ပြည်ခရိုင်၊ ရွှေတောင်မြို့နယ် ဝါးတောအုပ်စု၊ ဝါးလည်ကျေးရွာတွင် ကြက်ဟင်းခါးသီးများ စိုက်ထားရှိသူ တောင်သူ(၅)ဦးခန့်သာရှိပြီး ဇွန်လပထမပတ်တွင် စတင်စိုက်ပျိုးပြီး ဩဂုတ်လဒုတိယပတ်တွင် စတင်ခူးဆွတ်ရောင်းချရပါသည်။ ထိုဒေသတွင် စိုက်ပျိုးထားသော ကြက်ဟင်းခါးသီးမျိုးမှာ ဂုဏ်မာန်မျိုးဖြစ်ပြီး စိုက်ပျိုးသောစင်မှာ အလျား ၁၅တောင်၊ အနံ ၅၀တောင် ရှိသောစင်ဖြင့် စိုက်ပျိုးကြပါသည်။ စိုက်ပျိုးထုတ်လုပ် ကုန်ကျစရိတ် အနေဖြင့်စင်အပါအဝင် စုစုပေါင်း(၂)သိန်းကျပ်ခန့် ကုန်ကျကြောင်း သိရှိရပါသည်။ ကြက်ဟင်းခါးသီးများ စတင်ထွက်ပေါ်ချိန်တွင် (၃)ရက်လျှင် တစ်ကြိမ်ခူးဆွတ်ရ၍ တစ်ခါခူးဆွတ်လျှင် အလုံးရေ ၃၀၀မှ ၅၀၀ကြားရရှိသည်ဟုသိရှိရပြီး ကြက်ဟင်းခါးသီး ရာသီချိန်တွင် အလုံးရေ ၆၀၀၀ခန့် ခူးဆွတ်၍ ရောင်းချရကြောင်း သိရပါသည်။ သြဂုတ်လ နောက်ဆုံးပတ်တွင် ဈေးနှုန်းများအနေဖြင့် အထိုင်ဈေး တစ်လုံးလျှင် (၁၃၀-၁၅၀)ကျပ်ဖြင့် ရောင်းချ၍ ဈေးကွက်အနေဖြင့် ပေါက်ခေါင်းမြို့နယ်အတွင်းနှင့် အနီးအနားရှိ အခြားကျေးရွာများသို့ တင်ပို့ရောင်းချကြောင်း သိရပါသည်။ ကြက်ဟင်းခါးသီး ရောင်းရငွေမှာ (၇၈၀၀၀၀)ကျပ် ရရှိပြီး အသားတင်အကျိုးအမြတ်အနေဖြင့် (၅၈၀၀၀၀)ကျပ်ခန့် ရရှိသောသီးနှံဖြစ်၍ တောင်သူများအနေဖြင့် တစ်ဖက်တစ်လမ်းမှ ဝင်ငွေများရရှိအောင် စိုက်ပျိုးသင့်သော သီးနှံဖြစ်ပါသည်။
DOCA(ပဲခူး)