ပဲခူးတိုင်းဒေသကြီး၊ သာယာဝတီခရိုင်၊ ကြို့ပင်ကောက်မြို့နယ်ရှိ ဩဇာသီးများသည် ကျွန်းကုန်းကြီးကျေးရွာ၊ ရွာသာကုန်းကျေးရွာနှင့် နှစ်ရွာကျေးရွာများတွင် အများဆုံးစိုက်ပျိုးထွက်ရှိပါသည်။
ဩဇာသီးပင်များသည် နှစ်ရှည်သီးနှံဖြစ်သဖြင့် အိမ်တိုင်းနီးပါး၏ ခြံနှင့် အိမ်ခြံစည်းရိုးများတွင်လည်းစိုက်ပျိုးကျပါသည်။ ယခုလအချိန် ဩဇာသီးပေါ်ချိန်ဖြစ်သည့်အတွက် ပြန်ရောင်းသမားများက အပင်ပြတ်ဝယ်ယူကြသကဲ့သို့ ခြံများတွင် လိုက်လံကြည့်ရှုကာ အသီးများလိုက်ကောက်၍ ဝယ်ယူကြကြောင်းသိရပါသည်။ ကြို့ပင်ကောက်မြို့တွင် ခွန်နှစ်ရွာဩဇာသီးဟု နာမည်ကြီးပြီး ၎င်းရွာမှ အများဆုံးထွက်ရှိပါသည်။ ခွန်နှစ်ရွာရွာသည် ရန်ကုန်ပြည်ကားလမ်းဘေး၊ အရှေ့အနောက်ဘက်များတွင်တည်ရှိပြီး ဩဇာသီးပေါ်ချိန်တွင် အိမ်ရှေ့ကားလမ်းဘေးများ၌ တဲဆိုင်များထိုး၍ ရောင်းချကြပါသည်။ ခြင်းအလိုက်(၁၀)လုံးတစ်ခြင်း၊ (၁၅)လုံးတစ်ခြင်းဖြင့်ရောင်းချပါသည်။
ယခုစက်တင်ဘာလ၊ ဒုတိယအပတ်မှစ၍ ဩဇာသီးပေါ်ချိန်တွင် အလုံးအကြီး/အသေးပေါ်မူတည်၍ (၁၂၀၀/၁၀၀၀/၉၀၀/၇၀၀) ကျပ်နှုန်းအထိဈေးရကြောင်း၊ လက်ဆောင်ပေးရန်နှင့် ခရီးသွားကားများကလည်း ဝယ်ယူကြကြောင်းသိရှိရပါသည်။ ယခုအချိန်တွင် ဩဇာသီးများ လှိုင်လှိုင်မပေါ်သေးသဖြင့် ဈေးကောင်းရရှိကြောင်းသိရှိရပါသည်။
DOCA(ပဲခူး)