မန္တလေးတိုင်းဒေသကြီး၊ ညောင်ဦးခရိုင်၊ ကျောက်ပန်းတောင်းမြို့နယ်တွင် ဆီထွက်သီးနှံဖြစ်သည့်မြေပဲကို အဓိကစိုက်ပျိုးလျက်ရှိပြီး ဆောင်းမြေပဲကိုအနည်းငယ်သာစိုက်ပျိုးမှုရှိပါသည်။ ၂၀၂၄-၂၀၂၅ ခုနှစ်တွင် မြေပဲကိုစိုက်ပျိုးရန် လျာထားမှုအနေဖြင့် (၅၈၂၇၁)ဧကရှိပြီး၊ မိုးရာသီကုန်အထိ (၅၂၆၂၅)ဧက စိုက်ပျိုးခဲ့ပြီး၊ ယခုစိုက်ဧက(၂၄၅၁၁)ဧက ရိတ်သိမ်းခဲ့ရာ၊ အထွက်နှုန်းမှာ (၃၉.၇၅)တင်း ထွက်ရှိခဲ့ပါသည်။ အထွက်တင်းစုစုပေါင်း(၉၇၄၃၁၃)တင်းထွက်ရှိခဲ့ပါသည်။ ဆောင်းမြေပဲစိုက်ပျိုးရန် လျာထားမှုမှာ(၃၁၉)ဧက ရှိပါသည်။ နှစ်စဉ်ဩဂုတ်လတွင် ကျောက်ပန်းတောင်းမြို့နယ်နှင့် ထိစပ်လျက်ရှိသောကျေးရွာများမှ မြို့ပေါ်ရှိပွဲရုံများနှင့် ဆီစက်များသို့လာရောက်ရောင်းချကြပါသည်။ ၂၀၂၃-၂၀၂၄ ခုနှစ်တွင် မြေပဲဆီဆံတစ်တင်းလျှင် (၁၀၄၀၀၀)ကျပ်၊ မြေပဲလုံးဆံတစ်တင်းလျှင် (၁၀၈၀၀၀)ကျပ်၊ မျိုးမြေပဲတစ်တင်းလျှင် (၁၁၂၀၀၀)ကျပ်ဝန်းကျင်များဖြင့် ဈေးနှုန်းများရှိခဲ့ပြီး၊ ၂၀၂၄-၂၀၂၅ ခုနှစ်တွင် မြေပဲဆီဆံတစ်တင်းလျှင်(၁၁၂၅၀၀)ကျပ်၊ မြေပဲလုံးဆံတစ်တင်းလျှင် (၁၂၇၅၀၀)ကျပ်၊ မျိုးမြေပဲတစ်တင်း လျှင်(၁၄၀၀၀၀)ကျပ် ဝန်းကျင်များဖြင့် အရောင်းအဝယ်ဖြစ်ပေါ်လျှက်ရှိပါသည်။
၂၀၂၄-၂၀၂၅ ခုနှစ်တွင် ကျောက်ပန်းတောင်းမြို့နယ်၏ မြေပဲတစ်ဧကစိုက်ပျိုးမှု ကုန်ကျစရိတ်အနေဖြင့် (၄၅၇၀၀၀)ကျပ်ဝန်းကျင်ကျသင့်ပြီး၊ တစ်ဧကပျမ်းမျှအထွက်တင်းမှာ (၃၉.၇၅)တင်းနှုန်းထွက်ရှိခဲ့ပါသည်။ ပေါ်ချိန်တွင် မြေပဲတောင့်တစ်တင်းလျှင်(၃၃၀၀၀)ကျပ် နှုန်းရောင်းချခဲ့ရပြီး၊ တစ်ဧကဝင်ငွေမှာ(၁၃၁၁၇၅၀)ကျပ် ရရှိ၍ တောင်သူအကျိုးအမြတ်မှာ (၈၅၄၇၅၀)ကျပ် ရရှိပါသည်။ ဒေသတွင်းထွက်မြေပဲများကို ယခင်က အခြားဒေသများသို့ ရောင်းချမှုများရှိခဲ့သော်လည်း ယခုအချိန်တွင် ပြည်ပသို့ရောင်းချမှုနည်းပါးလာပြီး၊ ဒေသတွင်း၌ စားဆီကြိတ်ခွဲသုံးစွဲမှုများရှိလာပါသည်။ တောင်သူအကျိုးအမြတ်ရရှိသော ဆီထွက်သီးနှံမြေပဲကိုပိုမိုစိုက်ပျိုးပြီး၊ ပြည်ပသို့ရောင်းချခြင်းမပြုဘဲ ပြည်တွင်း၌သုံးစွဲခြင်း၊ ဆီကြိတ်ခွဲရောင်းချခြင်းများပြုလုပ်ပါက ဒေသတွင်းဆီစားသုံးမှုဖူလုံလာခြင်း၊ တိရစ္ဆာန်အစာများပေါများလာခြင်း၊ ဒေသတွင်းလုပ်သားများ အလုပ်အကိုင်အခွင့်အလမ်းများ ပိုမိုရရှိစေခြင်းအပြင် ဘေးအန္တရာယ်ကင်းသော ဆီများစားသုံးရခြင်းကြောင့် ကျန်းမာရေးညီညွတ်ကောင်းမွန်လာခြင်း စသည့်အကျိုးကျေးဇူးများရရှိလာစေသည့်အတွက် ဆီထွက်သီးနှံဖြစ်သည့် မြေပဲကို ပိုမိုတိုးချဲ့စိုက်ပျိုးသင့်ကြောင်းသိရှိရပါသည်။
DOCA(မန္တလေး)