အထွက်နှုန်းမြင့်မားသောကောက်ပဲသီးနှံစီမံကိန်း ဆောင်ရွက်လျှက်ရှိခြင်း
ဩစတြေးလျနိုင်ငံအရှေ့တောင်ပိုင်းရှိ ကောက်ပဲသီးနှံစိုက် တောင်သူများသည် နိုင်ငံအဆင့် ပျမ်းမျှစိုက်ပျိုးမှုထက် ငါးဆခန့်ရှိသော ဂျုံသီးနှံအမြောက်အများကို စိုက်ပျိုးသည့်အလေ့အထရှိပြီး မကြာသေးမီနှစ်များအတွင်း ဂျုံသီးနှံ အထွက်နှုန်းမှာ သိသာစွာ မြင့်တက်လာခဲ့ကြောင်း၊ တောင်ပိုင်း ဩစတြေးလျပြည်နယ် Rendelsham တွင် ဂျုံအထွက်နှုန်းမှာ တစ်ဧကလျှင် ၁၁.၇ တန် ရရှိနေပြီး ယင်းသို့အထွက်နှုန်းမြင့်တက်ရခြင်း၏ အဓိကအကြောင်းရင်းမှာ အထွက်နှုန်းမြင့်မားသော ကောက် ပဲသီးနှံစီမံကိန်း၏ ပံ့ပိုးမှုကြောင့်ဖြစ်ကြောင်း၊ ကောက်ပဲသီးနှံသုတေသနနှင့် ဖွံ့ဖြိုးတိုးတက်မှု ကော်ပိုရေးရှင်း၏ ရန်ပုံငွေဖြင့် သုတေသနပြုထားသည့်နေရာသည် မိုးရွာသွန်းမှုမြင့်မားသောဒေသ များ၏ အလားအလာကို အမြင့်ဆုံးဖြစ်စေရန်ရည်ရွယ်ကြောင်း၊ စီမံကိန်းဉီးဆောင်သူ၏ ပြောကြား ချက်အရ ဒေသအတွင်း အထွက်နှုန်းအများဆုံး၊ ဈေးအသက်သာဆုံး၊ ရေရှည်တည်တံ့မှုအရှိဆုံး စိုက် ပျိုးနိုင်သောမျိုးစိတ်များကိုရှာဖွေရန် ဂျုံနှင့်မုယောစပါးစမ်းသပ်စိုက်ပျိုးထားသည့်အကွက် (၁၀၀၀) ခန့်ရှိကြောင်း၊စီမံကိန်း၏ ဉီးစားပေးလုပ်ဆောင်ရမည့်အချက်မှာ အအေးပို၍ စိုစွတ်သောရာသီဥတု နှင့်လိုက်ဖက်သောမျိုးကွဲများကိုရှာဖွေရန်ဖြစ်ပြီးကုန်ကျစရိတ်လျှော့ချခြင်းသည်လည်း အထွက်နှုန်း မြင့်မားသော သီးနှံစီမံကိန်း၏ ဉီးစားပေးလုပ်ငန်းတစ်ခုဖြစ်ကြောင်း၊ကောက်ပဲသီးနှံစိုက်ပျိုးသူများ အမှန်တကယ်လိုအပ်သော အထွက်နှုန်းမြင့်မားခြင်း၊ ရောဂါခံနိုင်ရည်ရှိရုံသာမက ရေရှည်ရပ်တည် နိုင်စွမ်းတို့ကို ယခုဆောင်ရွက်လျှက်ရှိသော “အထွက်နှုန်းမြင့်မားသော ကောက်ပဲသီးနှံစီမံကိန်း”မှ ရရှိရန်မျှော်မှန်းထားကြောင်းသိရှိရပါသည်။
အမျိုးသားအမှတ်တံဆိပ်အသစ်နှင့်စာတန်း ကမ္ဘာသို့မြှင့်တင်ပေးမည့်ဩစတြေးလျ
