ကမ္ဘာလုံးဆိုင်ရာ ဈေးကွက်ပြန်လည်နာလန်ထူလာမှုနောက်တွင် ဗီယက်နမ်နိုင်ငံတောင်ပိုင်းရှိ နိုင်ငံခြားတိုက်ရိုက်ရင်းနှီးမြှုပ်နှံမှု(FDI)ကို ဆွဲဆောင်ရာ Dong Nai ပြည်နယ်သည် ယခုနှစ် ဇန်နဝါရီလမှ ဩဂုတ်လအတွင်း ကုန်သွယ်ရေးပိုငွေ အမေရိကန်ဒေါ်လာ ၄.၂ ဘီလီယံ ရရှိ ခဲ့ကြောင်း ပြည်နယ်၏စာရင်းအင်းရုံး၏ အဆိုအရ သိရပါသည်။ ထို(၈)လတာကာလအတွင်း ပြည်နယ်သည် အမေရိကန်ဒေါ်လာ ၁၅.၅ ဘီလီယံတန်ဖိုးရှိသည့် ထုတ်ကုန်များကို ပြည်ပသို့ တင်ပို့ခဲ့ပြီး အမေရိကန်ဒေါ်လာ ၁၁.၃ ဘီလီယံတန်ဖိုး ပြန်လည်တင်သွင်းခဲ့ကာ လွန်ခဲ့သည့်နှစ် တူညီသည့်ကာလထက် ၈.၆ ရာခိုင်နှုန်းနှင့် ၈.၇ ရာခိုင်နှုန်း အသီးသီးမြင့်တက်ခဲ့ကြောင်း သိရပါသည်။ အမေရိကန်၊ ဥရောပနှင့် တရုတ်ကဲ့သို့သော ကြီးမားသည့် ကုန်သွယ်ရေးမိတ်ဖက်များထံမှ မှာယူမှု များစွာရရှိခဲ့ခြင်းကြောင့် ယခုလိုမြင့်တက်ခဲ့ခြင်းဖြစ်ကြောင်း သိရပါသည်။ ထို့ပြင် တင်ပို့မှုအများစု အထူးသဖြင့် သီဟိုဠ်စေ့၊ ကော်ဖီနှင့် ငရုတ်ကောင်းတို့၏ ဈေးနှုန်းများမြင့်တက်ခဲ့ခြင်းက ယခုလို တင်ပို့မှုဝင်ငွေမြင့်တက်ရာတွင် ပါဝင်ခဲ့ခြင်းဖြစ်ကြောင်း သိရပါသည်။ အဆိုပါ ကာလအတွင်း ဆေးရွက်ကြီး ၈.၅ ရာခိုင်နှုန်း၊ အဝတ်အထည်နှင့်ချည်မျှင် ၇.၆ ရာခိုင်နှုန်း၊ သားရေနှင့်ဆက်စပ် ထုတ်ကုန်များ ၆.၇ ရာခိုင်နှုန်း၊ ရာဘာနှင့်ပလတ်စတစ်ထုတ်ကုန်များ ၁၀.၇ ရာခိုင်နှုန်းနှင့် လျှပ်စစ် တပ်ဆင်ပစ္စည်းများ ၁၀ ရာခိုင်နှုန်း အသီးသီးမြင့်တက်ခဲ့ခြင်းကြောင့် ပြည်နယ်၏ စက်မှုကုန်ထုတ် လုပ်မှုအညွှန်းကိန်းမှာ လွန်ခဲ့သည့်နှစ်တူညီသည့်ကာလထက် ၇.၃ ရာခိုင်နှုန်း ကြီးထွားမှုဖြစ်ခဲ့ကြောင်း သိရပါသည်။ လက်ကျန်လများအတွက်လည်း ပြည်နယ်အစိုးရသည် လုပ်ငန်းများ အတွက် အတားအဆီးများကို ဖယ်ရှားပေးမည့်စီမံချက်များကို ဆက်လက်ဆောင်ရွက်သွားမည် ဖြစ်ပြီး ၎င်းတို့အတွက် တင်ပို့ရာဈေးကွက်များတိုးချဲ့ရန်နှင့် ကုန်သွယ်ရေးသဘောတူညီချက်များ ရရှိရန် ကူညီပေးသွားမည်ဟု သိရပါသည်။
Source: Vietnam Plus
DOCA(ရန်ကုန်)