ရှမ်းပြည်နယ်(တောင်ပိုင်း)တွင် ကြက်သွန်ဖြူကို တောင်ကြီး၊ ပင်လောင်း၊ မိုင်းပန်၊ ဟိုပုံး၊ လဲချား မြို့နယ်များမှာ အဓိကစိုက်ပျိုးကြပြီး ကျန်မြို့နယ်များမှာလည်း အနည်းငယ်စီ စိုက်ပျိုးကြသည်။ ကြက်သွန်ဖြူကို အောက်တိုဘာလနှင့် နိုဝင်ဘာလတွင် စိုက်ပျိုးပြီး သက်တမ်း(၄)လအကြာ ဖေဖော်ဝါရီလမှ မတ်လများတွင် ရိတ်သိမ်းထွက်ရှိကာ တစ်နှစ်လျှင်တစ်ကြိမ်သာ စိုက်ပျိုးသော သီးနှံဖြစ်ပါတယ်။ စိုက်ပျိုးချိန်ကိုတည်ပြီး သင်္ကြန်ပတ်ဝန်းကျင် ဧပြီလဟာ ကြက်သွန်ဖြူ လှိုင်လှိုင်ထွက်ရှိသည့်ကာလ ဖြစ်ပါတယ်။
ကြက်သွန်ဖြူ ရောင်းဝယ်မှုအနေဖြင့် ကြက်သွန်ဖြူအား လတ်ခြား ထူး-၁၊ ထူး-၂၊ ထူး-၃၊ ထူး-၄၊ ထူး-၅ လိုအဆင့်ခွဲပြီး ဈေးကွက်မှာ ရောင်းဝယ်လျက်ရှိပါတယ်။ လတ်ခြား ထူး-၁၊ ထူး-၂ ကိုဆိုရင် ဒေသတွင်းမှာအရောင်းအဝယ်လုပ်ကြပါတယ်။ ယခင်နှစ်က ကြက်သွန်ဖြူအစို အသစ်ရိတ်သိမ်းပြီးစတွင် ဒေသပေါက်ဈေးမှာ (လတ်ခြား) ကျပ် ၅၀၀၊ (ထူး-၁) ကျပ် ၆၀၀၊ (ထူး-၂) ကျပ် ၇၀၀၊ (ထူး-၃) ကျပ် ၁၀၀၀၊ (ထူး-၄) ကျပ် ၁၄၀၀၊ (ထူး-၅) ကျပ် ၂၀၀၀ ရှိကြောင်းသိရှိရပါတယ်။ ရှမ်းကြက်သွန်ဖြူအစို ပွဲရုံးဈေးမှာ (လတ်ခြား) ကျပ် ၇၀၀၊ (ထူး-၁) ကျပ် ၉၀၀၊ (ထူး-၂) ကျပ် ၁၂၀၀၊ (ထူး-၃) ကျပ် ၁၅၀၀၊ (ထူး-၄) ကျပ် ၁၈၀၀၊ (ထူး-၅) ကျပ် ၂၃၀၀ ရှိကြောင်းသိရှိရပါတယ်။
ရှမ်းပြည်နယ်(တောင်ပိုင်း)တွင် နှစ်စဉ်ကြက်သွန်ဖြူစိုက်ဧက (၃၀၀၀၀) နီးပါး စိုက်ပျိုးကြပြီး ၂၀၂၁-၂၀၂၂ ခုနှစ်တွင် စိုက်ဧက (၂၉၀၆၁) ဧကစိုက်ပျိုးကာ အထွက်နှုန်းမှာ (၉၀၃၂၈)တန်ရှိပါတယ်။ ယခင်နှစ်က ကြက်သွန်ဖြူတစ်ဧကစိုက်ပျိုးလျှင် အထွက်နှုန်းမှာ (၁.၇၁၆) တန်ထွက်ရှိပါတယ်။ ထွက်ရှိသော ရှမ်းကြက်သွန်ဖြူအသစ်ကို မြန်မာပြည်အနှံ့အပြားတွင် တင်ပို့ရောင်းချလျက်ရှိကြောင်း သိရှိရပါတယ်။ ယခင်နှစ် ရှမ်းကြက်သွန်ဖြူများ ပေါ်ဦးပေါ်စတွင် ဈေးကောင်းရရှိနေပြီး ကြက်သွန်ဖြူ စိုက်တောင်သူများ အကျိုးအမြတ်ရရှိကာ အဆင်ပြေနေကြောင်း လေ့လာသိရှိရပါတယ်။
DOCA(ရှမ်း)