![](http://www.doca.gov.mm/sites/default/files/styles/consumer_inner_image__847x424_/public/44_6.jpg?itok=aF1Iuz7B)
မကွေးတိုင်းဒေသကြီး၊ ပခုက္ကူခရိုင်၊ ပခုက္ကူဈေးကွက်တွင် ၂၀၂၄ခုနှစ်၊ ဧပြီလ(စတုတ္ထပတ်) တွင် မြေပဲဈေးနှုန်းများ အနည်းငယ်မြင့်တက်လာခဲ့ပါသည်။ ယခုအချိန်တွင် စိုက်တောင်သူများ ဆောင်းသီးနှံမြေပဲများ အသစ်ပေါ်ချိန်ဖြစ်သော်လည်း (၃)လပဲ အဆံဖြူမျိုး စိုက်ပျိုးမှုနည်း၍ ဈေးကွက်သို့ ဝင်ရောက်မှု မရှိကြောင်း၊ မြေပဲ(ပြန့်ကြီး) လုံးဆံအနီများ စိုက်ပျိုးမှုများသော ပခုက္ကူ၊ မြစ်ခြေ၊ ကမ္မမြို့နယ်ရှိ ကျေးရွာများနှင့် မြိုင်မြို့နယ်အတွင်းရှိကျေးရွာများ၊ ပေါက်၊ ထီးလင်း၊ ဂန့်ဂေါ၊ ကျောက်ထု၊ ယော ဒေသများမှ ထွက်ရှိသော မြေပဲများ ပခုက္ကူမြို့သို့ ဝင်ရောက်ကြောင်း၊ ယခင်နှစ် မြေပဲသီးနှံပေါ်ချိန် တွင် ပခုက္ကူမြေပဲ ဈေးကွက်သို့ နေ့စဉ် မြေပဲတောင့် ကုန်ချိန်ပိဿာ (၃)သောင်း၊ မြေပဲလုံးဆံ(ဆီဆံ) ပိဿာ(၂)သောင်းခန့် ဝင်ရောက်ကြောင်း၊ ယခုနှစ်တွင် နယ်မြေအခြေအနေအရ မြေပဲပေါ်ချိန်တွင် ပခုက္ကူ၊ ကမ္မ၊ မြိုင်၊ ယောနယ်ဒေသများမှ ထွက်ရှိသော မြေပဲများကို ဒေသခံ ဝယ်လက်များမှတစ်ဆင့် ပခုက္ကူမြို့ပေါ်ရှိ ကုန်သည်များမှ ဝယ်ယူသိုလှောင်ထားရှိပြီဖြစ်ခြင်းကြောင့် နေ့စဉ်ကုန်အဝင်မရှိကြောင်း ပခုက္ကူမြို့ပေါ်ရှိ မြေပဲရောင်းဝယ်ရေးလုပ်ငန်းရှင်တစ်ဦးထံမှ သိရှိရပါသည်။
ဈေးနှုန်းအနေဖြင့် ယခင်ဧပြီလ(တတိယပတ်)တွင်မြေပဲတောင့် တစ်ပိဿာလျှင် ကျပ်(၄၀၀၀) ၊ (၃၈၀၀)၊ (၃၆၀၀)၊ မြေပဲလုံးဆံ(အနီ) တစ်ပိဿာလျှင် ကျပ်(၆၅၀၀)၊ (၆၃၀၀)၊ (၆၂၀၀)၊ မြေပဲ (ဆီဆံ)တစ်ပိဿာလျှင် ကျပ်(၅၈၀၀)၊ (၅၃၀၀) ဈေးနှုန်းများဖြင့် အရောင်းအဝယ်ဖြစ်ခဲ့ပြီး ယခု ဧပြီလ(စတုတ္ထပတ်)တွင် မြေပဲတောင့် တစ်ပိဿာလျှင် ကျပ်(၄၂၀၀)၊ (၄၀၀၀)၊ (၃၈၀၀)၊ မြေပဲလုံးဆံ (အနီ)တစ်ပိဿာလျှင် ကျပ်(၆၇၀၀)၊ (၆၆၀၀)၊ (၆၅၀၀)၊ မြေပဲ (ဆီဆံ)တစ်ပိဿာလျှင် ကျပ်(၆၀၀၀) ၊ (၅၅၀၀)ဈေးဖြင့် အရောင်းအဝယ်ဖြစ်ခဲ့ကြောင်း၊ ပခုက္ကူဈေးကွက်သို့ မြေပဲဆံ၊ မြေပဲအတောင့် ကုန်ချိန်ပိဿာ အဝင်မရှိသော်လည်း မြေပဲလှောင်လက်သမားများမှ ကြိတ်ခွဲဖြန့်ဖြူးရောင်းချလျက် ရှိကြောင်း၊ မြို့တွင်းမြေပဲဆားလှော်ရောင်းဝယ်ရေးလုပ်ငန်းရှင်များ၊ ဆီစက်လုပ်ငန်းရှင်များမှ အဝယ် ရှိသောကြောင့် မြေပဲဈေးကွက်အနည်းငယ်မြင့်တက်လာကြောင်း သိရှိရပါသည်။
မြင့်မြင့်သန်း(ပခုက္ကူ)