ထိုင်းနိုင်ငံနှင့် မလေးရှားနိုင်ငံတို့ ပူးတွဲစီမံကိန်းသစ်များပါဝင်သည့် ကုန်သွယ်ရေးဆွေးနွေးပွဲပြုလုပ်

    ထိုင်းနိုင်ငံစီးပွား‌ရေးဝန်ကြီးဌာန၊ ဝန်ကြီး Phumtham Wechayachai သည် မလေးရှား နိုင်ငံ၊ ကွာလာလမ်ပူမြို့တွင် ကျင်းပပြုလုပ်ခဲ့သည့် ထိုင်းနိုင်ငံနှင့် မလေးရှားနိုင်ငံအကြား တတိယ အကြိမ်မြောက် ပူးတွဲကုန်သွယ်ရေးကော်မတီအစည်းအဝေးကို တက်ရောက်ခဲ့ကြောင်း သိရပါသည်။ အစည်းအဝေးသည် ထိုင်းနိုင်ငံ၏ ယခုနှစ်အတွက် ပထမဆုံးပူးတွဲ ကုန်သွယ်ရေး ကော်မတီ အစည်းအဝေးဖြစ်ကြောင်း သိရပါသည်။ အစည်းအဝေးသည် နှစ်နိုင်ငံကြား ကုန်သွယ်မှုကို ၂၀၂၃ ခုနှစ်တွင် အမေရိကန်ဒေါ်လာ ၂၅ ဘီလီယံမှ ၂၀၂၇ ခုနှစ်တွင် အမေရိကန်ဒေါ်လာ ၃၀ ဘီလီယံထိ မြင့်တက်ရန် မျှော်လင့်ရကြောင်းနှင့် ထိုင်းနိုင်ငံစိုက်ပျိုးမွေးမြူရေး ထုတ်ကုန်များအတွက် ဈေးကွက်ကိုတိုးချဲ့ရန် မလေးရှားနိုင်ငံ၏ အားထုတ်မှုအရှိန်မြှင့်တင်ခြင်းဟု သိရပါသည်။

       Mr. Phumtham  က ထိုင်းနိုင်ငံသည် မလေးရှားအကောက်ခွန်ဦးစီးဌာနနှင့် ကျွဲ၊ နွား၊ ဝက်နှင့် ဂျာဗားမျိုးနွယ် ဂျိုးငှက်တို့ကို တင်သွင်းခွင့်ပြုရန်နှင့် ထိုင်းနိုင်ငံမှ ထုတ်လုပ်သည့် လတ်ဆတ်သော၊ အအေးခံထားသော၊ အေးခဲထားသော ကြက်သားထုတ်ကုန်များကို မလေးရှား သို့တင်ပို့ခွင့်ပြုရန် ဆွေးနွေးလျက်ရှိကြောင်း ပြောကြားခဲ့ပါသည်။ အစည်းအဝေးသည် နယ်စပ် တစ်လျှောက် စီးပွားရေးချိတ်ဆက်မှုမြှင့်တင်ရန် အခွင့်အရေးကို ရရှိစေမည်ဖြစ်ကြောင်း သိရပါသည်။ ထို့ပြင် မလေးရှားနိုင်ငံ ရင်းနှီးမြှုပ်နှံမှု၊ ကုန်သွယ်ရေးနှင့်စက်မှုဝန်ကြီးဌာနနှင့် ထိုင်းနိုင်ငံ စီးပွားရေးဝန်ကြီးဌာနအကြား နယ်စပ်ဖြတ်ကျော်ကုန်သွယ်ရေးနှင့် ရင်းနှီးမြှုပ်နှံမှုအတွက် အထူးလုပ်ငန်းအဖွဲ့ ပူးပေါင်းဖွဲ့စည်းသွားရေးအတွက် ဆွေးနွေးရန်အစီအစဉ်ရှိကြောင်း သိရပါသည်။ မလေးရှားသည် အဆိုပါဆွေးနွေးမှုအတွက် ယခုလတွင် အိမ်ရှင်နိုင်ငံအဖြစ် လက်ခံပြုလုပ်သွားမည်ဟု သိရပါသည်။

