ကျိုက်မရောဒေသထွက် ယိုးဒယားကိုင်းဆက်ဒူးရင်းသီးနှင့် ဗမာဒူးရင်းသီးများ ယခုချိန်၌ လှိုင်လှိုင်ထွက်ရှိလာပြီး ဈေးကွက်အတွင်း၌ ရောင်းအားကောင်းလျက်ရှိကြောင်းသိရသည်။
ကျိုက်မရောမြို့နယ်၊ နိတုံကျေးရွာအုပ်စု၊ ခြံကုန်းကျေးရွာတွင် ယိုးဒယားကိုင်းဆက်ဒူးရင်းသီးနှင့် ဗမာဒူးရင်းသီးမျိုးများ ခြံတိုင်း၌ စတင်ထွက်ရှိနေပြီး ဒူးရင်းသီးကြိုက်သူများက ခြံများအထိသွားရောက်ကာ ဝယ်ယူကြကြောင်း၊ ဒူးရင်းသီးကုန်သည်များအနေဖြင့်လည်း အပင်ကြွေဒူးရင်းသီးများကို အခြားမြို့များသို့ တင်ပို့ရောင်းချနိုင်ရန်အတွက် ခြံချုပ်ဝယ်ယူခြင်း၊ ကြိုတင်ငွေပေး၍ ဝယ်ယူခြင်းများဖြင့် ဝယ်လိုအားကောင်းလျက်ရှိသည်။ ခြံပိုင်ရှင်များအနေဖြင့် ယိုးဒယားကိုင်းဆက်ဒူးရင်းသီးတစ်လုံးလျှင် နှစ်သောင်းကျပ်မှ သုံးသောင်းကျပ်အထိဈေးကောင်းရကာ ဗမာဒူးရင်းသီးတစ်လုံးလျှင် တစ်သောင်းကျပ်မှ တစ်သောင်းခွဲကျပ်အထိဈေးရသဖြင့် ဒူးရင်းသီးခြံရှင်များ အဆင်ပြေလျက်ရှိကြောင်းသိရသည်။
ယခုရာသီတွင် အပူချိန်ပြင်းလွန်းသဖြင့် ဒူးရင်းသီးကို မြို့ခံများက ဈေးကြီးပေး၍ မစားကြသေးဘဲ မိုးတဖြိုက်ဖြိုက်ရွာပြီးမှသာ ဝယ်ယူစားသုံးကြကြောင်းလည်း ခြံကုန်းကျေးရွာမှ ဒူးရင်းသီးခြံရှင် ဦးစောအုန်းထံမှသိရသည်။ ဗမာဒူးရင်းသီးမျိုးတစ်ပင်လျှင် အလုံး ၂၀မှ အလုံး ၃၀ထိသီးလေ့ရှိသော်လည် ယခုနှစ်တွင်အပူရှိန်များလွန်းသဖြင့် အလုံးရေလျော့ပြီး တစ်ပင်လုံးကို ၁၀လုံးမှ ၈လုံးလောက်သာသီးကြောင်း၊ ဈေးကောင်းရနေသော်လည်း နေပူရှိန်ကြောင့် အသီးထွက်နှုန်းနည်းကြောင်း၊ ဗမာသီးကို အမှည့်/ ပင်ကြွေထိမထားပဲ ထိုးဒူးရင်းအဖြစ်သာ ဈေးကွက်၌ ရောင်းချနေကြကြောင်းလည်း ဒူးရင်းသီးကုန်သည် ဒေါ်စမ်းမော်ထံမှသိရှိရပါသည်။
DOCA(မွန်)