အမေရိကန်နိုင်ငံသို့ ဗီယက်နမ်နိုင်ငံ၏ တင်ပို့မှုကြီးထွားရန်ကဏ္ဍရှိနေကြောင်း ကျွမ်းကျင်သူများပြောကြား

      ဗီယက်နမ်နိုင်ငံ၏ ကွန်ပျူတာများ၊ ကွန်ပျူတာအစိတ်အပိုင်းများ၊ အီလက်ထရောနစ်၊ စက်ယန္တရားများ၊ ပစ္စည်းကိရိယာများ၊ အဝတ်အထည်နှင့် ခြေအိတ်များအား အမေရိကန်သို့ တင်ပို့မှု သည် ကြီးထွားရန်ရှိနေသေးကြောင်း ကုန်သွယ်ရေးကျွမ်းကျင်ပညာရှင်များအဆိုအရ သိရပါသည်။ ယခုနှစ်၏ ပထမနှစ်ဝက်ကာလတွင် ဗီယက်နမ်နိုင်ငံသည် အမေရိကန်ဒေါ်လာ ၅၅ ဘီလီယံ တန်ဖိုးရှိသည့် ကုန်ပစ္စည်းများကို အမေရိကန်နိုင်ငံသို့တင်ပို့ခဲ့ပြီး လွန်ခဲ့သည့်နှစ် တူညီသည့်ကာလထက် ၂၆ ရာခိုင်နှုန်းမြင့်တက်ခဲ့ကာ အခြားဈေးကွက်များဖြစ်သည့် ဥရောပ သမဂ္ဂ၊ အာဆီယံနှင့် တောင်ကိုရီးယားတို့ကို ကျော်ဖြတ်နိုင်ခဲ့ကြောင်း သိရပါသည်။ အဆိုပါကာလတွင် ကုန်ပစ္စည်း အမျိုးအစားအုပ်စု(၈)ခုတင်ပို့မှုသည် အမေရိကန်ဒေါ်လာ ၁ ဘီလီယံ ကျော်တန်ဖိုး အသီးသီးရှိခဲ့ပြီး ကွန်ပျူတာနှင့်ဆက်စပ်ပစ္စည်းများတင်ပို့မှုမှာ အမေရိကန်ဒေါ်လာ ၁၀ ဘီလီယံကျော်နှင့် အထည်အလိပ်နှင့် အဝတ်အထည်တင်ပို့မှုမှာ အမေရိကန်ဒေါ်လာ ၆ ဘီလီယံ ရရှိခဲ့ကြောင်း သိရပါသည်။ အခြားတင်ပို့သည့်ပစ္စည်းများမှာ လက်ကိုင်ဖုန်းများ၊ ယန္တရားများ၊ ပစ္စည်းကိရိယာများ၊ အပိုပစ္စည်းများ၊ ခြေအိတ်၊ သစ်နှင့် သစ်သားထုတ်ကုန်များ ဖြစ်ကြောင်း သိရပါသည်။