ရင်းနှီးမြှုပ်နှံမှုနှင့်ခရီးသွားဧည့်သည်များကို ပိုမိုဆွဲဆောင်နိုင်ရန်၊ ဩစတြေးလျနိုင်ငံ၏ ကုန် စည်နှင့် ဝန်ဆောင်မှုများကို နိုင်ငံရပ်ခြားတွင် ပိုမိုမြှင့်တင်နိုင်ရန်အတွက် အမျိုးသားအမှတ်တံဆိပ်အသစ် နှင့်စာတန်းအောက်တွင်ဈေးကွက်ရှာဖွေရေးရင်းမြစ် ၃၀၀ ကျော်ကို ဩစတြေးလျစီးပွားရေးလုပ်ငန်း များအတွက် အခမဲ့ရရှိနိုင်မည်ဖြစ်သည်ဟု ကုန်သွယ်ရေးဝန်ကြီးဌာနကသတင်းထုတ်ပြန်ထားကြောင်း၊ ဖေဖော်ဝါရီလအတွင်းထုတ်ပြန်ခဲ့သည့် ဩစတြေးလျနိုင်ငံ၏ အမျိုးသားအမှတ်တံဆိပ်နှင့် Tagline သည် ယှဉ်ပြိုင်နိုင်သောနိုင်ငံတကာဈေးကွက်တွင် ဩစတြေးလျနိုင်ငံ၏ အရည်အသွေးမြင့်ကုန်စည် များနှင့်ဝန်ဆောင်မှုများ၏ ဂုဏ်သတင်းကိုချဲ့ထွင်ရန်နှင့်ကြီးထွားစေရန် ကူညီပေးမည်ဖြစ်ကြောင်း၊ စီးပွားရေးလုပ်ငန်းများနှင့်စက်မှုလုပ်ငန်းသည် ဩစတြေးလျကိုကိုယ်စားပြုရန်အတွက် ခိုင်မာပြီး တသမတ်တည်းရှိသော နိုင်ငံအမှတ်တံဆိပ်ကိုအလိုရှိသဖြင့် အမျိုးသားအမှတ်တံဆိပ်နှင့် Tagline ကိုတီထွင်ခဲ့ခြင်းဖြစ်ကြောင်း၊ ဗဟိုအစိုးရ၊ ပြည်နယ်နှင့်နယ်မြေအစိုးရများအပြင် အကြီးတန်းစက်မှု လုပ်ငန်းကိုယ်စားလှယ် ၄၈၀ ကျော်သည် အမှတ်တံဆိပ်ဖွံ့ဖြိုးတိုးတက်မှုတစ်လျှောက်လုံး ဆွေးနွေး တိုင်ပင်ခဲ့ကြပြီး ဩစတြေးလျနှင့်နိုင်ငံရပ်ခြားရှိ လူပေါင်း ၂၂၀၀၀ ကျော်သည် ဈေးကွက်စမ်းသပ်မှု တွင်ပါဝင်ခဲ့ကြကြောင်း၊ သုတေသနပြုချက်အရ ဤ logo သည်ခေတ်မီပြီး စွမ်းရည်ပြည့်ဝသော နိုင်ငံတစ်ခု၏ ကိုယ်စားပြုအဖြစ်သတ်မှတ်ခံထားရသည်အပြင် စီးပွားရေးနှင့်စက်မှုလုပ်ငန်း၏ ကျောထောက်နောက်ခံပါရှိကြောင်းနှင့် logo နှင့်တွဲဖက်အသုံးပြုနိုင်သည့် Only in Australia ဟူ သောစာတန်းဖြင့်ဖြည့်စွက်ထားကြောင်း၊ကုန်သွယ်ရေး၊ခရီးသွားလုပ်ငန်းနှင့်ရင်းနှီးမြှုပ်နှံမှုဝန်ကြီးက ခိုင်မာသောအမှတ်တံဆိပ်တစ်ခုသည် ဩစတြေးလျ စီးပွားရေးလုပ်ငန်းများအားလုံး ယင်းတို့၏ ထုတ်ကုန်များကိုရောင်းချစေနိုင်ရန်၊ ဒေသတွင်းအလုပ်အကိုင်များနှင့် စီးပွားရေးကို ပံ့ပိုးကူညီမည် ဖြစ်သည်ဟုပြောကြားခဲ့ကြောင်း၊ အမှတ်တံဆိပ်အကြံပေးကောင်စီဥက္ကဋ္ဌက ခိုင်မာသောအမျိုးသား အမှတ်တံဆိပ်သည် တန်ဖိုးကြီးသောပိုင်ဆိုင်မှုတစ်ခုဖြစ်ပြီးပြည်တွင်းရင်းနှီးမြှုပ်နှံမှုကိုဆွဲဆောင်ကာ ပို့ကုန်အတွက် တန်ဖိုးတိုးစေပြီး ခရီးသွားများနှင့်ကျွမ်းကျင်သောရွှေ့ပြောင်းလုပ်သားများကို သယ် ဆောင်လာနိုင်စေမည်ဖြစ်ကြောင်း၊ ယှဉ်ပြိုင်နိုင်စွမ်းရှိသော နိုင်ငံတကာဈေးကွက်တွင် ထူးခြားသော ဩစတြေးလျဇာတ်ကောင်ကိုစုစည်းပြီး ခိုင်မာသောအမျိုးသားအမှတ်တံဆိပ်ဖြင့်ထုပ်ပိုးခြင်း နှင့် Only in Australia ဟူသောစာတန်းသည် အရည်အသွေး၊တီထွင်ဖန်တီးမှုနှင့် ဆန်းသစ်တီထွင်မှု တို့အတွက် ဩစတြေးလျ၏ ဂုဏ်သတင်းကို ချဲ့ထွင်စေနိုင်မည်ဟုလည်းပြောကြားခဲ့ကြောင်း သိရှိ ရပါသည်။
(ရင်းမြစ်- ကင်ဘာရာမြို့စီးပွားရေးသံမှူးပေးပို့သည့်သတင်း)
စင်ကာပူနှင့်ဗီယက်နမ် နားလည်မှုစာချွန်လွှာရေးထိုးခြင်း
စင်ကာပူနှင့်ဗီယက်နမ်နိုင်ငံအကြား စီးပွားရေးနှင့်ကုန်သွယ်ရေဆိုင်ရာပူးပေါင်းဆောင်ရွက်မှု များ ခိုင်မာအားကောင်းလာစေရန်အတွက် စီးပွားရေးနှင့်ကုန်သွယ်ရေးပူးပေါင်းဆောင်ရွက်မှုဆိုင်ရာ နားလည်မှုစာချွန်လွှာ(MoU)ကို ၂၅-၂-၂၀၂၂ ရက်နေ့တွင် လက်မှတ်ရေးထိုးခဲ့ကြောင်း၊ အဆိုပါ နား လည်မှုစာချွန်လွှာကို စင်ကာပူနိုင်ငံ၊ ကုန်သွယ်ရေးနှင့်စက်မှုဝန်ကြီးဌာနနှင့် ဗီယက်နမ်နိုင်ငံ၊ စက်မှု နှင့်ကုန်သွယ်ရေးဝန်ကြီးဌာန ဝန်ကြီး(၂)ဉီးတို့က လက်မှတ်ရေးထိုးခဲ့ကြပြီး စင်ကာပူနိုင်ငံသို့ နိုင်ငံ တော်အဆင့်ခရီးစဉ်အဖြစ်ရောက်ရှိလာသော ဗီယက်နမ်နိုင်ငံသမ္မတနှင့် စင်ကာပူနိုင်ငံဝန်ကြီးချုပ် တို့က အသိသက်သေများအဖြစ် ပါဝင်လက်မှတ်ရေးထိုးခဲ့ကြကြောင်း၊ MoU ဖြင့် စီးပွားရေးလုပ်ငန်း များ၏ ပူးပေါင်းဆောင်ရွက်မှုများကို လွယ်ကူချောမွေ့စေရေး၊ ဒီဂျစ်တယ်စီးပွားရေးဆိုင်ရာ ပူးပေါင်း ဆောင်ရွက်သွားနိုင်မည့်ကိစ္စရပ်များအားစူးစမ်းရှာဖွေရေး၊ဒေသတွင်းနှင့်ကမ္ဘာလုံးဆိုင်ရာ ထုတ်လုပ် ဖြန့်ဖြူးရေးကွင်းဆက်ချိတ်ဆက်မှုအပေါ် အထောက်အကူပြုရေး စသည့်လုပ်ငန်းများကိုဆောင်ရွက် သွားကြမည်ဖြစ်ကြောင်း၊ MoU သည် လယ်ယာစိုက်ပျိုးရေးကဏ္ဍတွင် အကောင်းဆုံးသော အလေ့ အကျင့်များ၊အသိအမှတ်ပြုလက်မှတ်နှင့် စံချိန်စံညွှန်းများဆိုင်ရာ သင်တန်းပေးခြင်း၊ သတင်းအချက် အလက်မျှဝေခြင်းနှင့် ပူးပေါင်းဆောင်ရွက်နိုင်သည့်အခွင့်အလမ်းများရှာဖွေခြင်းတို့အား ပံ့ပိုးပေးမည် ဖြစ်၍ လယ်ယာထွက်ကုန်ပစ္စည်းများ ကုန်သွယ်မှုနှင့်ပတ်သက်သည့် နှစ်နိုင်ငံပူးပေါင်းဆောင်ရွက်မှု ကို နက်ရှိုင်းစွာဆောင်ရွက်လာစေနိုင်မည်ဖြစ်သည့်အပြင် စက်မှုနှင့်စွမ်းအင်ကဏ္ဍများတွင် ပူးပေါင်း ဆောင်ရွက်မှုကို တိုးမြှင့်လုပ်ဆောင်ရန်နှင့် နှစ်နိုင်ငံရှိ SMEs များအကြား ပိုမိုပူးပေါင်းဆောင်ရွက် လာနိုင်စေရန်ရည်ရွယ်ကြောင်း၊ နှစ်နိုင်ငံကုန်သွယ်မှုနှင့် ရင်းနှီးမြှုပ်နှံမှု စီးဝင်/စီးထွက်မှုများကို ပိုမို နက်ရှိုင်းလာစေရန်နှစ်ဖက်အကျိုးဖြစ်ထွန်းမည့်စီးပွားရေးနယ်ပယ်များတွင် စွမ်းဆောင်ရည်မြှင့်တင် ရေးလုပ်ငန်းများကို စူးစမ်းလေ့လာသွားကြမည်ဖြစ်ကြောင်းသိရှိရပါသည်။
(ရင်းမြစ်- စင်ကာပူမြို့စီးပွားရေးသံမှူးပေးပို့သည့်သတင်း)
အဝတ်အထည်ချုပ်လုပ်သည့်လုပ်ငန်းအားခြိမ်းခြောက်နေသည့် တရားမဝင် ချုပ်ပြီးအထည်များတင်သွင်းမှု
