စားသုံးသူရေးရာဦးစီးဌာန၊ မန္တလေးတိုင်းဒေသကြီး၊ မိတ္ထီလာခရိုင်၊ မိတ္ထီလာခရိုင်ဦးစီးမှူးရုံး CICC Meiktila Facebook Page Messenger တွင် ၂၀၂၂ ခုနှစ်၊ ဇန်နဝါရီလအတွင်း၌ စားသုံးသူတစ်ဦးမှ မုန့်ထုတ်ပေါ်တွင် လက်ဆောင်အပိုကွတ်ကီး(၂)ခု မပါရှိခြင်းနှင့်ပတ်သက်၍ သတင်းပေးမှုတစ်ခုအား ဖြေရှင်းဆောင်ရွက်ပေးနိုင်ခဲ့ပါသည်။
အဆိုပါဖြစ်စဉ်မှာ မိတ္ထီလာမြို့မှ စားသုံးသူတစ်ဦးသည် မိတ္ထီလာမြို့တွင်း အခြားဆိုင်များ၌ မုန့်ဝယ်ယူရာတွင် လက်ဆောင်အပိုကွတ်ကီး(၂)ခုပါရှိကြောင်း၊မုန့်ဆိုင်မှ မုန့်ဝယ်ယူရာတွင် လက်ဆောင်အပိုကွတ်ကီး(၂)ခု မပါဝင်ခြင်းအပေါ် စိတ်အနှောက်ယှက်ဖြစ်ရခြင်း၊ စားသုံးသူနစ်နာဆုံးရှုံးမှုဖြစ်ခဲ့သည်ဟု ယူဆ၍ CICC Meiktila Facebook Page Messenger မှ ဆက်သွယ်အကြောင်းကြားလာခြင်းအပေါ် စားသုံးသူရေးရာဦးစီးဌာန၊ မိတ္ထီလာခရိုင်ဦးစီးမှူးရုံး၌ ရောင်းချသော မုန့်ဆိုင်ပိုင်ရှင်နှင့် ထုတ်လုပ်သောကုမ္ပဏီတို့ကို ခေါ်ယူတွေ့ဆုံ ဆွေးနွေးခဲ့ပါသည်။
တွေ့ဆုံဆွေးနွေးရာတွင် မုန့်ဆိုင်လုပ်ငန်းရှင်သည် မိတ္ထီလာရှိ ကုမ္ပဏီကိုယ်စားလှယ်ဆီမှ တိုက်ရိုက်မယူပဲ လပ်ဆတ်သောမုန့်များကို နေ့စဉ်ရရှိရန်အတွက် မန္တလေးကုမ္ပဏီစက်ရုံမှ တိုက်ရိုက်မှာယူကြောင်း၊ ထိုကဲ့သို့ တိုက်ရိုက်မှာယူသူဖြစ်၍ မန္တလေး Customer အဖြစ် ကုမ္ပဏီတွင် စာရင်းပေါက်ကြောင်း၊ ယခု လက်ဆောင်ကွတ်ကီး (၂) ထုပ်အပိုထည့်ပေးခြင်းမှာလည်း မုန့်အသစ်ဖြစ်ပြီး မိတ္ထီလာစျေးကွက်ကိုသာရည်ရွယ်၍ စျေးကွက်ထိုးဖောက်ခြင်းဖြစ်ကြောင်း၊ နယ် Customer များကိုသာထည့်ပေးခြင်းဖြစ်ပြီး၊ မန္တလေးစျေးကွက်ကို မရည်ရွယ်သဖြင့် မန္တလေး Customer များကို မထည့်ပေးကြောင်း၊ ယခုမုန့်ဆိုင်လုပ်ငန်းရှင်သည် မိတ္ထီလာတွင် ရောင်းချသော်လည်း ကုမ္ပဏီအနေဖြင့် မန္တလေး Customer အဖြစ်စာရင်းပေါက်နေ၍ လက်ဆောင်မုန့်ထုပ်(၂)ထုပ် မပါရှိခြင်းဖြစ်ပါကြောင်း ထုတ်လုပ်သောကုမ္ပဏီနှင့် မုန့်ဆိုင်လုပ်ငန်းရှင်တို့မှ ဆွေးနွေးခဲ့ကြပါသည်၊၊
