မကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ်၊ လက်ပံတောကျေးရွာ၌ နှမ်း၊ မြေပဲ၊ ကုလားပဲ၊ ပဲတီစိမ်း၊ မတ်ပဲနှင့် ပဲစင်းငုံသီးနှံများကို စိုက်ပျိုးကြပြီး တောင်သူ (၁၀)ဦးခန့်အနေဖြင့် မြေပဲစိုက်ဧက(၁၅၀)ဧကကို ၂၀၂၄ခုနှစ်၊ ဩဂုတ်လတွင် စတင်စိုက်ပျိုးခဲ့ကြောင်းသိရသည်။
မျိုးအနေဖြင့် ပင်ထောင်(အနီ)မျိုးကို ထွန်ကြောင်းဆွဲအစေ့ချစနစ်ဖြင့်စိုက်ပျိုးကြပြီး (၁)ဧကလျှင် မျိုး(၃)တင်းခန့်ကုန်ကျကြောင်း၊ မျိုးကို ယခင်နှစ်မြေပဲစိုက်ခင်းမှထွက်ရှိသည့် မြေပဲများကို မျိုးအနေဖြင့်ဖယ်ချန်၍ စိုက်ပျိုးခြင်းဖြစ်ကြောင်း၊ အပင်သက်တမ်း(၃)လအကြာတွင် ခူးဆွတ်ရကြောင်း၊ စိုက်ပျိုးစရိတ်အနေဖြင့် မြေပြုပြင်ခ၊ လုပ်အားခနှင့် အခြားသွင်းအားစုစရိတ်အပါအဝင် ကျပ်(၆၅၀၀၀၀) ခန့်ကုန်ကျကြောင်း၊ အထွက်နှုန်းအနေဖြင့် ယခင်နှစ်တွင် (၁)ဧကလျှင် တင်း(၁၀၀)နီးပါးထွက်ရှိခဲ့ပြီး ဈေးနှုန်းအနေဖြင့် မြေပဲတောင့်(၁)တင်းလျှင် ကျပ်(၂၀၀၀၀)၊ ဈေးရရှိခဲ့ကြောင်း၊ ဈေးကွက်အနေဖြင့် မင်းဘူးမြို့ရှိ ပွဲရုံများသို့တင်ပို့ရောင်းချကြောင်း လက်ပံတောကျေးရွာနေ မြေပဲစိုက်တောင်သူ ဒေါ်ဌေးထံမှသိရှိရပါသည်။
DOCA(မကွေး)