လေလွင့်ဆုံးရှုံးမှုနည်းပါးရန် ပဲစင်းငုံသိုလှောင်ရာတွင် လိုက်နာသင့်သည့် အချက်များ

          ပဲစင်းငုံသည် ရာသီအလိုက်ထွက်ရှိသော သီးနှံဖြစ်သော်လည်း တစ်နှစ်ပတ်လုံး စားသုံးလျက် ရှိကြရာ ပဲစင်းငုံသိုလှောင်ခြင်းသည် ရိတ်သိမ်းချိန်လွန်နည်းပညာ၏အရေးပါသောလက္ခဏာ အသွင်အပြင်တစ်ရပ်အနေဖြင့် တည်ရှိနေပေသည်။ သို့ပါ၍ ပဲစင်းငုံများကို တစ်နှစ်ပတ်လုံး ထောက်ပံ့တင်ပို့နိုင်မှုကို ထိန်းသိမ်းထားရှိရန်မှာ မှန်ကန်၍စနစ်ကျသော သိုလှောင်မှုတစ်ရပ် လိုအပ်ပါသည်။ ဤသို့ သိုလှောင်နိုင်ခြင်းဖြင့် သီးနှံ၏အရည်အသွေးပျက်စီးမှုမှ ကာကွယ်ပေး သည့်အပြင် ပုံမှန်ရောင်းလိုအားနှင့် ဝယ်လိုအားကိုဖြစ်စေခြင်းဖြင့် ဈေးနှုန်းတည်ငြိမ်မှုကို အထောက်အကူဖြစ်စေပါသည်။ သိုလှောင်ရာတွင် လေလွင့်ဆုံးရှုံးမှုများ၊ ပိုးမွှားကြွက်အဏုဇီဝ ရုပ်ကြွင်းတို့ကြောင့် ပျက်စီးမှုမှာအများဆုံးဖြစ်ပါသည်။ သိုလှောင်မှုဆိုင်ရာ အထောက်အကူ ဖြစ်စေမှုများ အားနည်းခြင်းသည် စိုက်ပျိုးသူလယ်သမားများကို ယင်းတို့၏သီးနှံများအား ရိတ်သိမ်းခူးဆွတ်ပြီးနောက်ပိုင်း နိမ့်သောဈေးနှုန်းဖြင့်ရောင်းချမှုပြုရန် တွန်းအားဖြစ်စေပါသည်။ သို့ပါ၍ ပဲစင်းငုံများကို သိုလှောင်ထားစဉ် ပိုးမွှားနှင့်မှိုကျရောက်မှုကြောင့် ပျက်စီးမှုများမဖြစ်စေ ရန်နှင့် ကိုက်ဖြတ်စားတတ်သော တိရိစ္ဆာန်များ၏ တိုက်ခိုက်ဖျက်ဆီးမှုမရှိစေဘဲ ကောင်းမွန် သောအခြေအနေတွင်ရှိနေစေရန်မှာ မရှိမဖြစ်လိုအပ်လျက်ရှိပါသည်။ ပဲစင်းငုံများကိုစိတ်ချစွာ သိုလှောင်ထားနိုင်ရန် အောက်ပါလိုအပ်ချက်များကို ပြီးပြည့်စုံအောင်ဆောင်ရွက်ထားရှိသင့် ပါသည်-

(က)    သိုလှောင်ရန်နေရာရွေးချယ်ခြင်း။             သိုလှောင်ရုံများကိုမြင့်၍ ရေစီးဆင်းမှု ကောင်းသောနေရာတွင် တည်ဆောက်သင့်သည်။ လွယ်ကူစွာသွားလာနိုင်သော နေရာဖြစ်သင့်သည်။ သိုလှောင်ရုံတည်ဆောက်မှုသည် နေရောင်ခြည်တိုက်ရိုက် ထိတွေ့ခြင်း၊ အပူဓါတ်များပြားခြင်း၊ စိုထိုင်းခြင်း၊ ပိုးမွှားများနှင့်ကိုက်ဖြတ် စားတတ်သောတိရစ္ဆာန်များအန္တရာယ်တို့မှ အကာအကွယ်ပေးနိုင်မှုရှိရပါမည်။ သိုလှောင်ရုံများသည် မြေမျက်နှာပြင်မှ အနည်းဆုံး ၁ပေမြင့်ပြီးကောင်းမွန်ခိုင်ခန့် စွာပြင်ညီတည်ဆောက်ထားသော အဆောက်အဦဖြစ်ရပါမည်။ သို့မှသာစွတ်စိုမှု မှကာကွယ်ပေးနိုင်ပါမည်။

 (ခ )   သိုလှောင်ရုံတည်ဆောက်မှုရွေးချယ်ခြင်း။            သိုလှောင်မည့်ပဲစင်းငုံပမာဏ အတိုင်း ဝင်ဆံ့နိုင်ရန် ရွေးချယ်သင့်ပါသည်။

(ဂ )    သိုလှောင်ရုံသန့်ရှင်းခြင်း။      ပဲစင်းငုံများ မသိုလှောင်မီအဆောက်အဦကို စနစ် တကျသန့်ရှင်းမှုပြုလုပ်သင့်သည်။ သိုလှောင်ရုံတွင် သီးနှံများကျန်ရှိခြင်း၊အပေါက် များ အက်ကွဲရာများမရှိစေရပါ။ ယင်းတို့သည် ပိုးမွှားများခိုလှုံရာအရပ်ဖြစ်စေသည့် သိုလှောင်မှုမပြုမီ သိုလှောင်ရုံအား ပိုးသတ်မှိုင်းတိုက်ခြင်း  ပြုလုပ်ပေးသင့် ပါသည်။

