ပဲခူးတိုင်းဒေသကြီး၊ စားသုံးသူရေးရာဦးစီးဌာန၊ သာယာဝတီခရိုင် ဒု-ခရိုင်ဦးစီးမှူး ဦးသန်းစိုး၊ သတင်းနည်းဌာနခွဲတာဝန်ခံ ဒေါ်ကြည်ကြည်ချိုတို့သည် သာယာဝတီခရိုင်၊ လက်ပံတန်းမြို့နယ် နဘဲကွင်းအုပ်စု ၊ နဘဲကွင်းကျေးရွာ ကွင်းအမှတ်(၁၃၉၄) ၊ပဲတီစိမ်း(၁၁)ဧက(ပဲနောက်စိမ်းအမျိုးအစား) ၊ စိုက်ပျိုးထားရှိသော တောင်သူဦးဇော်မျိုးသန်း ၏ စိုက်ခင်းသို့ (၄.၃.၂၀၂၂) ရက်နေ့နံနက် (၉:၃၀)အချိန်တွင် ငါးအမိုင်နိုအက်စစ်ဖော်စပ်သုံးစွဲထားရှိသောပဲတီစိမ်း စိုက်ခင်းစိုက်ပျိုးထားရှိမှု အခြေအနေများကို သွားရောက်ကွင်းဆင်းလေ့လာခဲ့ပါသည်။
တောင်သူဦးဇော်မျိုးသန်းမှ ပြောကြားရာတွင် ယခုနှစ်မှစတင်၍ ငါးအမိုင်နိုအက်စစ်ကိုစတင် အသုံးပြုခြင်းဖြစ်ကြောင်းနှင့် ထုတ်လုပ်ဖော်စပ်ပုံအဆင့်ဆင့်မှာ အရိုးပါသောငါးကလေးများ(ငါးခုံးမ၊ ငါးဘဲ)အစရှိသော ငါးတစ်ပိဿာနှင့် ထန်းညက်တစ်ပိဿာတို့ ဆတူရောစပ်ဖော်စပ်ရသည်။ ရှေးဦးစွာ ငါးကလေးများကို ရေစင်ကြယ်အောင် ဆေးကြောပြီး စစ်ထားပါ၊ ထန်းညက်တစ်ပိဿာကို အရည်ကျိုပြီး အအေးခံထားပါ၊ ထို့နောက်လေလုံသော အိုးထဲသို့နှစ်မျိုးစလုံးရောစပ်ပြီးထည့်ပါ၊ (၅)ရက်ကြာလျှင် အဖုံးဖွင့်ပြီး မွှေပါ၊ အပုပ်နံ့ထွက်နေပါက ထန်းညက် အနည်းငယ်ထပ်ထည့်ပါ၊ (၇)ရက်ကြာလျှင် ဖွင့်ပြီး နမ်းကြည့်ပါ၊ မွှေးနေလျှင် ဖော်စပ်မှုအောင်မြင်ပါပြီ၊ (၁၅)ရက်ပြည့်ပြီး နောက်ပိုင်းတွင် ဆေးစတင်သုံးစွဲ၍ရပြီး လယ် (၃၀)ဧကတွင် တစ်ကြိမ်သုံးစွဲနိုင်သဖြင့် ၎င်းတောင်သူမှာ တစ်ကြိမ်ဖော်စပ်ထားပါက (၃)ကြိမ် ပက်ဖျန်း၍ရပြီး ဆေးသုံးစွဲရန် အညွှန်းမှာ (၂၀)လီတာဆေးဖျန်းပုံးထဲသို့ (၄၀)စီစီ (သို့) စတီးဇွန်း(၄)ဇွန်းထည့်ပြီး ပက်ဖျန်းရပါသည်။ ဤဆေးပက်ဖျန်းခြင်းဖြင့် အပင်အတွက် အားဆေးလည်းဖြစ်၊ မှိုရောဂါကျရောက်မှုကိုလည်း ကာကွယ်ပြီးဖြစ်၍ ပိုးမွှာကင်းရှင်းသက်သာစေပါသည်။ ထိုငါးအမိုင်နိုအက်စစ်အနံအား ပိုးမွှားများ မကြိုက်ကြသဖြင့် ပိုးကျခြင်းနည်းရကြောင်းသိရပါသည်။ ယခု စိုက်ပျိုးထားသော ပဲတီစိမ်းစိုက်ခင်း သွင်းအားစုသုံးစွဲမှုမှာ မျိုးတစ်တင်းလျှင်(၄၀၀၀၀)ကျပ်နှုန်းဖြင့် (၁/၂)တင်း၊ အပင်(၂၀) ရက်သားတွင် စျေးနည်းသောရွှေတောင်သူအပင်အားဆေးနှစ်ဗူးတွဲ တစ်စုံလျှင် (၁၅၀၀၀/)ကျပ် နှုန်းဖြင့် (၅)စုံ သုံးစွဲခဲ့ကြောင်းသိရှိရပါသည်။
ဤသို့သုံးစွဲရခြင်းမှာ ဆေး၏အာနိသင်အား မသိရှိခဲ့၍ ဝယ်ယူသုံးစွဲခြင်းဖြစ်ကြောင်း တောင်သူမှ ပြောကြားခဲ့ပါသည်။ ပဲတီစိမ်းစိုက်ခင်းများထဲတွင် နေကြာပင်များအား သီးညှပ်စိုက်ပျိုးထားရှိသည်ကို တွေ့ရှိရပြီး တောင်သူမှ ၎င်းစိုက်ပျိုးထားသောစိုက်ခင်းနှင့် အခြားစိုက်ခင်းများအား ယှဉ်တွဲကြည့်ရန် ပြောကြားလာသဖြင့် ပဲပင်များခြားနားစွာ ကောင်းမွန်နေကြောင်း လေ့လာတွေ့ရှိရပါသည်။ တောင်သူများ အနေဖြင့်ငါးအမိုင်နိုအက်စစ် ဖော်စပ်သုံးစွဲခြင်းဖြင့် သွင်းအားစုသုံးစွဲမှု လျော့ချနိုင်ခြင်း၊ ငွေကြေးကုန်ကျမှု သက်သာစေခြင်းတို့ကြောင့် တောင်သူများ လေ့လာသုံးစွဲသင့်ကြောင်းသိရှိရသည်။
DOCA(ပဲခူး)