ပင်မှည့်သီးသည် သရက်သီး၊ သမင်မျက်လုံးသီး(Longan)၊ လိုင်ချီးသီးနှင့် နဂါးမောက်သီးတို့၏နောက်တွင် ဩစတြေးလျသို့ တရားဝင်တင်ပို့ခဲ့သည့် (၅)ခုမြောက်အမျိုးအစားဖြစ်လာကြောင်း သိရပါသည်။ စက်တင်ဘာလ ၉ ရက်နေ့တွင် ဗီယက်နမ်နိုင်ငံ အပင်ကာကွယ်ရေးဦးစီးဌာနနှင့် ဗီယက်နမ်နိုင်ငံရှိ ဩစတြေးလျသံရုံးနှင့်ပူးပေါင်း၍ ဗီယက်နမ်ပင်မှည့်သီးများ ဩစတြေးလျသို့တင်ပို့မှုနှင့် ဩစတြေးလျမက်မန်းသီးများအား ဗီယက်နမ်က တင်သွင်းမှုတို့ကို ကြေညာရန် အခမ်းအနားပြုလုပ်ခဲ့ကြောင်း သိရပါသည်။ အပင်ကာကွယ်ရေးဦးစီးဌာန၏ ညွှန်ကြားရေးမှူးဖြစ်သူ Huynh Tan Dat က ဗီယက်နမ်တွင် အပူပိုင်းဒေသထွက် သစ်သီးများတွင် ကြီးမားသည့်အလားအလာနှင့် အခွင့်အရေးရှိနေကြောင်း ပြောကြားခဲ့ပါသည်။ လတ်တလောတွင် ဗီယက်နမ်သစ်သီးများသည် နိုင်ငံ(၆၀)ကျော်တွင် ဝယ်ယူရရှိနိုင်ပြီဟု သိရပါသည်။ အထူးသဖြင့် ပင်မှည့်သီးများကို လတ်ဆတ်သော ပင်မှည့်သီး၊ အေးခဲထားသော ပင်မှည့်သီးနှင့် ဖျော်ရည်အစရှိသောပုံစံမျိုးစုံစံဖြင့် နိုင်ငံ(၂၀)ကို တင်ပို့ခဲ့ပြီးဖြစ်ကြောင်း သိရပါသည်။ ဗီယက်နမ်တွင် ပင်မှည့်သီး စိုက်သည့်ဧရိယာမှာ ၁၂၀၀၀ ဟတ်တာရှိပြီး လတ်တလောတွင် ထပ်မံတိုးချဲ့နေကြောင်း သိရပါသည်။ လတ်တလောနှစ်များတွင် ဗီယက်နမ် သည် အမျိုးအစား(၂)မျိုးဖြစ်သည့် အဝါရောင်ပင်မှည့်သီးနှင့် ခရမ်းရောင်ပင်မှည့်သီးတို့၏ အရည်အသွေးကိုမြှင့်တင်ရန် အာရုံစိုက်ခဲ့ကြောင်း သိရပါသည်။ မကြာမီအချိန်တွင် အပင်ကာကွယ်ရေးဦးစီးဌာနသည် စိုက်ပျိုးရေးသမားများနှင့်ဒေသခံများအား တင်သွင်းမည့် နိုင်ငံများ၏ လိုအပ်ချက်နှင့် ထုတ်လုပ်မှုမြှင့်တင်ရန်၊ ပင်မှည့်သီးထုတ်ကုန်များ ၏ အကျိုးကျေးဇူးရရှိမှုကို ဆက်လက်မြှင့်တင်နိုင်ရန် လမ်းညွှန်မှုပေးသွားမည်ဟု သိရပါသည်။ ဗီယက်နမ်နိုင်ငံဆိုင်ရာ ဩစတြေးလျသံအမတ်ကြီး Andrew Goledzinowski က ဗီယက်နမ်နှင့် ဩစတြေးလျတို့သည် သစ်သီးများပါဝင်သည့် စိုက်ပျိုးရေးထွက်ကုန်များကုန်သွယ်ရာတွင် မိတ်ဖက်များဖြစ်ကြောင်းနှင့် တစ်နိုင်ငံမှ များစွာသောအရည်အသွေးမြင့်သစ်သီးများသည် တစ်နိုင်ငံ၏ ဈေးကွက်ထဲသို့ ရောက်ရှိကြကြောင်း ပြောကြားခဲ့ပါသည်။ ထို့ပြင် သံအမတ်ကြီးက နှစ်နိုင်ငံလုံးသည် ဗီယက်နမ် စပျစ်သီးများနှင့် ဩစတြေးလျ ဘလူးဘယ်ရီသီးများကို အပြန်အလှန် တင်ပို့ကြရန်အတွက် ဆွေးနွေးမှုများကို အပြီးသတ်နိုင်ရန် ဆက်လက်ကြိုးပမ်းကြမည်ဟု ပြောကြားခဲ့ပါသည်။
Source: Vietnam Plus
DOCA(ရန်ကုန်)