     ထိုင်းနိုင်ငံကလည်း ၎င်းတို့၏တောင်ဘက်စွန်းစီရင်စု(၅)ခု ဖွံ့ဖြိုးတိုးတက်ရန်အတွက် မလေးရှားနိုင်ငံနှင့်မိတ်ဖက်အမွှာမြို့တော်စီမံကိန်းကို အဆိုပြုထားကြောင်း သိရပါသည်။ အမွှာမြို့တော်စီမံကိန်းအောက်တွင် ထိုင်းနိုင်ငံ၏ Satun၊ Songkhla၊ Yala၊ Pattani နှင့် Narathiwat ၏ စီရင်စုများသည် မလေးရှားပြည်နယ်(၅)ခုဖြစ်သည့် Perlis၊ Kedah၊ Perak၊ Terengganu၊ Kelantan တို့နှင့် စုံတွဲတွဲဖက်ပြုလုပ်မည်ဖြစ်ကြောင်း သိရပါသည်။ စီမံကိန်း၏ ရည်ရွယ်ချက်မှာ အဆိုပါစီရင်စုများရှိ ပဋိပက္ခနယ်ပယ်များကို ငြိမ်းချမ်းရန်အတွက် ကုန်သွယ်ရေး နေရာအဖြစ်ပြောင်းလဲရန် ရည်ရွယ်ကြောင်း သိရပါသည်။ ထို့ပြင် Mr. Phumtham   က နယ်စပ်ဖြတ်ကျော်ကုန်ပစ္စည်းနှင့် ခရီးသည်များပို့ဆောင်ရန်အတွက် နားလည်မှုသဝဏ်လွှာ (MOU) မူကြမ်းရေးဆွဲရာတွင် အမြန်ပြီးမြောက်စေရန်အတွက် မလေးရှားနိုင်ငံဘက်မှ ကူညီရန် တောင်းဆိုခဲ့ပြီး MOU ကို ယခုနှစ်ကုန်ပိုင်းတွင် လက်မှတ်ရေးထိုးနိုင်ရန် မျှော်လင့်ရကြောင်း သိရပါသည်။

          နှစ်နိုင်ငံစလုံးက ၎င်းတို့သည် စီးပွားရေးနှင့်စွန့်ဦးတီထွင်မှုလုပ်ငန်းများ အကျိုးရှိစေမည့် မိတ်ဖက်ဖွဲ့မှုအသစ်များ ဖွဲ့စည်းရန်၊ ကုန်သွယ်‌ရေးမြှင့်တင်ရန်အတွက် မူဝါဒများကိုချိန်ညှိရန်၊ ကုန်သွယ်ရေး၏အတားအဆီးဖြစ်စေမည့်အရာများကို လျှော့ချရန်နှင့် နှစ်ဦးနှစ်ဖက်ကုန်သွယ်ရေး အထောက်အကူဖြစ်ရန် အလိုရှိကြောင်း ပြောကြားခဲ့ပါသည်။ မလေးရှားနိုင်ငံသည် အာဆီယံတွင် ထိုင်းနိုင်ငံ၏ နံပါတ်(၁)စီးပွားရေးမိတ်ဖက်ဖြစ်ကြောင်း သိရပါသည်။ နှစ်နိုင်ငံ ကြားကုန်သွယ်ရေး သည် ၂၀၂၃ ခုနှစ်တွင် စုစုပေါင်းအမေရိကန်ဒေါ်လာ ၂၅ ဘီလီယံရှိပြီး ယခုနှစ်၏ ပထမ(၅)လတွင် အမေရိကန်ဒေါ်လာ ၁၁ ဘီလီယံရှိကြောင်း သိရပါသည်။ ထိုင်းနိုင်ငံမှ မလေးရှားနိုင်ငံသို့ အမေရိကန်ဒေါ်လာ ၅ ဘီလီယံတန်ဖိုး တင်ပို့ခဲ့ပြီး အမေရိကန်ဒေါ်လာ ၅.၇ ဘီလီယံတန်ဖိုး ပြန်လည်တင်သွင်းခဲ့ကြောင်း သိရပါသည်။

Source: Bangkok Post

DOCA(ရန်ကုန်)