မကွေးတိုင်းဒေသကြီး၊ ပခုက္ကူခရိုင်၊ ပခုက္ကူမြို့နယ်အတွင်းရှိ ကုက္ကိုလှ၊ ကျွန်းညိုကြီး၊ သံပုရာပင်ကုန်း၊ မြင်းကျွန်း၊ ကျွန်းညို၊ မှိုက်ပင်ကုန်း၊ တင်းဂပ်အုပ်စုအတွင်းကျေးရွာများရှိ ဆေးရွက်ကြီးစိုက်တောင်သူများသည် နှစ်စဉ် မြစ်ရေဝင် ကိုင်းကျွန်းမြေများတွင် ဗမာဆေးရွက်ကြီးစိုက်ခင်းများကို စိုက်ဧက(၃၀၀)ခန့် စီးပွားဖြစ်စိုက်ပျိုးကြသည်။ ပြည်တွင်းဈေးကွက်ခိုင်မာမှုရှိသော ဆေးရွက်ကြီးကို ယခု၂၀၂၄ခုနှစ်တွင် စိုက်ဧက(၃၅၀)ထိစိုက်ပျိုးကြောင်းသိရှိရသည်။
ဆေးရွက်ကြီးစိုက်ပျိုးထုတ်လုပ်မှုတစ်ဧကလျှင် ပျိုးခုံဝယ်ယူခ၊ သွင်းအားစုအမျိုးမျိုးနှင့် လုပ်သားခအပါအဝင် စုစုပေါင်း ကျပ်(၃၅)သိန်းခန့်ကုန်ကျကြောင်း၊ အထွက်နှုန်းအနေဖြင့် တောင်သူတစ်ဦးချင်း စိုက်ပျိုးချိန်ရာသီနှင့် သွင်းအားစုသုံးစွဲပုံ၊ ရေသွင်းအကြိမ်ရေမတူညီခြင်းကြောင့် အထွက်နှုန်းမှာလည်း မတူညီကြောင်း၊ ယခုနှစ်တွင် ရာသီဥတုကောင်းမွန်ခြင်းကြောင့် ဆေးရွက်ကြီးမှာ အရည်အသွေးကောင်းပြီး အထွက်နှုန်းကောင်းမွန်သဖြင့် တစ်ဧကလျှင် ပျမ်းမျှပိဿာ(၁၁၀၀)ခန့်ထွက်ရှိကြောင်း၊ ယခုနှစ်တွင် ဒေသတွင်းသီးနှံပေါက်ဈေးအနေဖြင့် တစ်ပိဿာလျှင် ကျပ်(၉၀၀၀)ဈေးနှုန်းဖြင့်ရောင်းချရကြောင်း၊ ယခင်နှစ် ဆေးရွက်ကြီးပေါ်ချိန်တွင် တစ်ပိဿာလျှင် ကျပ်(၃၅၀၀)ဈေးနှုန်းဖြင့် အရောင်းအဝယ်ဖြစ်ခဲ့ကြောင်း၊ ဆေးရွက်ကြီးပင်မှရရှိသော မျိုးစေ့မှာလည်း တစ်ပြည်လျှင် ကျပ်(၂၀၀၀၀)ဈေးနှုန်းဖြင့် အရောင်းအဝယ်ဖြစ်ကြောင်း၊ ယခုနှစ် ပခုက္ကူမြို့နယ်အတွင်းရှိ ဆေးရွက်ကြီးစိုက်တောင်သူများအနေဖြင့် ရောင်းလိုအားဝယ်လိုအားကောင်းပြီး ဈေးနှုန်းဈေးကွက်ကောင်းမွန်ခြင်းကြောင့် ယခုနှစ်တွင် တစ်ဧကဝင်ငွေမှာ ကျပ်(၉၉)သိန်းရရှိကြောင်း၊ ကုန်ကျစရိတ်အနေဖြင့် ကျပ်(၃၅)သိန်းခန့်ကုန်ကျ၍ အကျိုးအမြတ်အနေဖြင့် ဆေးရွက်ကြီးဈေးနှုန်းမြင့်တက်ခြင်းကြောင့် ကျပ်(၆၄)သိန်းခန့်အကျိုးအမြတ်များစွာရရှိကြောင်း ကျွန်းညိုကြီးကျေးရွာရှိ စိုက်တောင်သူတစ်ဦးထံမှသိရှိရပါသည်။
ဈေးကွက်အနေဖြင့် ပခုက္ကူမြို့နယ်အတွင်း ထွက်ရှိသောဆေးရွက်ကြီးနှင့် ဆေးရိုးများကို ပခုက္ကူမြို့ပေါ်ရှိ ဆေးလိပ်ခုံလုပ်ငန်းရှင်းများနှင့် ကွမ်းယာရောင်းဝယ်ရေးလုပ်ငန်းရှင်များက ဝယ်ယူလျက်ရှိသည့်အပြင် မြန်မာနိုင်ငံအောက်ပိုင်း ပုသိမ်၊ မြောင်းမြ၊ ဘိုကလေး၊ ဟင်္သာတဝယ်လက်များမှ ကျေးရွာများထိဆင်း၍ နှစ်စဉ်ဝယ်ယူလျက်ရှိကြောင်း၊ ရောင်းလိုအားဝယ်လိုအားကောင်းပြီး ပြည်တွင်းဈေးကွက်ခိုင်မာမှုရှိ၍ အကျိုးအမြတ်များစွာရရှိခြင်းကြောင့် စိုက်တောင်သူများက ဆေးရွက်ကြီးစိုက်ခင်းများကို နှစ်စဉ်မပြတ်စိုက်ပျိုးလျက်ရှိကြောင်းသိရှိရပါသည်။
DOCA(မကွေး)