ဗီယက်နမ်နိုင်ငံ စိုက်ပျိုးမွေးမြူရေးနှင့် ကျေးလက်ဒေသဖွံ့ဖြိုးတိုးတက်ရေးဝန်ကြီးဌာန၏ အဆိုအရ ယခုနှစ်၏ လွန်ခဲ့သည့်(၈)လတွင် အမေရိကန်နိုင်ငံသည် တရုတ်ကိုကျော်ဖြတ်ကာ ဗီယက်နမ်၏ စိုက်ပျိုးရေး-သစ်တောလုပ်ငန်း-ငါးလုပ်ငန်း ထုတ်ကုန်များအတွက် အကြီးမားဆုံး ဈေးကွက်ဖြစ်လာကြောင်း သိရပါသည်။ အဆိုပါ ကာလအတွင်း ဗီယက်နမ်သည် အမေရိကန် ဈေးကွက်ထံမှ အမေရိကန်ဒေါ်လာ ၈.၅၈ ဘီလီယံရရှိခဲ့ကြောင်း သိရပါသည်။ ထိုပမာဏသည် အဆိုပါကဏ္ဍတွင် ဗီယက်နမ်၏ စုစုပေါင်းတင်ပို့မှု၏ ၂၁.၄ ရာခိုင်နှုန်းရှိပြီး လွန်ခဲ့သည့်နှစ်တူညီသည့်ကာလထက် ၂၃.၅ ရာခိုင်နှုန်း မြင့်တက်ခဲ့ကြောင်း သိရပါသည်။ ထိုအချိန်တွင် တရုတ်သို့တင်ပို့မှုမှာ အမေရိကန်ဒေါ်လာ ၈.၁၇ ဘီလီယံရှိပြီး စုစုပေါင်းတင်ပို့မှု၏ ၂၀.၄ ရာခိုင်နှုန်းရှိကာ လွန်ခဲ့သည့်နှစ် တူညီသည့်ကာလထက် ၁၀.၂ ရာခိုင်နှုန်း ကြီးထွားခဲ့ကြောင်း သိရပါသည်။ လွန်ခဲ့သည့်နှစ်တွင် တရုတ်သည် ဗီယက်နမ်၏ စိုက်ပျိုးရေး-သစ်တောလုပ်ငန်း-ငါးလုပ်ငန်း ထုတ်ကုန်များကို အဓိကတင်သွင်းသူဖြစ်ပြီး အဆိုပါကဏ္ဍတင်ပို့မှု၏ ၂၃.၂ ရာခိုင်နှုန်းရှိကြောင်း သိရပါသည်။ သို့သော် ယခုနှစ်၏ ပထမ(၈)လတွင် အဆိုပါကဏ္ဍ၌ အမေရိကန်က နံပါတ်(၁)ဖြစ်ခဲ့သည့်အတွက် အပြောင်းအလဲဖြစ်ပေါ်ခဲ့ကြောင်း သိရပါသည်။
Source: Vietnam Plus
DOCA(ရန်ကုန်)