ပဲခူးတိုင်းဒေသကြီး၊ သာယာဝတီခရိုင်၊ လက်ပံတန်းမြို့နယ်သည် ကျေးရွာအုပ်စုပေါင်း ၅၃အုပ်စုရှိပြီး အများအားဖြင့် လယ်ယာစိုက်ပျိုးရေးဖြင့် အဓိကအသက်မွေးဝမ်းကျောင်းလုပ်ကိုင်ကြပါသည်။ လက်ပံတန်းမြို့နယ်အတွင်း လယ်ယာစိုက်ပျိုးသောဧက ၁၀၁၈၃၈ဧကရှိပြီး ယခုအောက်တိုဘာလတွင် ကျေးရွာအုပ်စုအများအပြား၌ မိုးစပါးများရိတ်သိမ်းလျက်ရှိနေကြပါသည်။ လက်ပံတန်းမြို့နယ်အတွင်း စိုက်ပျိုးထားသောစပါးမျိုးများမှာ မနောသုခ၊ ဆင်းသုခ၊ ရတနာတိုး၊ ဗျော့ထွန်း၊ ရက်(၉၀)၊ ရက်(၇၀)စပါးမျိုးများကိုစိုက်ပျိုးကြောင်းသိရှိရပါသည်။ တစ်ဧကကုန်ကျစရိတ်အနေဖြင့် (၆)သိန်းခန့်ကုန်ကျပြီး တစ်ဧကအထွက်နှုန်းမှာ (၆၀)တင်းခန့်ထွက်ရှိပါသည်။ ပေါင် (၅၀) ပါ စပါးတင်း (၁၀၀)လျှင် အစိုဓာတ် ၂၃/၂၅%၊ ဈေးနှုန်း (၁၆၀၀၀၀၀)ကျပ်ဈေးဖြင့် တစ်ဧကဝင်ငွေမှာ (၉၆၀၀၀၀)ကျပ်ရရှိနိုင်ပါသည်။ အကျိုးအမြတ်အနေဖြင့် တစ်ဧကလျှင် (၃၆၀၀၀၀)ကျပ်ရရှိကြောင်း သတင်းရရှိပါသည်။
DOCA(ပဲခူး)