ပြည်နယ်ဦးစီးမှူးသည် စားဆီလုပ်ငန်းရှင်များနှင့်တွေ့ဆုံ

        စားသုံးသူရေးရာဦးစီးဌာန၊ မွန်ပြည်နယ်ဦးစီးမှူးသည် ၁၃.၈.၂၀၂၄ ရက်နေ့တွင် ပြည်နယ်ဦးစီးမှူးရုံးခန်း၌ မွန်ပြည်နယ်အတွက် တာဝန်ယူရောင်းချမည့် ကုမ္ပဏီ(၄)ခုမှ စားအုန်းဆီလက်လီ/ လက်ကားဖြန့်ဖြူးရောင်းချသည့် လုပ်ငန်းရှင်များနှင့်တွေ့ဆုံဆွေးနွေးခဲ့ ပါသည်။

        ထိုသို့တွေ့ဆုံဆွေးနွေးရာတွင် စားအုန်းဆီဖြန့်ဖြူးရောင်းချသည့် လုပ်ငန်းရှင်များအနေဖြင့် စားအုန်းဆီများကို ဖြန့်ဖြူးရောင်းချရာတွင် မွန်ပြည်နယ်အတွက် ယခင်တစ်လတန် (၂၀၀) ရရှိခဲ့ရာမှ ယခုဩဂုတ်လ(၁၂) ရက်နေ့မှစ၍ တန်(၄၀၀) ရရှိရာ ကုမ္ပဏီအလိုက်၊ မြို့နယ်များ၏ လူဦးရေအမျိုးအစားအလိုက် အချိုးကျခွဲဝေခြင်း၊ ဈေးနှုန်းမြှင့်တင်ရောင်းချခြင်းမပြုကြရန်၊ သင့်တင့်မျှတသည့်ဈေးနှုန်းဖြင့်သာရောင်းချကြရန်၊ နေရာအနှံ့ရောက်ရှိအောင် ဖြန့်ဖြူးပေးရန်၊ ဈေးနှုန်းမြှင့်တင်ရန်ရည်ရွယ်၍ သိုလှောင်ခြင်းမပြုလုပ်ရန်ဆွေးနွေးခဲ့ပြီး စားအုန်းဆီဈေးနှုန်းများကို အဆမတန်ဈေးနှုန်းမြှင့်တင်ရောင်းချခြင်းများပြုလုပ်ပါက တည်ဆဲဥပဒေနှင့်အညီ အရေးယူဆောင်ရွက်သွားမည်ဖြစ်ကြောင်းဆွေးနွေးခဲ့သည်။

       စားသုံးသူရေးရာဦးစီးဌာနအနေဖြင့် သက်ဆိုင်ရာဌာနများပါဝင်သော မြေပြင်ကွင်းဆင်းစစ်ဆေးရေးအဖွဲ့နှင့်ပူးပေါင်း၍ စားအုန်းဆီ လက်လီ/လက်ကားအရောင်းဆိုင်များ၌ စားအုန်းဆီ များအား ဈေးနှုန်းအဆမတန်မြှင့်တင်ရောင်းချခြင်းရှိ/မရှိ စစ်ဆေးဆောင်ရွက်လျက်ရှိကြောင်းသိရှိရပါသည်။

DOCA(မွန်)