ထိုင်းနိုင်ငံ၏ ဆန်တင်ပို့မှု ရှေ့လာမည့်နှစ်တွင် လျော့ကျဖွယ်ရှိ

    ထိုင်းဘတ်ငွေတန်ဖိုးသည် ခိုင်မာအားကောင်းလျက်ရှိပြီး အိန္ဒိယနိုင်ငံအနေဖြင့် ယခုနှစ် နှစ်ကုန်ပိုင်းတွင် ဆန်တင်ပို့မှုကန့်သတ်ချက်များကို ဖြေလျှော့ပေးဖွယ်ရှိခြင်းကြောင့် ထိုင်းဆန်၏ ဈေးကွက်ယှဉ်ပြိုင်နိုင်စွမ်း နည်းပါးမည့်အခြေအနေရှိပြီး ထိုင်းနိုင်ငံ၏ ဆန်တင်ပို့မှုမှာ ရှေ့လာမည့် နှစ်၌ တန်ချိန် ၈ သန်းအောက် လျော့ကျနိုင်ကြောင်း Bangkok Post သတင်းဌာနက ဖော်ပြထား ပါသည်။

   ထိုင်းဆန်တင်ပို့သူများအသင်း၏ ဂုဏ်ထူးဆောင်ဥက္ကဋ္ဌ Chookiat Ophaswongse က နိုင်ငံ၏ မြောက်ဘက်နှင့် အရှေ့မြောက်ပိုင်းဒေသများတွင် အချိန်ကြာမြင့်စွာ ရေလွှမ်းမိုးမှုကို ကြုံ တွေ့နေရသော်လည်း ယခုနှစ်အတွက် ဆန်တင်ပို့မှုကို ထိခိုက်မှုရှိမည်မဟုတ်ကြောင်း ပြောကြား ခဲ့သည်။ ထိုင်းနိုင်ငံအနေဖြင့် ယခုနှစ်တွင် တင်ပို့ရန်လျာထားသည့် ဆန်တန်ချိန် ၈ ဒသမ ၂ သန်း ထက် ကျော်လွန်တင်ပို့နိုင်လိမ့်မည်ဖြစ်ပြီး လက်ကျန်ကာလများ၌ ၁ လလျှင် ပျမ်းမျှဆန်တန်ချိန် ၆ သိန်း တင်ပို့ပါက စုစုပေါင်းတင်ပို့မှုသည် တန်ချိန် ၉ သန်းအထိ ရောက်ရှိနိုင်မည်ဟု အဆိုပါ ကုန်သည်အသင်းက မျှော်မှန်းထားသည်။

     အင်ဒိုနီးရှားနိုင်ငံရှိ ဝယ်ယူရေးအေဂျင်စီ BULOG သည် လစဉ်ပျမ်းမျှဆန်တန်ချိန် ၄၅၀၀၀၀ ခန့်ကို တင်ဒါခေါ်ယူ၍ တင်သွင်းလျက်ရှိသော်လည်း ထိုင်းဆန်ဈေးနှုန်းများသည် ဗီယက်နမ်၊ မြန်မာနှင့် ပါကစ္စတန်တို့မှ ဈေးနှုန်း ပိုမိုသက်သာသောဆန်များနှင့် ယှဉ်ပြိုင်နိုင်စွမ်းမရှိပဲ တင်ဒါ ဝင်ရောက်ယှဉ်ပြိုင်မှုတွင် ရှံးနိမ့်ခဲ့ရသည်။ ဗီယက်နမ်၊ အိန္ဒိယ၊ ပါကစ္စတန်နှင့် မြန်မာတို့၏ ဆန်စပါး ထုတ်လုပ်မှုမှာ လာနီညာရာသီဥတုဖြစ်စဉ် ကာလ၌ မိုးရေချိန်လုံလောက်စွာရရှိမှုကြောင့် တိုးတက်ကောင်းမွန်မှုရှိပြီး ကမ္ဘာ့ဈေးကွက်အတွင်း ဆန်ပေးသွင်းနိုင်မှု မြင့်မားလျက်ရှိသည်။

       ထို့အပြင် ယခုနှစ် စတုတ္ထသုံးလပတ်အတွင်း ဆန်ဖြူတင်ပို့မှုကို ပြန်လည်ခွင့်ပြုရန် အိန္ဒိယ နိုင်ငံဘက်မှ အချက်ပြမှုရှိနေပြီး ဈေးကွက်ဝေစုရရှိရန် ယှဉ်ပြိုင်လာမည့် အခြေအနေက ကမ္ဘာ့ဆန် ဈေးနှုန်းများကို ကျဆင်းစေဖွယ်ရှိနေသည်။ အဆိုပါအချက်က ထိုင်းပြည်တွင်းဈေးကွက်အတွင်း ဆန်ဈေးနှုန်းများကိုလည်း ကျဆင်းစေနိုင်သည်ဟု ထိုင်းဆန်တင်ပို့သူများအသင်းက ပြောဆိုထား သည်။

