ပဲခူးတိုင်းဒေသကြီး၊ ပြည်ခရိုင်၊ ရွှေတောင်မြို့နယ်အတွင်းရှိ ကျေးလက်ဒေသများဖြစ်သော ဝါးလည်ရွာ၊ မြို့မကျေးရွာ၊ မင်းတဲကျွန်း၊ ကသစ်တိုင်း စသည့်နေရာများတွင် ငရုတ်သီးစိမ်းများကို အများအပြားစိုက်ပျိုးလျက်ရှိကြောင်းသိရပါသည်။ ယခုကဲ့သို့သော မိုးတွင်းရာသီတွင် ငရုတ်သီးစိမ်းများ လှိုင်လှိုင်ပေါ်လာပြီး ဈေးကောင်းလည်းရရှိနေကြောင်းသိရပါသည်။ ဈေးကွက်အတွင်းရောင်းချနေသော ငရုတ်သီးစိမ်းအမည်များမှာ ဒေသအလိုက် အခေါ်အဝေါ်များမတူညီကြောင်းနှင့် ပဲခူးတိုင်းအနောက်ပိုင်းတွင် အများဆုံးစိုက်ပျိုးသော ငရုတ်သီးစိမ်းအမျိုးအမည်များမှာ ကုလားအော်သီး၊ မိုးမျှော်ငရုတ်သီး၊ ရွှေအပ်သီးနှင့် ပီနန်သီးတို့ကိုစိုက်ပျိုးကြောင်းသိရပါသည်။ ငရုတ်သီးစိမ်းအပင်များသည် ရေမဝပ်သော သဲနုန်း၊ မြေပွများကိုနှစ်သက်ကြပါသည်။ ထို့အတွက်ကြောင့် သဲမြေနုများရှိသည့် ကျွန်းတဲဒေသများတွင် ငရုတ်သီးစိမ်းများပိုမိုထွက်ရှိကြောင်းသိရပါသည်။ ငရုတ်သီးစိမ်းတစ်ဧကလျှင် အပင်ပေါင်း ၉၀၀/၁၀၀၀ ခန့်စိုက်ပျိုးနိုင်ကြောင်း သိရှိရပါသည်။ ငရုတ်ပင်ကို စိုက်ပျိုးပြီး (၃)လအကြာတွင် ဈေးကွက်အတွင်းရောင်းချရန် ခူးဆွတ်ရကြောင်းသိရပါသည်။ ထွက်ရှိလာသော ငရုတ်သီးစိမ်းများအား ဈေးကွက်အတွင်းရောင်းချရာတွင် သြဂုတ်လ၊ တတိယအပတ်တွင် တစ်ပိဿာလျှင် ၁၈၀၀ကျပ်မှ ၂၀၀၀ကျပ်ဖြင့်ရောင်းချလျက်ရှိကြောင်းသိရပါသည်။
DOCA(ပဲခူး)