၂၀၂၄ခုနှစ်၊ ဇူလိုင်လ ပြီးခဲ့သည့်ရက်ပိုင်းက ဝမ်းပျက်၊ ဝမ်းလျှောရောဂါဖြစ်ပွားနေကြောင်း လူမှုကွန်ရက်စာမျက်နှာများပေါ်တွင် ကျယ်ကျယ်ပြန့်ပြန့်ထွက်ပေါ်လာခဲ့သည်။ တစ်ဆက်တည်းပင် ကောလာဟလသတင်းစကားပေါ်ထွက်လာသဖြင့် ပြည်သူများစိုးရိမ်ပူပန်မှုမဖြစ်အောင် သက်ဆိုင်ရာအဖွဲ့အစည်းများက အသိပေးနှိုးဆော်လိုက်နာသိရှိဆောင်ရွက်ရမည်တို့ကိုပြုလုပ်ပေးလျက်ရှိရာ ဓနုဖြူ ပြန်ကြားရေးနှင့်ပြည်သူ့ဆက်ဆံရေးရုံး၏ အစည်းအဝေးခန်းမ၌ ကျန်းမာရေးဦးစီးဌာန၊ တိုင်းရင်းဆေးပညာဦးစီးဌာန၊ စားသုံးသူရေးရာဦးစီးဌာန၊ စိုက်ပျိုးရေးဦးစီးဌာန၊ ငါးလုပ်ငန်းဦးစီးဌာန၊ စည်ပင်သာယာရေး အဖွဲ့တို့တွေ့ဆုံ၍ ဌာနဆိုင်ရာများနှင့် ရပ်ကွက်နေပြည်သူ (၃၀)ဦးအား အသိပညာပေးလုပ်ငန်းဆောင်ရွက်ခဲ့ကြသည်။
ဦးဆောင်အသိပညာပေးပြောကြားသော ကျန်းမာရေးဦးစီးဌာနမှ တာဝန်ရှိသူက ဝမ်းပျက်၊ ဝမ်းလျှောရောဂါဆိုသည်မှာ ရေနှင့်အစားအသောက်မသန့်ရှင်းလျှင် ရာသီမရွေးဖြစ်ပွားတတ်သည်။ အထူးသဖြင့် မိုးဦးကျကာလနှင့် မိုးအကုန် ဆောင်းအကူးကာလများတွင် အများဆုံးဖြစ်ပွားလေ့ရှိသော ရောဂါတစ်မျိုးဖြစ်သည်။ ပြင်းထန်ဝမ်းပျက်၊ ဝမ်းလျှောရောဂါသည် ကာလဝမ်းရောဂါဖြစ်ပွားစေသော ရောဂါပိုးများပါရှိသည့် မသန့်ရှင်းသောရေနှင့် မသန့်ရှင်းသောအစားအစာများကို စားသောက်မိရာမှတစ်ဆင့် ကူးစက်ဖြစ်ပွားစေသည်။ ထို့ကြောင့် ရေကိုကျိုချက်သောက်သုံးခြင်း၊ ယင်နားစာများကိုရှောင်ရှားခြင်း၊ သန့်ရှင်းသောအိမ်သာများအသုံးပြုခြင်းတို့ကို အထူးဂရုပြုဆောင်ရွက်ရမည်ဖြစ်ကြောင်းတို့ကို မိမိတို့ဌာနလုပ်ငန်းအသိပညာပေးဟောပြောမှုတွင် တည့်သွင်းပြောကြားပေးကြရန်ဆွေးနွေးခဲ့ကြောင်း သတင်းရရှိပါသည်။
သို့ဖြစ်၍ ပြင်းထန်ဝမ်းပျက်၊ ဝမ်းလျှောရောဂါဖြစ်ပွားပါက အလျင်အမြန်ကုသမှုမခံယူလျှင် အသက်အန္တရာယ်ထိခိုက်နိုင်သောကြောင့် မိုးရာသီကာလတွင် ဖြစ်ပွားမှုများပြားနိုင်သည့် ပြင်းထန်ဝမ်းပျက်၊ ဝမ်းလျှောရောဂါမဖြစ်ပွားစေရန်အတွက် ကျန်းမာရေးဝန်ကြီးဌာန၏ အသိပေးလမ်းညွှန်မှုများကိုလိုက်နာပြီး တစ်ကိုယ်ရေကျန်းမာရေး၊ ပတ်ဝန်းကျင်သန့်ရှင်းရေးကို လူတိုင်း အထူးသတိပြုဆောင်ရွက်ရန် လိုအပ်ပါကြောင်းကို ထပ်လောင်းအသိပညာပေးတင်ပြလိုက်ရပါသည်။
DOCA(ဧရာဝတီ)