တောင်အာဖရိကနိုင်ငံ၏ အဝတ်အထည်ချုပ်လုပ်ငန်းသည် ကိုဗစ်ရောဂါကူးစက်ပြန့်ပွားမှု ကြောင့် ထိခိုက်လျှက်ရှိပြီး Lockdown ကန့်သတ်ချက်များနှင့် ထုတ်လုပ်မှုကွင်းဆက်တစ်လျှောက် အခက်အခဲများကြောင့် နိုင်ငံအတွင်းရှိ အထည်အလိပ်လုပ်ငန်း တန်ဖိုးမြှင့်ကွင်းဆက်တစ်လျှောက် ကုမ္ပဏီများအား များစွာထိခိုက်ခဲ့သော်လည်း နယ်စပ်ဂိတ်များပိတ်ပင်မှုကြောင့် ပြည်တွင်းကုမ္ပဏီ များသည် ပြည်ပမှတင်သွင်းလာသောကုန်ကြမ်းများအပေါ် မှီခိုရခြင်းထက် ပြည်တွင်းမှရရှိသော ကုန်ကြမ်းပစ္စည်းများကို ပိုမိုဝယ်ယူအသုံးပြုလာရသည့်အခြေအနေရှိခဲ့ကြောင်း၊ မကြာသေးမီက အကောင်အထည်ဖော်ခဲ့သော အဝတ်အထည်နှင့် အထည်အလိပ်လုပ်ငန်း masterplan အရ ပြည် တွင်းရှိ အဓိက အဝတ်အထည်လက်လီရောင်းချသူများအနေဖြင့် ၎င်းတို့၏အရောင်းဆိုင်များတွင် ပြည်တွင်း၌ချုပ်လုပ်သည့် အဝတ်အထည်များကို ၅၀% အထိ ဝယ်ယူရောင်းချရန်နှင့် ၂၀၃၀ ပြည့် နှစ်မတိုင်မီ ၆၅% အထိ ဝယ်ယူရောင်းချရန် ကတိကဝတ်ပြုထားကြောင်း၊ လက်ရှိတွင် စီးပွားရေး ကျဆင်းမှုသည် အဝတ်အထည်ကုန်သွယ်မှုကို များစွာထိခိုက်ပြီး စားသုံးသူများ၏ ဝယ်ယူနိုင်မှုကို အကန့်အသတ်ဖြစ်စေခဲ့ကြောင်း၊ တောင်အာဖရိကနိုင်ငံအတွင်း ၂၀၂၀ ပြည့်နှစ်၊ မတ်လ၂၇ ရက်နေ့ မှစတင်၍စားသုံးသူများ ဈေးဆိုင်များတွင်ကိုယ်တိုင်ဝယ်ယူနိုင်ရေးကန့်သတ်မှုများရှိခဲ့သည့်အတွက် Online မှတစ်ဆင့်လက်လီရောင်းချမှုများ တစ်ရှိန်ထိုးမြင့်တက်ခဲ့သဖြင့် လက်လီရောင်းချသည့် ဆိုင် အသစ်များ အနည်းငယ်သာဖွင့်လှစ်နိုင်ခဲ့ကြောင်း၊ ထို့အပြင် တောင်အာဖရိကနိုင်ငံ အဝတ်အထည် လုပ်ငန်းဖွံ့ဖြိုးတိုးတက်မှုအတွက် နာမည်ကြီး အဝတ်အထည်အတုအပထုတ်လုပ်မှုနှင့် တရားမဝင် တင်သွင်းနေမှုသည် ခြိမ်းခြောက်မှုကြီးတစ်ခုဖြစ်နေပြီး ထိုသို့အကောက်ခွန်ပေးဆောင်မှုကို ကျော် လွှားခြင်းနှင့်အမှန်တင်သွင်းမှုဖော်ပြဆောင်ရွက်ခြင်းမရှိခြင်းတို့မှာ အကောက်ခွန်ဌာနမှအဂတိလိုက် စားသည့်အရာရှိများကပါဝင်ကူညီဆောင်ရွက်ပေးနေသဖြင့်ဖြစ်ပေါ်လျှက်ရှိကြောင်းသိရှိရပါသည်။
(ရင်းမြစ်-ပရီတိုးရီးယားမြို့ စီးပွားရေးသံမှူးပေးပို့သည့်သတင်း)