မကွေးတိုင်းဒေသကြီး၊ အောင်လံခရိုင်၊ အောင်လံမြို့နယ်အတွင်းရှိ မြို့လှ (ရွာမ)၊ မြို့လှ (ချိုင်းစု)၊ မြို့လှ(ကျောင်းစု)ကျေးရွာများတွင် ပဲတီစိမ်းသီးနှံမှာ အဓိကစိုက်ပျိုးသော သီးနှံအမျိုးအစားထဲတွင် တစ်ခုအပါအဝင်ဖြစ်ပြီး နှစ်စဉ်စိုက်ပျိုးလျက်ရှိကြောင်း၊ ပဲတီစိမ်းသီးနှံကို တစ်နှစ်လျှင် မိုး/ဆောင်း နှစ်ရာသီစိုက်ပျိုးကြပြီး ယခုနှစ်တွင် ပဲတီစိမ်းစိုက်ဧက (၁၂၀)ခန့်စိုက်ပျိုးထားကြောင်းသိရသည်။
ပဲတီစိမ်း(မိုး)ကို မေလကုန်-ဇွန်လဆန်းတွင် စတင်စိုက်ပျိုးကြပြီး ဩဂုတ်လကုန်တွင် လှိုင်လှိုင်ထွက်ပေါ်လျက်ရှိကြောင်း၊ မျိုးအနေဖြင့် ယခင်နှစ်တွင် ထွက်ရှိခဲ့သည့်ပဲတီစိမ်းများကို သန့်စင်ပြီး စနစ်တကျသိုလှောင်၍ ပြန်လည်စိုက်ပျိုးကြကြောင်း၊ စိုက်ပျိုးရာတွင် ထွန်ကြောင်းဆွဲ၍ ကြဲပက်စနစ်ဖြင့် တစ်ဧကလျှင် မျိုးစေ့(၈)ပြည်ခန့်ကုန်ကျကြောင်း၊ စိုက်ပျိုးထုတ်လုပ်မှုကုန်ကျစရိတ်အနေဖြင့် ကျပ်(၄၅၀၀၀၀)ခန့်ကုန်ကျပြီး အထွက်တင်း (၁၆-၁၉) တင်းခန့်ထွက်ရှိကြောင်း၊ ဈေးနှုန်းအနေဖြင့် ၂၀၂၄ခုနှစ်၊ စက်တင်ဘာလ(ပထမပတ်)တွင် ပဲတီစိမ်းတစ်တင်းလျှင် ကျပ်(၅၅၀၀၀-၅၈၀၀၀) ဈေးနှုန်းများဖြင့် အရောင်းအဝယ်ဖြစ်လျက်ရှိပြီး တစ်ဧကအကျိုးအမြတ်အနေဖြင့် ကျပ်(၆၅၀၀၀၀) ခန့်ရရှိကြောင်း၊ ထွက်ရှိသည့်ပဲတီစိမ်းများကို အောင်လံမြို့ရှိသီးနှံပွဲရုံများသို့ တင်ပို့ရောင်းချပြီး ထိုမှတစ်ဆင့် ရန်ကုန်မြို့သို့လည်းကောင်း၊ ရန်ကုန်မြို့မှတစ်ဆင့် ပြည်ပနိုင်ငံများဖြစ်သည့် တရုတ်၊ ဗီယက်နမ်နှင့် အင်ဒိုနီးရှားနိုင်ငံများသို့တင်ပို့ကြောင်း၊ ယခင်နှစ်ထက် အထွက်နှုန်းကောင်းမွန်သောကြောင့် တောင်သူများအနေဖြင့် ထိုက်သင့်သည့်အကျိုးအမြတ်များရရှိကြောင်းသိရှိရပါသည်။
DOCA(မကွေး)