မန္တလေးတိုင်းဒေသကြီး၊ ကျောက်ဆည်ခရိုင် မြစ်သားမြို့နယ် ၊ မှိုင်းဟင်ကျေးရွာတွင် ယခင်ဘိုးဘွားများလက်ထပ်ကတည်းက ဝါးနှီးဖျာများကို ယက်လုပ်၍ အသက်မွေးဝမ်းကြောင်းပြုကြကြောင်း သိရှိရပါသည်။ဝါးအမျိုးအစား အမျိုးမျိုးရှိသော်လည်း ဝါးနှီးဖျာယက်လုပ်ရန်အတွက် မျှင်ဝါး ကိုသာအသုံးပြုပါသည်။ ဝါးနှီးဖျာယက်လုပ်ရာတွင် နှီးအကြောဖျာ ၊ နှီးအောက်ဖျာ ၊ နှီးသားဖျာ ဟူ၍(၃)မျိုး ယက်လုပ်နိုင်ကြောင်း၊ ဝါး(၁၅)လုံး နှီးနွှာပြီး ယက်လုပ်ရာတွင် နှီးကြောဖျာ(၁)ချပ်နှင့် နှီးအောက်ဖျာ(၂)ချပ်ရရှိကြောင်း၊ နှီးအကြောဖျာမှာ ဝါး၏နှီးကြောလေးများဖြင့်သာ ယက်လုပ်သဖြင့် ဝါးအလုံးရေပိုမိုကုန်ကျကြောင်း၊ထိုဝါးများမှပိုသောနှီးများကို နှီးအောက်ဖျာအဖြစ်ပြန်လည်ယက်လုပ်ကြပါကြောင်း၊ နှီးအောက်ဖျာမှာ အကွက်စိတ်စိတ်ယက်လုပ်ထားသဖြင့် နှမ်းလှန်းဖျာအဖြစ်ပင် အသုံးပြု၍ရကြောင်း ၊ နှစ်ယောက်အိပ်နှီးသားဖျာ(၁)ချပ် ယက်လုပ်ရာတွင် ဝါး(၃)လုံးခန့်ကုန်ကြ ကြောင်း၊မျှင်ဝါးတစ်လုံးလျှင်(၈၀၀)ကျပ်ခန့်ရှိပြီးဝါးတစ်လုံးကို နှီးဖျာခ(၄၀၀)ကျပ်ရှိကြောင်း၊ ဖျာများကိုကိုယ်တိုင်လဲယက်လုပ်သလို လက်ခစားပေး၍လည်း ယက်လုပ်ကြပါသည်။နှီးအကြောဖျာတစ်ချပ်လျှင် ယက်ခလုပ်သားခ(၁၀၀၀)ကျပ် ၊ နှီးအောက်ဖျာတစ်ချပ်လျှင် (၁၅၀၀)ကျပ်၊ နှီးသားဖျာတစ်ချပ် လျှင်(၇၀၀)ကျပ်ပေးရကြောင်း ၊ လူတစ်ဦး (၁)ရက်လျှင် ဖျာ(၃)ချပ် မှ (၄)ချပ်အထိ ပြီးစီးအောင် ယက်လုပ်နိုင်ကြကြောင်း ၊ ဖျာစျေးနှုန်းများအနေဖြင့် နှစ်ယောက်အိပ် နှီးအကြောဖျာ တစ်ချပ်လျှင် (၁၂၀၀၀)ကျပ် ၊ နှီးအောက်ဖျာတစ်ချပ်လျှင် (၈၀၀၀)ကျပ် ၊ နှီးသားဖျာတစ်ချပ်လျှင် (၅၀၀၀)ကျပ်နှုန်း ရှိပြီးဖောက်သည်စျေးအနေဖြင့်(၂၅)ချပ်အထက်မှာယူပါက နှီးဖျာသုံးမျိုးအတွက် တစ်ချပ်ကို(၁၅၀၀) ကျပ်လျှော့ယူကြောင်း၊(၁၀)ချပ်စျေးကို ပုံမှန်စျေးဖြင့်သာရောင်းချပေးကြောင်း ၊ ဈေးကွက်အနေဖြင့် ဖောက်သည်ဈေးပေးသလို ကိုယ်တိုင်လည်း ရွာစဉ်လှည့်၍ ရောင်းချကြပါသည်။ နှီးဖျာသုံးမျိုးတွင် နှီးသားဖျာများကို ကျေးလတ်ဒေသများတွင် ဈေးနှုန်းသင့်၍ အသုံးများသောကြောင့် ပိုမိုရောင်းချရကြောင်း၊နှီးဖျာသုံးမျိုးစပ်(၅)ပေပတ်လည် တစ်ချပ်လျှင် သုံးသောင်းကျပ်၊ (၁၀)ပေပတ်လည်တစ်ချပ်လျှင်ခြောက်သောင်းကျပ်ဖြင့် ရောင်းချပါသည် ။ ဝါးနှီးဖျာယက်လုပ်သော မှိုင်းဟင်ကျေးရွာသည် တောင်သူလုပ်ငန်း လုပ်ကိုင်သူနည်းပါးပြီး ဝါးနှီးဖျာယက်လုပ်သောကျေးရွာဖြစ်သဖြင့် အမျိုးသား များကဝါးများဝယ်ယူပေးခြင်း၊နှီးဖျာပေးခြင်းများကို ပြုလုပ်ပေးပါသည်။အမျိုးသမီးများကအိမ်တွင်းမှုကိစ္စများပြုလုပ်ရင်းတစ်ပိုင်တစ်နိုင် မိသားစုအပိုဝင်ငွေများရရှိအောင် မိရိုးဖလာနှီးဖျာများယက်လုပ်၍ရောင်းချလျက်ရှိပြီး ကျန်းမာရေးနှင့်ညီညွတ်၍ဈေးနှုန်းသင့်တင့်သောကြောင့် ပြည်တွင်းဖြစ် ဝါးနှီးဖျာများကို ဝယ်ယူသုံးစွဲသင့်ပါကြောင်း ကျေးရွာတစ်ရွာ ထုတ်ကုန်တစ်မျိုး(One Village One Product)အနေဖြင့် ရေးသားတင်ပြအပ်ပါသည်။
DOCA(မန္တလေး)