(ဃ)    ပဲစင်းငုံများကိုသန့်စင်ခြင်း အခြောက်ခံခြင်း။ သိုလှောင်မှုမပြုမီ ပဲစင်းငုံများကို စနစ်တကျမှန်ကန်စွာ သန့်စင်ခြင်း၊ အခြောက်ခံခြင်းတို့ကို ပြုလုပ်သင့်ပါသည်။ သီးနှံတွင် အခြားပစ္စည်းများပါရှိမှုမရှိစေရန်နှင့် အရည်အသွေးပျက်စီးခြင်း၊ ပိုးမွှားများ ကျရောက်ခြင်းတို့မှ ရှောင်ရှားနိုင်ရန် အစိုဓါတ်များပြားခြင်းမရှိစေရန် ဆောင်ရွက်ရပါမည်။

(င )    ထုပ်ပိုးအိတ်များသန့်စင်ခြင်း။ ပဲစင်းငုံသိုလှောင်ရာတွင် ဖြစ်နိုင်ပါက အိတ် အသစ်များကိုသာအသုံး ပြုသင့်ပါသည်။ အိတ်အဟောင်းများ အသုံးပြုလိုလျှင် ယင်းတို့ကို စနစ်တကျမှန်ကန် စွာသန့်စင်ခြင်း၊ အခြောက်ထားရှိခြင်းနှင့် ပိုးသတ်မှိုင်းတိုက်ခြင်းများကို အသုံး မပြုမီဆောင်ရွက်ထားရမည်။

(စ )    သီးနှံအသစ်အဟောင်းခွဲခြား၍ ပိုင်ပုံထားရှိခြင်း။           သီးနှံတွင်ပိုးကျရောက်မှုများကို စစ်ဆေးနိုင်ရန်နှင့် သိုလှောင်ရုံကို ကျန်းမာရေးနှင့်ညီညွတ်စွာထိန်းသိမ်းနိုင်ရန် သီးနှံအဟောင်းအသစ်ခွဲခြား၍ ပိုင်ပုံထားရှိသင့်ပါသည်။

(ဆ)    သယ်ယူပို့ဆောင်သည့်ယာဉ်များသန့်ရှင်းခြင်း။        ပဲစင်းငုံသယ်ယူပို့ဆောင်ရေး အတွက် အသုံးပြုမည့်ယာဉ်များကို ဗီနိုင်းဖြင့် စနစ်တကျမှန်ကန်စွာ သန့်ရှင်းစွာ ထားရှိသင့်သည်။

 (ဇ )   သီးနှံတင်ခုံများအသုံးပြုခြင်း။      ကြမ်းခင်းများမှ အစိုဓါတ်စုပ်ယူခြင်းမှ ရှောင်လွှဲ နိုင်ရန် သီးနှံအိတ်များကို ပိုင်ပုံခြင်းမပြုမီ သီးနှံတင်ခုံများ အသုံးပြုရပါမည်။ သီးနှံ အိတ်များကို သစ်သားခုံ(သို့မဟုတ်) ဝါးဖျာပေါ်တွင် ပေါ်လီသင်းအစ ဖုံးအုပ်ထား သည့်အပေါ်၌ထားရှိသင့်ပါသည်။

(ဈ)     လေဝင်လေထွက်မှန်ကန်စေခြင်း။            ရာသီဥတုကြည်လင်သာယာနေသော အခြေအနေတွင်  လေစီးဆင်းမှုကို စနစ်တကျမှန်ကန်စွာ ရှိနေသင့်သော်လည်း မိုးရာသီတွင် လေစီးဆင်းမှုမှ ရှောင်ရှားနိုင်ရန် ဂရုပြုဆောင်ရွက်သင့်ပါသည်။

(ည)    ပုံမှန်စစ်ဆေးခြင်း။     သိုလှောင်ထားသော ပဲစင်းငုံများကို ပိုးကျရောက်မှုရှိ/မရှိ ပုံမှန်စစ်ဆေးခြင်းကိုပြုလုပ်သင့်သည်။ ပိုင်ပုံကျန်းမာရေးနှင့်ညီညွတ်မှုရှိစေရေး အတွက် ထိန်းသိမ်းရန်မှာလည်း လိုအပ်ချက်တစ်ခုဖြစ်ပါသည်။

          ပဲစင်းငုံသီးနှံများ သိုလှောင်မည့် လုပ်ငန်းရှင်များအနေဖြင့် ဖော်ပြပါ လိုအပ်ချက်များကို သိရှိလိုက်နာခြင်းဖြင့် သီးနှံအရည်အသွေးများ ကျဆင်းခြင်း၊ ပိုးမွှားကျရောက်ခြင်း စသည့် မလို လားအပ်သော ဆုံးရှုံးမှုများမှ ကာကွယ်နိုင်မည်ဖြစ်ကြောင်း မျှဝေရေးသားလိုက်ရပါသည်။

DOCA(မန္တလေး)

• ကိုးကား-ရိတ်သိမ်းချိန်လွန်နည်းပညာအသုံးချဌာန