ရှမ်းပြည်နယ်(မြောက်ပိုင်း)၊ စားသုံးသူရေးရာဦးစီးဌာန၊ ကျောက်မဲခရိုင်ရှိ ဝန်ထမ်းများသည် ကျောက်မဲမြို့၊ (၇)ရပ်ကွက်၌ ထုတ်လုပ်/ဖြန့်ဖြူး/ရောင်းချလျက်ရှိသည့် အိမ်တွင်းမှုစားသောက်ကုန်လုပ်ငန်းဖြစ်သော “သင်းရနံ့”အမှတ်တံဆိပ်၏ကုန်စည်အား (၃.၃.၂၀၂၂)ရက်နေ့တွင် သွားရောက်၍ ကုန်ကြမ်းမှတစ်ဆင့် ကုန်ချောအဖြစ် ထုတ်လုပ်နေမှုများကို ကွင်းဆင်းလေ့လာစစ်ဆေးခဲ့ကြကြောင်း၊ ယင်းသို့စစ်ဆေးခဲ့ရာတွင် ကုန်ကြမ်းပစ္စည်းဖြစ်သော အာလူးကို အောင်ပန်းမြို့မှ တိုက်ရိုက်မှာယူခြင်းဖြစ်ကြောင်း၊ အောင်ပန်းမှအာလူးသည် ယခုလက်ရှိ ဝယ်ဈေးနှုန်းမှာ ပိဿာချိန်(၃၀) ပါ တစ်အိတ်လျှင် သယ်ယူစရိတ်အပါအဝင်(၈၀၀၀ဝိ/-)ကျော်ခန့်ရှိကြောင်း သိရှိရပါသည်။
ကုန်ချောအဖြစ် ပြန်လည်ထုတ်လုပ်ရာတွင် အာလူးများကို ညီညာအောင်စက်ဖြင့် လှီးဖြတ်၍ ရရှိလာသောအာလူးအဖတ်များကို ဓါတုဆေးဝါးများအသုံးပြုခြင်းမရှိဘဲ သဘာဝရေအေးအေးဖြင့် သုံးကြိမ်ခန့်ဆေးပြီးလျှင် ဆား၊ ငြုပ်သီးမှုန့်၊ ဟင်းခတ်မှုန့်များနှင့် သမအောင်(နယ်/မွှေ)၍ ကြော်ရကြောင်း၊ ထိုသို့ အာလူးများကိုကြော်ရာတွင် ဟင်းသီးဟင်းရွက်ဆီ တမျိုးတည်းကိုသာ အသုံးပြုကြောင်းသိရပါသည်။
အာလူးပိဿာချိန်(၃၀)ပါတစ်အိတ်လျှင် ကုန်ချောအဖြစ် ထုပ်ပိုးပြီးသောအထုပ်(၂၅၀)ထုပ်ခန့်ရရှိပြီး တစ်ထုပ်လျှင်ဖောက်သည်ဈေး ၄၀၀ကျပ်ဖြင့် ဖြန့်ဖြူးရောင်းချကြောင်း၊ တစ်ရက်လျှင်ပိဿာချိန် ခြောက်ဆယ်မျှသာ ထုတ်လုပ်နိုင်ကြောင်းနှင့် မြို့တွင်းဈေးကွက်သာရှိကြောင်းသိရှိရပါသည်။
ထို “သင်းရနံ့”အမှတ်တံဆိပ်အာလူးကြော်လုပ်ငန်းရှင်အား ဌာနမှထုတ်ပြန်ထားသည့် စားသုံးသူကာကွယ်ရေးဥပဒေပါ အကြောင်းအရာများကို အသိပညာပေးဆွေးနွေးခဲ့ကြကြောင်းနှင့် ထုတ်ကုန်လုံခြုံ စိတ်ချရမှုရှိစေရန် စီးပွားရေးလုပ်ငန်းရှင်များမှ လိုက်နာရန်လိုအပ်သည့် အချက်များအား သိရှိဆောင်ရွက်နိုင်စေရန် ဆွေးနွေးမှုများပြုလုပ်ခဲ့ကြောင်း သတင်းရရှိပါသည်။
DOCA(ရှမ်း)