စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်ဦးစီးမှူးရုံး၊ ခရိုင်ဦးစီးမှူး၏ လမ်းညွှန်ချက်ဖြင့် ဦးစီးအရာရှိနှင့် ဝန်ထမ်းများသည် (၂၆.၂.၂၀၂၂) ရက်နေ့ နံနက် (၁၀၀၀) အချိန်တွင် ရမည်းသင်းမြို့နယ်၊ ရွာတန်းဒေသ၊ စပျစ်စိုက်တောင်သူနှင့် သွားရောက် တွေ့ဆုံခဲ့ပါသည်။
ထိုသို့ တွေ့ဆုံမေးမြန်းခဲ့ရာတွင် ရမည်းသင်းမြို့နယ်၊ ရွာတန်းဒေသသည် စပျစ်စိုက်ပျိုးသော ကျေးရွာဖြစ်သည့်အလျှောက် စပျစ်စိုက်ပျိုးသူအသင်းဖွဲ့စည်းထားကြောင်း၊ အသင်းတွင်အဖွဲ့ဝင် (၈၀) ဦးဖြင့် ဖွဲ့စည်းထားကြောင်း သိရှိရပါသည်။ စပျစ်စိုက်ပျိုးရာတွင် နှစ်ရှည်သီးနှံဖြစ်သည့်အတွက် စိုက်ပျိုးရန်မြေယာ ငှားရမ်းခြင်းမရှိဘဲ (၅) နှစ်၊ (၃၀)နှစ် ထိ သက်တမ်းရှိသော သီးနှံဖြစ်၍ ကိုယ်ပိုင်မြေပေါ်တွင်သာ စိုက်ပျိုးရန် အဆင်ပြေသောသီးနှံဖြစ်ပါသည်။ စတင်စိုက်ပျိုးပါက ကုန်ကျစရိတ်အလွန်များပြီး စိုက်ပျိုးပြီးပါက နှစ်ရှည်သီးနှံဖြစ်သည့်အတွက် အဆင်ပြေကြောင်း၊ စိုက်ပျိုးရာတွင် စိုက်ပျိုးနည်းအမျိုးမျိုးရှိသော်လည်း ယခုဒေသသည် လေးကွက်ချစိုက်နည်းနှင့် တစ်ဖက်တန်းစိုက်နည်းကို အသုံးပြုကြကြောင်း၊ တစ်ဖက်တန်းစိုက်နည်းသည် အပင်ကြား (၄)ပေ၊ အတန်းကြား(၈) ပေဖြစ်ပြီး (၁)ဧကလျှင် (၁၂၅၀) ပင်စိုက်ပျိုးနိုင်ကြောင်း၊ အတန်းကြားကျယ်ပေးထား သည့်အတွက် စိုက်ခင်းအတွင်းလေဝင်လေထွက်ကောင်းမွန်ကာ မိုးများသောဒေသများအတွက် စိုက်ခင်းမြေဆီလွှာနှင့် စပျစ်ပင်အညွှန့်အရွက်များကို လေနှင့်ရောင်ခြည်ထိတွေ့မှုများစေကာ ခြောက်သွေ့မြန်စေပြီး စပျစ်ပင်အတွက် စွတ်စိုမှုများချိန်ကျရောက်ဖြစ်ပွားတတ်သည့် မှိုနှင့်ဘက်တီးရီးယားရောဂါများကို ကြိုတင်ကာကွယ်ရာရောက်ကြောင်း၊ စိုက်ပျိုးသည့် အမျိုးအစားမှာ RG (ပန်းရောင်)၊ ညို (ရိုးရိုး)၊ BQ နှင့် အစေ့လွှတ်ပျိုးပင်များစိုက်ပျိုးကြကြောင်း၊ စိုက်ပျိုးသည့်ကာလ ကိုင်းခွဲချိန်တွင် စပျစ်တစ်ဧက (P205-46%) 50kg နှစ်အိတ်နှင့် NPK-15 ပတ်လည်တစ်အိတ်နှုန်းရော၍ ကျွေးရကြောင်း၊ ထိုသို့ ကျွေးခြင်းအားဖြင့် အဖူးအသီး အောင်မြင်မှုများစေခြင်း၊ အပင်တစ်ပင်လျှင် (၆) ပိဿာ မှ (၇) ပိဿာထိ ထွက်ရှိကြောင်း၊စပျစ် RG (၁ ပိဿာ) ၃၅၀၀ ကျပ်၊ BQ (၁ ပိဿာ) ၃၅၀၀ ကျပ်၊ အစေ့လွတ် (၁ ပိဿာ) ၄၀၀၀ ကျပ်ရှိကြောင်းနှင့် ရန်ကုန်၊ မန္တလေးနှင့် အခြားမြို့များသို့ တင်ပို့ရောင်းချကြောင်း သိရှိရပါသည်။
DOCA(မန္တလေး)