“စျေးကောင်းရသော အညာဒေသထွက် ထန်လက်ကုလားထိုင်”

       ကျောက်ဆည်ခရိုင်၊စားသုံးသူရေးရာဦးစီးဌာနမှ ဝန်ထမ်းများသည် အသေးစား၊အလက်စား လုပ်ငန်းများဖွံ့ဖြိုးတိုးတက်စေရေးအတွက် တံတားဦးမြို့နယ် နွားတက်ကျေးရွာရှိ ထန်းလက်ကုလားထိုင်လုပ်ငန်းအား ကွင်းဆင်းလေ့လာခဲ့ပါသည်။၄င်းလုပ်ငန်းအား မိသားစု တစ်နိုင်တစ်ပိုင်ဖြင့် အိမ်တိုင်းလိုလိုပြုလုပ်၍ မိသားစုအပိုဝင်ငွေရရှိအောင်ပြုလုပ်ရောင်းချလျက်ရှိပါသည်။နွားတက် ကျေးရွာတွင် ထန်းလက်ကုလားထိုင်လုပ်ငန်းကို မိရိုးဖလာအဖြစ် လွန်ခဲ့သော(၁၅)နှစ်ခန့်မှလုပ်ကိုင် ‌‌ဆောင်ရွက်နေကြောင်းသိရှိရပါသည်။ ကုလားထိုင် တစ်လုံးပြုလုပ်မည်ဆိုပါက ထန်းအလက်(၃၀) ကုန်ကျမည်ဖြစ်ပြီး တစ်လက်လျှင်(၇၀)ကျပ်ဖြင့် ဝယ်ယူရကြောင်း ၊ ကုလားထိုင် တစ်လုံးအား ထန်းလက်များဖြင့်သာပြုလုပ်ထားပြီး ကုလားထိုင်ခိုင်ခံ့ရန်အတွက် သံမှိုကို အသုံးပြု၍ထိန်းထားကြောင်း၊ကုလားထိုင်တစ်လုံးလျှင်(၁)လက်မသံ နှင့် (၁)လက်မခွဲသံ (၅)ကျပ်သား ကုန်ကျမည်ဖြစ် ကြောင်း၊သံမှိုစျေးအနေဖြင့်(၇၀၀)ကျပ်ကုန်ကျကြောင်း၊ လူတစ်ဦးတစ်ရက်လျှင်ကုလားထိုင်(၃)လုံး ပြီးစီးကြောင်း၊ ကုလားထိုင်တစ်လုံးပြုလုပ်ရာတွင် အပြီးအစီး (၅၀၀၀-၆၀၀၀)ကျပ်ခန့် ကုန်ကျကြောင်း၊ ပြန်လည်ရောင်းချပါက တစ်လုံးလျှင်(၁၂၀၀၀-၁၃၀၀၀)ကျပ်အထိရှိပြီး ပြုလုပ်ရောင်းချသူများအနေ ဖြင့်နေ့တွက်သာမက စီးပွားရေးတွက်ခြေကိုက်ကြောင်း၊မပြုလုပ်နိုင်သူများမှငွေကြိုတင်ပေးဝယ်ယူကာ ကျေးရွာအနှံ့ဆိုင်ကယ်များပေါ်တင်၍ လှည့်လည်ရောင်းချကြောင်း ၊ ကြိုတင်ပေးအနေဖြင့် ကုလားထိုင်တစ်လုံးလျှင် (၆၅၀၀-၇၀၀၀)ကျပ်ပေးဝယ်၍ ပြန်လည်ရောင်းချကြခြင်းဖြစ်ကြောင်း၊ အခြားနယ်များမှလည်း အော်ဒါမှာယူ၍ဝယ်ယူကြကြောင်း၊လူတစ်ဦး တစ်နေ့(၃)လုံးနှုန်းဖြင့်ပြီးစီး အောင်ပြုလုပ်၍ရောင်းချပါက တစ်လလျှင် အကျိုးအမြတ်အနေဖြင့်(၄၅၀၀၀၀-၅၀၀၀၀၀)ကျပ် အထိ မြတ်ကြောင်း၊ထန်းလက်ကုလားထိုင်ပြုလုပ်ရောင်းချ၍ အသက်မွေးဝမ်းကြောင်းပြုသော နွားတက်ကျေးရွာသို့ကွင်းဆင်းလေ့လာမှုအရ သိရသည်။

DOCA(မန္တလေး)