ်လုံးလျှင် (၂၀၀၀/-) ကျပ်စျေးနှုန်းရှိကြောင်း၊ အုန်းပင်ခြေရင်းအထိ လာရောက်ဝယ်ယူသော ပွဲစားများအား နတ်အုန်း၊ ကန်တော့ပွဲအုန်းသီးတစ်လုံးလျှင် (၂၀၀၀/-)ကျပ်၊ အုန်းရေနှင့် အုန်းသီးနုစားရန် အုန်းသီးတစ်လုံးလျှင် (၇၀၀/-)ကျပ်စျေးနှုန်းဖြင့်ရောင်းချရကြောင်း၊ အုန်းပင်မှာ နှစ်ရှည်ပင်ဖြစ်သည့်အတွက် ဝင်ငွေတစ်လုံးတစ်ခဲတည်းမရရှိသော်လည်း မိသားစုမိဖိုးချောင်စရိတ်ကာမိကြောင်း၊ အုန်းပင်စိုက်ပျိုးထားလျှင်သားတစ်ယောက်ရှိသကဲ့သို့ အားကိုးရကြောင်း၊ အုန်းပင်သည် တစ်ပင်လုံးအသုံးဝင်ကြောင်း၊ အုန်းလက်အစိုကို ကွမ်းခြံများမှ အမိုး၊ အကာအတွက် လာရောက်ဝယ်ယူကြောင်း၊ အုန်းလက်အစိုတစ်လက်လျှင် (၃၀၀-၅၀၀)ကျပ်အထိရောင်းချရပြီး အုန်းလက်အခြောက်ကို ဘေးသားများဖယ်၍ အလယ်ရိုးတံလေးများစုကာ အုန်းတံမြက်စည်းလုပ်၍ရောင်းချရကြောင်း၊ အုန်းဆံ(၈၀၀-၁၀၀၀)ထိပါသော အုန်းတံမြက်စည်းတစ်ချောင်းလျှင် (၆၀၀၀/-)ကျပ်အထိရောင်းချရကြောင်း၊ အုန်းရေသောက်သုံးပါက သွေးလည်ပတ်မှုမှန်ကန်ပြီး ဆီးရွှင်ကြောင်း၊ ဆီးချိုသမားများသောက်သုံးပါက သွေးတွင်းသကြားဓာတ်လျော့ကျစေကြောင်း လေ့လာသိရှိရပါသည်။

DOCA(မန္တလေး)