ထိုင်းနိုင်ငံ၏ တတိယအကြီးဆုံး သကြားထုတ်လုပ်သည့် Khon Kaen Sugar Industry Plc (KSL)ကုမ္ပဏီသည် လုပ်သာကိုင်သာမရှိသော စီးပွားရေးအခြေအနေများကြောင့် ၎င်း၏ရင်းနှီး မြှုပ်နှံမှုများကို ပြန်လည်ရုပ်သိမ်းရန် ဆုံးဖြတ်ခဲ့သောကြောင့် ထိုင်းနိုင်ငံမှ ကမ္ဘောဒီးယားနိုင်ငံသို့ သကြားလုပ်ငန်းတိုးချဲ့ရာတွင် အဟန့်အတားဖြစ်စေကြောင်း သိရှိရသည်။
ကမ္ဘာ့သကြားဈေးနှုန်း ကျဆင်းနေခြင်း၊ ကမ္ဘောဒီးယား၏ ဈေးကွက်ကျဆင်းခြင်းနှင့် အကောက်ခွန်သက်သာခွင့်ပေးသည့် (GSP) ကုန်သွယ်မှုအစီအစဉ်များသည် ကမ္ဘောဒီးယားနိုင်ငံ အတွင်း ရင်းနှီးမြှုပ်နှံမှုကို အားမပေးသည့် အကြောင်းရင်းများဖြစ်ကြောင်း KSL ကုမ္ပဏီဥက္ကဋ္ဌ Chalush Chinthammitက ပြောကြားခဲ့သည်။
ကမ္ဘောဒီးယားသည် သကြားပို့ကုန်များကို ဥရောပနှင့် အမေရိကန်တို့သို့ တင်ပို့ရန် အတွက် GSP အကျိုးကျေးဇူးများကို အသုံးမပြုကြောင်း၊ ဥရောပနှင့် အမေရိကန်တို့မှ စီးပွားရေး အားနည်းသည့် နိုင်ငံများအား အကူအညီပေးရန် အခွန်ကင်းလွတ်ခွင့် သို့မဟုတ် အခွန်နှုန်းထား လျှော့ပေါ့ပေးခြင်း စသည့် ကုန်သွယ်မှုအထူးအခွင့်အရေးများ ပေးထားကြောင်း၊ ကမ္ဘောဒီးယားတွင် GSP အသုံးမပြုခြင်းနှင့် သကြားဈေးနှုန်း ကျဆင်းနေခြင်းတို့သည် KSL ကုမ္ပဏီအား ကမ္ဘောဒီးယားနိုင်ငံတွင် ၎င်း၏ သကြားလုပ်ငန်းအတွက် ပြန်လည်စဉ်းစားရန် ဖြစ်လာကြောင်း၊ ကြံစိုက် ပျိုးမှုစရိတ်များ တက်နေသည့်အချိန်တွင် ကမ္ဘာ့သကြားဈေးနှုန်းသည် နှစ်အတော်ကြာကြာ ကျဆင်းလာခဲ့ကြောင်း ဥက္ကဋ္ဌ Mr. Chalush Chinthammit က ပြောကြားခဲ့သည်။
မိုးခေါင်မှုကြောင့် နိုင်ငံများစွာတွင် သကြားရောင်းအား ကျဆင်းခဲ့ပြီး ကမ္ဘာ့သကြားဈေးနှုန်းများ စတင်မြင့်တက်လာပြီဖြစ်သော်လည်း ကုမ္ပဏီအနေဖြင့် အဆိုပါအခြေအနေများကို မဖြေ ရှင်းနိုင်တော့ကြောင်း၊ KSLသည် ကမ္ဘောဒီးယားတွင် ၂၀၀၆ ခုနှစ်မှစ၍ သကြားလုပ်ငန်း စတင်ခဲ့ပြီး ကမ္ဘောဒီးယား၊ ထိုင်ဝမ်ကုမ္ပဏီတို့နှင့်ပူးပေါင်း၍ သကြားထုတ်လုပ်ခြင်းနှင့် ကြံစိုက်ပျိုးခြင်းကို ဆောင်ရွက်ခဲ့ကြောင်း၊ နှစ် ၉၀ ကြာ သဘောတူညီထားသော စာချုပ်အောက်မှ မြေယာ ၁၂၅၀၀၀ ရိုင် (၄၉၄၂၁ ဧကခန့်) တွင် စိုက်ပျိုးရန်အတွက် ကမ္ဘောဒီးယားအစိုးရအနေဖြင့် KSL ကုမ္ပဏီနှင့် ၎င်း၏မိတ်ဖက် ကုမ္ပဏီများနှင့် သဘောတူညီထားပါကြောင်း၊ စိန်ခေါ်မှုများစွာရှိသောကြောင့် ကမ္ဘောဒီးယားတွင် သကြားလုပ်ငန်း ဖွံ့ဖြိုးတိုးတက်ရန်အတွက် ခက်ခဲကြောင်း Mr. Chalush က ဆက်လက်ပြော ကြားခဲ့သည်။
လာအိုနိုင်ငံတွင် အစိုးရက ကြံစိုက်ပျိုးခွင့်နှင့် သကြားစက် လည်ပတ်ခွင့်ပြုထားသည့် မြေယာ ၆၀၀၀၀ ရိုင် (၂၃၇၂၂ ဧက) ၌ KSLကုမ္ပဏီအနေဖြင့် ရင်းနှီးမြှုပ်နှံမှုကို ဆက်လက်ထိန်း ထားပါကြောင်း၊ KSL ကုမ္ပဏီသည် အဆိုပါ လာအိုနိုင်ငံရှိ သကြားလုပ်ငန်းမှ ၁ နှစ်လျှင် ဘတ် သန်း၂၀၀ ကျော် ဝင်ငွေရရှိကြောင်း၊ ကမ္ဘာကြီးပူနွေးလာမှုအပေါ် စိုးရိမ်မှုများ ရှိလာခြင်းကြောင့် KSL ကုမ္ပဏီအနေဖြင့် ကာဗွန်ဒိုင်အောက်ဆိုဒ်ထုတ်လွှတ်မှုလျှော့ချနိုင်မည့် အခွင့်အလမ်းများကို ရှာဖွေနေကြောင်း Mr. Chalush က ပြောကြားခဲ့သည်။
ကုမ္ပဏီသည် ရေရှည်တည်တံ့သော လေယာဉ်လောင်စာဆီ (Sustainable Aviation Fuel -SAF) နှင့် လေယာဥ်အတွက် ဇီဝလောင်စာ ဖွံ့ဖြိုးတိုးတက်မှုအပါအဝင် ဇီဝလောင်စာဆီကဏ္ဍတွင် ပူးတွဲရင်းနှီးမြှုပ်နှံရန်အတွက် စွမ်းအင်လုပ်ငန်းစု Bangchak Corporationနှင့် လက်တွဲခဲ့ကြောင်း၊ လေယာဉ်လောင်စာအား ဟင်းချက်ဆီ၊ သီးနှံမှထွက်ရှိသောအမှိုက် သို့မဟုတ် အီသနောတို့မှ ထုတ် လုပ်နိုင်ပြီး သမာရိုးကျဂျက်လေယာဉ်ဆီထက် ဖန်လုံအိမ်ဓါတ်ငွေ့ထုတ်လွှတ်မှုကို ၈၀ ရာခိုင်နှုန်း အထိ နည်းပါးစေကြောင်း မီဒီယာတွင် ဖော်ပြထားချက်အရ သိရှိရသည်။
Source: Bangkok Post, 5 July, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)