ကမ္ဘောဒီးယားနိုင်ငံ၏ အဝတ်အထည်လုပ်ငန်းတွင် ရင်းနှီးမြှုပ်နှံရန် ဟောင်ကောင်လုပ်ငန်းမျက်စိကျနေ

     ဟောင်ကောင်ရှိ ကုန်သွယ်ရေးနှင့်ထောက်ပံ့မှုကွင်းဆက်စီမံခန့်ခွဲရေးကုမ္ပဏီဖြစ်သည့် Fung Group သည် ကမ္ဘောဒီးယား၏ အထူးစီးပွားရေးဇုန်များ၌ အထူးသဖြင့် ချည်မျှင်နှင့်အဝတ် အထည်လုပ်ငန်းတွင် ရင်းနှီးမြှုပ်နှံရန် စိတ်ဝင်စားနေကြောင်း သိရပါသည်။ အဆိုပါ စိတ်ဝင်စားမှုကို Fung Group ၏ ဒုတိယဥက္ကဌဖြစ်သူ Dr.William Kwok Lun Fung က ကမ္ဘောဒီးယားနိုင်ငံ၊ ဒုတိယဝန်ကြီးချုပ် Sun Chanthol နှင့် ဖနွမ်းပင်မြို့၌ စက်တင်ဘာလ ၂ ရက်နေ့က တွေ့ဆုံစဉ် ပြောကြားခဲ့ခြင်းဖြစ်ကြောင်း သိရပါသည်။ Chanthol သည် Dr.William အား Digital စနစ်သို့ လုံးဝကူးပြောင်းရေးအတွက် အဆင်သင့်ဖြစ်နေသော ငယ်ရွယ်ပြီးစွမ်းအင်ပြည့်ဝသော လုပ်သားထု၊ နိုင်ငံ၏ငြိမ်းချမ်းမှု၊ နိုင်ငံရေးနှင့်မက်ခရိုစီးပွားရေးတည်ငြိမ်မှု အစရှိသည့် ရင်းနှီးမြှုပ်နှံသူများက ကမ္ဘောဒီးယားတွင် ရင်းနှီးမြှုပ်နှံရန် စဉ်းစားသင့်သည့်များစွာသော အပေါင်းလက္ခဏာ ဆောင်သည့်အချက်များကို ပြောကြားခဲ့ကြောင်း သိရပါသည်။ ထို့ပြင် Chanthol က အစိုးရ၏ ကမ္ဘာနှင့်ဒေသတွင်းနိုင်ငံများ ကုန်ပစ္စည်းနှင့်ထုတ်ကုန်များ သယ်ယူပို့ဆောင်ရေးလွယ်ကူ အဆင်ပြေစေရန် ရည်ရွယ်၍ ပိုမိုကွဲပြားပြီး ဆက်သွယ်မှုကောင်းသော အခြေခံအ‌ဆောက်အအုံများအား ဖွံ့ဖြိုးတိုးတက်ရေးအတွက် အရှိန်အဟုန်မြှင့် ကြိုးပမ်းအားထုတ်နေကြောင်း ပြောကြားခဲ့ကြောင်း သိရှိရပါသည်။ ကမ္ဘောဒီးယား-တရုတ်စီးပွားရေးအသင်း တည်ထောင်သူနှင့်ဂုဏ်ထူးဆောင်ဥက္ကဌဖြစ်သူ Dr.Ben Li က လွန်ခဲ့သည့်(၁၀)စုနှစ် (၂)ခုတွင် ဟောင်ကောင်ရင်းနှီးမြှုပ်နှံသူများသည် ဖိနပ်များ၊ အဝတ်အထည်များ၊ ခြေအိတ်များပါဝင်သည့် ကုန်ထုတ်လုပ်ခြင်းကို အဓိကထားကြောင်း၊ သို့သော် ရင်းနှီးမြှုပ်နှံသူများသည် ၎င်းတို့၏ စိတ်ဝင်စားမှုကို သယ်ယူပို့ဆောင်ရေးလုပ်ငန်းစဉ်ကဏ္ဍသို့ ပြောင်းလဲသွားခဲ့ကြောင်း ပြောကြားခဲ့ပါသည်။ ထို့ပြင် Dr.Ben Li က ကမ္ဘောဒီးယားသည် ဆန်းသစ်တီထွင်ခြင်း၊ အစိမ်းရောင်နည်းပညာနှင့် လေဆိပ်သစ်များပါဝင်သည့် သယ်ယူပို့ဆောင်ရေး အခြေခံအဆောက်အအုံများ အစရှိသည့်နယ်ပယ်များတွင် ဖွံ့ဖြိုးတိုးတက်လျက်ရှိကြောင်းနှင့် ဟောင်ကောင်သည် ကမ္ဘောဒီးယားနိုင်ငံအား ကမ္ဘာနှင့်ချိတ်ဆက်ရန် ၎င်းတို့ကျွမ်းကျင်သည့် လေကြောင်း၊ ကုန်းလမ်း၊ ရေကြောင်း သယ်ယူပို့‌ဆောင်ရေးစနစ်များတွင် ကူညီပေးရန် စွမ်းဆောင်နိုင်ကြောင်း ပြောကြားခဲ့ပါသည်။ ဟောင်ကောင်သည် ကမ္ဘောဒီးယားတွင် အကြီးမားဆုံးဆွယ်တာ အင်္ကျီထုတ်လုပ်သူအဖြစ် ရပ်တည်နေပြီး ရင်းနှီးမြှုပ်နှံသူများသည် ကမ္ဘောဒီးယား၏ အလားအလာရှိသော ဖွံ့ဖြိုးတိုးတက်မှုကို နားလည်သဘောပေါက်လျက်ရှိကြောင်း သိရပါသည်။ ထို့ပြင် နိုင်ငံသည် စားသောက်ဆိုင်များ၊ လက်လီအရောင်းဆိုင်များနှင့် ဟိုတယ်များ အစရှိသည့် ဝန်ဆောင်မှုလုပ်ငန်းများတွင်လည်း အားကောင်းစွာ မြှင့်တင်လျှက်ရှိကြောင်း သိရှိရပါသည်။

 DOCA(ရန်ကုန်)