ကြံစိုက်ပျိုးသူများအတွက် တည်ငြိမ်သော အကျိုးအမြတ်ရရှိစေရန် ပြည်တွင်းရောင်းလိုအား ဟန်ချက်ညီရန် အစိုးရ၏ စီမံချက်တစ်စိတ်တစ်ပိုင်းအနေဖြင့် ဖိလစ်ပိုင်သည် အမေရိကန်သို့ သကြားအကြမ်းထည် ၂၅၃၀၀ မက်ထရစ်တန်ကို ၃-၉-၂၀၂၄ ရက်နေ့က တင်ပို့ခဲ့ပြီး အမေရိကန် ဈေးကွက်သို့ တရားဝင်ပြန်လည်ဝင်ရောက်ခဲ့ကြောင်း သိရပါသည်။ အမေရိကန်၏ အကောက်ခွန်နှုန်း၊ ခွဲတမ်း(TRQ)စနစ်အောက်တွင် သကြားတင်သွင်းရန်အတွက် စက်တင်ဘာလ ၃၀ ရက်နေ့ နောက်ဆုံးထား၍ အမေရိကန်နိုင်ငံ၊ ကာလီဖိုးနီးယားပြည်နယ်သို့ အရောက် တင်ပို့ရမည်ဟု သိရပါသည်။ ဖိလစ်ပိုင်သည် တင်သွင်းသည့်ကုန်ပစ္စည်းများအား အတော်အသင့်နည်းပါးသည့် အကောက်ခွန်နှုန်းထားဖြင့် ဝင်ရောက်ရန်ခွင့်ပြုသည့် အမေရိကန် ၏ TRQ စနစ်အောက်တွင် အကျိုးအမြတ်ရရှိနေသူများထဲမှ တစ်ခုဖြစ်ကြောင်း သိရပါသည်။ ဖိလစ်ပိုင်နိုင်ငံ သကြားစီမံခန့်ခွဲ ရေးအာဏာပိုင်အဖွဲ့(SRA)၏ CEO ဖြစ်သူ Pablo Luiz Azcona က ယခုလိုတင်ပို့ခြင်းသည် ယခုလ အကုန်တွင် ကြိတ်ခွဲမှုစတင်သောအခါ နိုင်ငံအတွင်း သကြားရောင်းလိုအားကို ဟန်ချက်ညီစေမည် ဟု ပြောကြားခဲ့ပါသည်။ လွန်ခဲ့သည့်လတွင် SRA ဘုတ်အဖွဲ့သည် ပြည်တွင်း၌ထုတ်လုပ်သည့် သကြားအကြမ်းထည်အချို့ကို ထပ်မံပြုပြင် ခွဲတမ်းချသည့် စည်းမျဉ်းဖြစ်သည့် Sugar Order 3 ကို ထုတ်ပြန်ခဲ့ပါသည်။ ၂၀၂၀-၂၀၂၁ ကောက်ရိတ်သိမ်းနှစ်မှစ၍ ပြည်တွင်းထွက်ရှိမှုသည် ဝယ်လိုအား အောက်နိမ့်ကျနေမှုကြောင့် ဖိလစ်ပိုင်သည် အမေရိကန်သို့ သကြားဖိလစ်ပိုင် အကြမ်းထည်အား (၂)နှစ်ဆက် တင်ပို့နိုင်ခြင်းမရှိကြောင်း သိရပါသည်။ သကြားလုပ်ငန်းဖွံ့ဖြိုးတိုးတက်ရေးနှင့် ဆက်စပ်၍ ပြည်တွင်းသကြားစက်များသည် ကုန်သွယ်ရေးသဘောတူညီချက်အရ UAE နိုင်ငံထံမှတင်သွင်း မည့် သန့်စင်ထားသော သကြားများအတွက် အစိုးရ၏ အကောက်ခွန်လျှော့ချပေးမည့် မည်သည့်အစီအစဉ်ကိုမဆို ဆန့်ကျင်ကြကြောင်းသိရပါသည်။ ဖိလစ်ပိုင်သကြားစက်များအသင်း (PSMA) က လတ်တလော အကောက်ခွန်ကော်မရှင်ကြားနာမှုအတွင်း ကျယ်ပြန့်သော စီးပွားရေး မိတ်ဖက်သဘောတူညီချက်၏ တစ်စိတ်တစ်ပိုင်းဖြစ်သောကြောင့် နိုင်ငံ၏ သန့်စင်ထားသော သကြားအပေါ် အကောက်ခွန်များကို ဖြတ်တောက်ရန် တောင်းဆိုချက်များကို ခွင့်မပြု သင့်ကြောင်း ၎င်းတို့၏ ဆန့်ကျင်မှုကို ပြောကြားခဲ့ကြောင်း သိရပါသည်။ PSMA ၏ ညွှန်ကြားရေးမှူးဖြစ်သူ Jesus Barrera က UAE တွင် ကမ္ဘာ့အကြီးမားဆုံးသကြားသန့်စင် စက်ရုံများထဲမှ တစ်ခုရှိကြောင်းနှင့် ဖိလစ်ပိုင်သို့ ၎င်းတို့၏ တင်ပို့မှုများကို နည်းပါးသော အကောက်ခွန်နှုန်းထားများဖြန့်ဝင်ရောက်ခွင့်ပြုပါက ပြည်တွင်း သကြားလုပ်ငန်းကို ထိခိုက် စေမည်ဖြစ်ကြောင်း ပြောကြားခဲ့ပါသည်။ UAE ၏ သကြားသန့်စင်စက်ရုံထဲမှ တစ်ခု၏ ထုတ်လုပ်နိုင်စွမ်းမှာ မက်ထရစ်တန် ၁.၅ သန်း ရှိပြီး အဆိုပါ ပမာဏသည် ဖိလစ်ပိုင် တစ်နိုင်ငံလုံး ထုတ်လုပ်နိုင်စွမ်းနှင့် ညီမျှကြောင်းသိရပါသည်။ ကုန်သွယ်ရေးတာဝန်ရှိသူများကလည်း ကုန်သွယ်ရေးကော်မရှင်ကြားနာမှုအတွင်း UAE သည် သန့်စင်ထားသော သကြားအပေါ်တွင် ဖိလစ်ပိုင်ကောက်ခံမည့် အကောက်ခွန်ကို လျှော့ချပေးရန် ဆန္ဒရှိကြောင်း အတည်ပြုပြောကြားခဲ့ကြောင်း သိရပါသည်။
Source: Philippines Star
DOCA(ရန်ကုန်)