ပဲခူးမြို့မဈေးကြီးရှိ အသီးအနှံဆိုင်များ၌ နာနတ်သီးများလှိုင်လှိုင်ပေါ်၍ သီးနှံဈေးများတွင် ခင်းကျင်းရောင်းချရုံသာမက လမ်းဘေးတွင် တွန်းလှည်းများဖြင့်လည်း နာနတ်သီးများကိုရောင်းချနေသည်ကိုတွေ့ရပါသည်။ နာနတ်သီးသည် ကျန်းမာရေးအတွက် အကျိုးပြုသောသီးနှံတစ်မျိုးဖြစ်ပြီး ဗီတာမင်များစွာပါဝင်သည်။
နာနတ်သီးကိုစားသုံးပေးခြင်းဖြင့် ကိုယ်ခံအားကောင်းစေခြင်း၊ အရိုးကိုသန်မာစေခြင်း၊ အမြင်အာရုံကောင်းမွန်စေခြင်း၊ အမျှင်ဓာတ်ပါဝင်သဖြင့် အစာအိမ်အူလမ်းကြောင်းကို အထောက်အကူပြုစေခြင်း စသည့်အကျိုးကျေးဇူးများရရှိစေပါသည်။ နာနတ်သီးကို အခြားအစားအစာများနှင့်ရောစားခြင်းမပြု လျှင် အကောင်းဆုံးဖြစ်ပါသည်။ အခြားအစားအစာများနှင့်တွဲစားမိလျှင်လည် အစာခြေအက်စစ်များကြောင့် နာနတ်သီးတွင်ပါဝင်သော ဓာတ်များပျက်စီးတတ်ပြီး အကျိုးကျေးဇူးများမရရှိနိုင်ပါ။ နာနတ်သီးကို ဖျော်ရည်လုပ်ရာတွင်လည်းကောင်း၊ ကြက်သားနှင့်ရောချက်ရာတွင်လည်းကောင်း လှီးဖြတ်ပြီး ဆား၊ သကြား၊ သံပရာသီးညှစ်၍ စားသုံးရာတွင်လည်းကောင်း သုံးစွဲကြပါသည်။ ၂၀၂၄ခုနှစ်၊ သြဂုတ်လ၊ တတိယအပတ်၌ ပဲခူးမြို့မဈေးကြီးတွင် နာနတ်သီးအလုံးကြီးတစ်လုံးလျှင် ၂၀၀၀ကျပ်၊ အသေးတစ်လုံးလျှင် ၁၅၀၀ကျပ်ဖြင့်ရောင်းချပြီး အရောင်းအဝယ်လိုက်နေကြောင်းသိရှိရပါသည်။
DOCA(ပဲခူး)