ခရိုင်ဦးစီးမှူးမှ ဆွေးနွေးပြောကြားရာတွင် ယခုဆွေးနွေးမှုများကို ဌာနအနေဖြင့် မှတ်တမ်းတင်ထားရှိပါကြောင်း၊ လူကြီးမင်းတို့မှ ယခုဆွေးနွေးချက်များကို ကုမ္ပဏီ Letter Head ဖြင့် ခရိုင်ဦးစီးမှူးရုံးသို့ တရားဝင်လိမ်မူ၍ တင်ပြပေးရမည်ဖြစ်ကြောင်း၊ ယခုဖြစ်စဉ်ကို သုံးသပ်ကြည့်ပါက စားသုံးသူအနေဖြင့် မိတ္ထီလာမြို့ စားသုံးသူအချင်းချင်း ခွဲခြားဆက်ဆံခံရသည်ဟုယူဆ၍ ယခုလိုသတင်းပေးအကြောင်း ကြားခြင်းဖြစ်ကြောင်း၊ စားသုံးသူကာကွယ်ရေးဥပဒေတွင်လည်း စီးပွားရေးလုပ်ငန်းရှင်များ တာဝန်များကို ပြဌာန်းထားကြောင်း၊ စားသုံးသူကို ခွဲခြားဆက်ဆံ၍မရကြောင်း၊ ယခုဖြစ်စဉ်သည် ကုမ္ပဏီအနေဖြင့် Marketing Strategy နှင့် Distribution Strategy တို့ကို လွတ်လပ်စွာရေးဆွဲဆောင်ရွက်နိုင်သော်လည်း သက်ဆိုင်ရာပြဌာန်းဥပဒေများကို လျစ်လျူရှု၍မရကြောင်း၊လိုက်နာဆောင်ရွက်ရန်လိုအပ်ကြောင်း၊ နောင်တွင်အလားတူပြသာနာများ မဖြစ်ဖိုလိုအပ်ကြောင်း၊ မုန့်ဆိုင်ပိုင်ရှင်အနေဖြင့်လည်း မိမိရောင်းချသောကုန်ပစ္စည်းများအပေါ် သက်ဆိုင်ရာ ဥပဒေများနှင့်အညီ စနစ်တကျ ရောင်းဝယ်ဖောက်ကားဖို့လိုအပ်ကြောင်း၊ ကုမ္ပဏီက မပေးလို့ထည့်မပေးတာမှန်ပေမယ့် မိမိလက်ဝယ်ဖြစ်ပေါ်ပါက မိမိတွင်သာတာဝန်ရှိကြောင်း၊ ယခုဖြစ်စဉ်၌ လူကြီးမင်းတို့နှစ်ဦးလုံးတွင် တာဝန်ရှိကြောင်း၊ နောက်နောင်အလားတူ ပြဿနာများမဖြစ်ပေါ်စေရေးအတွက် စားသုံးသူကာကွယ်ရေးဥပဒေနှင့်အညီ ထုတ်လုပ်၊ ဖြန့်ဖြူး၊ ရောင်းချသွားမည်ဖြစ်ကြောင်း ဝန်ခံကတိလက်မှတ်များ ရေးထိုးသွားရန် လိုအပ်ကြောင်း၊ ကုမ္ပဏီ Letter Headဖြင့်လူကြီးမင်းတို့မှ ယခုလိုဆွေးနွေးချက်များကို တရားဝင်တင်ပြ သွားရန်လိုအပ်ကြောင်း၊ လူကြီးမင်းတို့တင်ပြစာရရှိပါက စားသုံးသူကာကွယ်ရေးကော်မတီသို့ ဆက်လက်တင်ပြ၍ ဆုံးဖြတ်ချက်ကိုခံယူသွားရမည်ဖြစ်ကြောင်း ဆွေးနွေးပြောကြား၍ ဝန်ခံကတိ လက်မှတ်ရေးထိုးခြင်းများဆောင်ရွက်ခဲ့ပါသည်။
DOCA(မန္တလေး)