     အမေရိကန် စိုက်ပျိုးရေးဦးစီးဌာနက အိန္ဒိယနိုင်ငံသည် ၂၀၂၅ ခုနှစ်တွင်လည်း ဆန်တန်ချိန် သန်း ၂၀ ခန့်ကို တင်ပို့လျက် ကမ္ဘာ့အကြီးမားဆုံး ဆန်တင်ပို့သည့်နိုင်ငံအဖြစ် ဆက်လက်တည်ရှိ နိုင်မည်ဟု ခန့်မှန်းထားသည်။ အဆိုပါ ခန့်မှန်းချက်အရ ၎င်း၏နောက်တွင် ထိုင်းနိုင်ငံသည် ဆန် တန်ချိန် ၇ ဒသမ ၅ သန်း၊ ဗီယက်နမ်သည် ဆန်တန်ချိန် ၇ ဒသမ ၅ သန်းနှင့် ပါကစ္စတန်သည် ဆန် တန်ချိန် ၅ ဒသမ ၆ သန်း အသီးသီး တင်ပို့နိုင်ဖွယ်ရှိကြောင်း သိရှိရသည်။

    ထိုင်းဆန်တင်ပို့သူများအသင်းကမူ အိန္ဒိယ၏ဆန်တင်ပို့မှု ပြန်လည်စတင်နိုင်ခြင်းနှင့် ထိုင်း ဘတ်ငွေတန်ဖိုး ခိုင်မာအားကောင်းခြင်းကြောင့် ၂၀၂၅ ခုနှစ်တွင် ဆန်တင်ပို့ရန် ကျပ်တည်းခက်ခဲမှု ရှိမည်ဖြစ်ပြီး ဆန်တန်ချိန် ၇ သန်းမှ ၇ ဒသမ ၅ သန်းအတွင်းသာ လျော့ကျတင်ပို့မှုကို ဖြစ်ပေါ်စေ နိုင်ကြောင်း သတိပေးပြောကြားထားသည်။

    ထိုင်းနိုင်ငံအနေဖြင့် ပြည်တွင်းဆန်ဈေးကွက်ကို မြှင့်တင်ရန်၊ ဆန်နှင့် ဆန်ထွက်ကုန်ပစ္စည်း များ ဖွံ့ဖြိုးတိုးတက်ရေးအတွက် အစိုးရက ချမှတ်ဆောင်ရွက်လျက်ရှိသော မူဝါဒများနှင့် စပ်လျဉ်း ၍ ကုန်သွယ်ရေးမိတ်ဖက်များအကြား ယုံကြည်မှုကို တိုးမြှင့်ရန် ရည်ရွယ်ချက်များဖြင့် စီးပွားရေး နှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး Suchart Chomklin က သဘာပတိဥက္ကဋ္ဌ အဖြစ် ဦးဆောင်လျက် “ထိုင်းဆန်ကွန်ယက်ချိတ်ဆက်မှုဖိုရမ်ဆွေးနွေးပွဲ ၂၀၂၄” ကို စက်တင်ဘာ တတိယသီတင်းပတ်၌ ကျင်းပခဲ့သည်။

    ထိုင်းနိုင်ငံ၏ ဆန်တင်ပို့မှုအခြေအနေမှာ တိုးတက်မှုလမ်းကြောင်းပေါ်တွင် တည်ရှိနေပြီး ၂၀၂၄ ခုနှစ် ပထမ ၇ လအတွင်း ဆန်တန်ချိန် ၅ ဒသမ ၆၈ သန်းတင်ပို့ခဲ့ရာ ယခင်နှစ်ကာလတူ တင်ပို့နိုင်မှုအပေါ် ၂၂ ရာခိုင်နှုန်း တိုးတက်ခဲ့သည်။ အဆိုပါ တိုးတက်တင်ပို့မှုသည် တန်ဖိုးအားဖြင့် ဘတ်ငွေ ၁၃၂ ဘီလီယံရှိပြီး ယခင်နှစ်ကာလတူထက် ၅၁ ရာခိုင်နှုန်း ပိုမိုလာခြင်းဖြစ်သည်။ ထိုကဲ့ သို့ ထိုင်းဆန်တင်ပို့မှု တိုးတက်လာရခြင်းမှာ အိန္ဒိယနိုင်ငံက ဆန်တင်ပို့မှုတားမြစ် ကန့်သတ်ထား ချိန်၌ ဆန်တင်သွင်းသည့် နိုင်ငံအများအပြားက ပြည်တွင်းစားသုံးရန်နှင့်  စားနပ်ရိက္ခာဖူလုံရေး အရန်ဆန်ထားရှိရန်အတွက် ပိုမိုတင်သွင်းလာခြင်းကြောင့်ဖြစ်ကြောင်း Bangkok Post သတင်း ဌာနက ဖော်ပြထားသည်။

Source: Bangkok Post, 18 Sept 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)