       ဗီယက်နမ်နိုင်ငံ စက်မှုနှင့်ကုန်သွယ်ရေးဝန်ကြီးဌာနအောက်ရှိ ဥရောပ-အမေရိကန် ဈေးကွက်ဦးစီးဌာန၏ ဒုတိယညွှန်ကြားရေးမှူး Nguyen Hong Duong က နှစ်နိုင်ငံသည် ၎င်းတို့၏ စဉ်ဆက်မပြတ် မဟာဗျူဟာမြောက် မိတ်ဖက်ဆက်ဆံရေးကို အဆင့်မြှင့်ခဲ့ကြောင်းနှင့် ပြည်တွင်း စီးပွားရေးလုပ်ငန်းရှင်များထံမှ တင်ပို့ရန်အတွက် အခွင့်အလမ်းများ၊ အလား အလာများနှင့် ပတ်သက်ပြီး မေးမြန်းခေါ်ဆိုမှုများ လက်ခံခဲ့ရကြောင်း ပြောကြားခဲ့ပါသည်။ နှစ်နိုင်ငံအကြား ဆက်ဆံရေးကို အဆင့်မြှင့်တင်ခဲ့သောအခါ အမေရိကန်စီးပွားရေးလုပ်ငန်းများ ဗီယက်နမ်နိုင်ငံတွင် ရင်းနှီးမြှုပ်နှံမှုတိုးမြှင့်ရန် မျှော်လင့်ရသည်။ အဆိုပါအချက်သည် တတိယ နိုင်ငံများမှ လုပ်ငန်းများကို တစ်ပိုင်လျှပ်ကူးပစ္စည်းများ၊ ထောက်ပံ့ရေးစက်မှုလုပ်ငန်းများ၊ ကျန်းမာ‌ရေးစောင့်ရှောက်မှု၊ ဆီ၊ Gas နှင့်စွမ်းအင်နယ်ပယ်တို့တွင် ဗီယက်နမ်နိုင်ငံ၌ ရင်းနှီးမြှုပ်နှံလာစေရန် တွန်းအားတစ်ခုဖြစ်စေမည်ဖြစ်ပြီး အနာဂတ်တွင် ဖွံ့ဖြိုးတိုးတက်မှုကို ဖန်တီးနိုင်မည်ဟု Duong က ပြောကြားခဲ့ပါသည်။

     ဗီယက်နမ်ကုန်ပစ္စည်းများဖြစ်သည့် ပုဇွန်၊ သစ်သားထုတ်ကုန်မှစ၍ အဝတ်အထည်၊ အထည်အလိပ်နှင့်တာယာတို့သည် အမေရိကန်ဈေးကွက်တွင် ယှဉ်ပြိုင်သည့်အခါ အခွင့်အလမ်း များရရှိမည်ဟု သိရပါသည်။ တစ်ချိန်တည်းမှာပင် ဗီယက်နမ်မှကုန်ပစ္စည်းများသည် အမေရိကန်ထံမှ အခွန်လျှော့ချခြင်း၏ အကျိုးကျေးဇူးကို ခံစားခွင့်ရမည်ဟု သိရပါသည်။ အမေရိကန်မှ စားသုံးသူများသည်လည်း ဗီယက်နမ်နိုင်ငံထံမှ အရည်အသွေးရှိသော ကုန်ပစ္စည်းများကို လက်ခံနိုင်သော ဈေးနှုန်းများဖြင့် ဝယ်နိုင်သည့်အကျိုးကျေးဇူးကို ရရှိမည်ဟု သိရပါသည်။

      ၂၀၂၃ ခုနှစ်တွင် ဗီယက်နမ်နိုင်ငံမှ အမေရိကန်သို့တင်ပို့မှုသည် စီးပွား‌ရေးကျဆင်းမှု၊ ငွေကြေးဖောင်းပွမှုနှင့် စားသုံးသူများငွေကြေးသုံးစွဲမှုကို စိစစ်နေသည့်ကြားက အမေရိကန် ဒေါ်လာ ၉၇ ဘီလီယံတန်ဖိုးနီးပါးရှိခဲ့ကြောင်း သိရပါသည်။ ၂၀၂၂ ခုနှစ်တွင် တင်ပို့မှုတန်ဖိုး အမေရိကန်ဒေါ်လာ ၁၁၀ ဘီလီယံနီးပါးရှိခဲ့မှုနှင့်အတူ အမေရိကန်သည် ဗီယက်နမ်နိုင်ငံ၏ နှစ်တစ်နှစ်တွင် အမေရိကန်ဒေါ်လာ ၁၀၀ ဘီလီယံသို့ရောက်ရှိခဲ့သည့် ပထမဆုံးတင်ပို့ရာ ဈေးကွက်ဖြစ်ခဲ့ကြောင်း သိရပါသည်။

Source: Vietnam Plus

DOCA(ရန်ကုန်)