ဂျုံနှင့်ပြောင်း တင်သွင်းမှုအပေါ် အခွန်စည်းကြပ်မှု နိုင်ဂျီးရီးယားအစိုးရ ဆိုင်းငံ့

   အာဖရိကဒေသအတွင်း လူဦးရေအများဆုံးနိုင်ငံဖြစ်သော နိုင်ဂျီးရီယားနိုင်ငံ၌ ကုန်ဈေးနှုန်းများ မြင့်တက်မှုကို ထိန်းချုပ်နိုင်ရေးနှင့် သင့်တင့်သောလက်လီဈေးနှုန်း ဖြစ်ပေါ်စေရေးအတွက် ဂျုံနှင့်ပြောင်း တင်သွင်းမှုအပေါ် အခွန်စည်းကြပ်ခြင်းကို ရက်ပေါင်း ၁၅၀ ကြာအထိ ဆိုင်းငံ့မည်ဟု လယ်ယာစိုက်ပျိုးရေးဝန်ကြီး Abubakar Kyari က ၈-၇-၂၀၂၄ နေ့တွင် ပြောကြားခဲ့ပါသည်။

    နိုင်ဂျီးရီးယား အစိုးရအနေဖြင့် ဆယ်စုနှစ်တစ်ခုအကြာထိ ထိခိုက်လွယ်မှုဖြစ်ပေါ်နေသော စီးပွားရေးအခြေအနေကို လှုံ့ဆော်တွန်းအားပေးရန်နှင့် နှစ်အလိုက်နှိုင်းယှဉ်ပါက ၄၀% ကျော် မြင့်တက်လျက်ရှိသော စားသောက်ကုန် ဈေးနှုန်းဖောင်းပွမှု လျှော့ချရေးမူဝါဒ၏ တစ်စိတ်တစ်ပိုင်းအဖြစ် အဆိုပါအစီအစဉ်ကို ဖော်ဆောင်ခြင်းဖြစ်သည်။ သမ္မတ Bola Tinubu သည် စားနပ်ရိက္ခာ ထောက်ပံ့မှုနှင့် ဈေးနှုန်းဆိုင်ရာကိစ္စရပ်များကို ကိုင်တွယ်ဖြေရှင်းရန်နှင့် အဓိကကဏ္ဍများကို မြှင့်တင်တွန်းအားပေးရန် လှုံ့ဆော်မှု အစီအစဉ်အဖြစ် နိုင်ရာငွေ ၂ ထရီလီယံ (ဒေါ်လာ ၁.၃၃ ဘီလီယံ) သုံးစွဲနိုင်ရေးပြင်ဆင်ရန် ၎င်း၏စီးပွားရေးစီမံခန့်ခွဲမှုအဖွဲ့သို့ ညွှန်ကြားထားသည်ဟု နိုင်ဂျီးရီးယားဘဏ္ဍာရေးဝန်ကြီးက ယခင်သီတင်းပတ်၌ ပြောကြားခဲ့သည်။

     ကုန်စည်ဝယ်ယူရန် တတ်နိုင်စွမ်းနှင့် ကုန်ရရန်လွယ်ကူမှု ခက်ခဲခြင်းတို့ကြောင့် ပြည်တွင်း၌ စားကုန်ဈေးနှုန်းဖောင်းပွနေခြင်းကို တိုးတက်ကောင်းမွန်မှုရှိစေရေးအတွက် အစိုးရသည် လာမည့် ရက်ပေါင်း ၁၈၀ အတွင်း ဖော်ဆောင်မည့် အစီအမံများအား ချမှတ်လုပ်ဆောင်လျက်ရှိကြောင်း၊ ပုဂ္ဂလိကကဏ္ဍမှ တင်သွင်းမှုအပြင် အစိုးရအနေဖြင့် ဂျုံတန်ချိန် ၂၅၀၀၀၀ နှင့် ပြောင်းတန်ချိန် ၂၅၀၀၀၀ တို့ကို တင်သွင်းမည်ဖြစ်ကြောင်း၊ ၎င်းကုန်စည်များကို တစ်ပိုင်းတစ်စ ပြုပြင်ထုတ်လုပ် ထားပြီးသည့် အဆင့်ဖြင့် တင်သွင်းမည်ဖြစ်ပြီး ပြည်တွင်းရှိ အသေးစား ပြုပြင်ထုတ်လုပ်သူများနှင့် ကြိတ်ခွဲစက်များသို့ ထောက်ပံ့ပေးမည်ဖြစ်ကြောင်း၊ ထိုကဲ့သို့ အခွန်သက်သာ ကင်းလွတ်ခွင့်ပြုခြင်း သည် ပင်လယ်ရေကြောင်းနှင့် ကုန်းတွင်းနယ်စပ်ဂိတ်များမှ တင်သွင်းမှုများအပေါ် လွှမ်းခြုံမှုရှိမည် ဖြစ်ကြောင်း စိုက်ပျိုးရေးဝန်ကြီး Mr. Kyari က ပြောဆိုခဲ့သည်။

   လယ်ယာထွက်ကုန်များအား ဈေးကွက်သို့ပို့ဆောင်ရေး လမ်းပန်းဆက်သွယ်မှုကွန်ယက် ညံ့ဖျင်းမှုနှင့်အတူ စားနပ်ရိက္ခာထုတ်လုပ်ရာ နယ်မြေဒေသများ၌ လုံခြုံရေးမတည်ငြိမ်မှု တို့ကြောင့် အနောက်အာဖရိကဒေသရှိ နိုင်ဂျီးရီးယားနိုင်ငံတွင် စားသောက်ကုန် ဈေးနှုန်းများ ဖောင်းပွမှုမှာ မြင့်တက်လျက်ရှိနေခဲ့သည်။ အဓိကစားသောက်ကုန်များ၏ ဈေးနှုန်းများကြီးမြင့်မှုက လူနေမှု စရိတ်စကဆိုင်ရာ အကျပ်အတည်းများကို ဖြစ်ပေါ်စေပြီး ငွေကြေးဖောင်းပွမှုကို နှစ်ပေါင်း ၃၀ ခန့်အတွင်း အမြင့်မားဆုံးအဖြစ် ဂဏန်းနှစ်လုံးအဆင့်အထိ မြင့်တက်လာခြင်းဖြစ်ကြောင်း ရိုက်တာ သတင်းဌာနက ဖော်ပြထားသည်။

Source: Reuters, 8 Jul 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)