ကမ္ဘောဒီးယားနိုင်ငံသည် ၂၀၂၄ခုနှစ်၏ ပထမ(၉)လတာကာလတွင် အမေရိကန်ဒေါ်လာ ၃၉၇သန်းတန်ဖိုးရှိသည့် ရော်ဘာထုတ်ကုန်တန်ချိန် ၂၄၈၅၃၅တန်တင်ပို့ခဲ့ပြီး ၂၀၂၃ခုနှစ်၏ တူညီသည့်ကာလထက် ပမာဏ ၂.၄၂ ရာခိုင်နှုန်းနှင့် ဝင်ငွေ ၂၃.၄၄ ရာခိုင်နှုန်းမြင့်တက်ခဲ့ကြောင်း နိုင်ငံ့ရော်ဘာအထွေထွေညွှန်ကြားရေးမှူးရုံး၏ ၁၈-၁၀-၂၀၂၄ ရက်နေ့ ထုတ်ပြန်ချက်အရသိရပါသည်။ ကမ္ဘောဒီးယားနိုင်ငံသည် စုစုပေါင်းမြေဧရိယာ ၄၀၇၁၇၂ဟတ်တာတွင် ရော်ဘာပင်များစိုက်ပျိုးထားပြီး ထိုစိုက်ခင်းပမာဏ၏ ၇၈.၆ ရာခိုင်နှုန်းသည် ရော်ဘာစေးထုတ်ယူနိုင်ရန် အရွယ်ရောက်ပြီဟုသိရပါသည်။ ကမ္ဘောဒီးယားနိုင်ငံကုန်သည်များအသင်း၏ ဒုတိယဥက္ကဋ္ဌဖြစ်သူ Lim Heng က ၂၀၂၄ခုနှစ်တွင် ရော်ဘာဈေးနှုန်းများသည် တင်ပို့မှုနှင့် ပြည်တွင်းထုတ်လုပ်မှုနှစ်ခုလုံးတွင် မြင့်တက်လာကြောင်း၊ နိုင်ငံရှိ တာယာစက်ရုံ(၃)ခုထံမှ ဝယ်လိုအားမြင့်တက်လာရန် မျှော်လင့်ရကြောင်းနှင့် အနာဂတ်တွင် တာယာစက်ရုံများထပ်မံရရှိရန် ဖြစ်နိုင်ချေရှိသောကြောင့် ရော်ဘာဝယ်လိုအားမြင့်တက်လာနိုင်ကြောင်းပြောကြားခဲ့ပါသည်။ သက်တမ်းရင့်ရော်ဘာပင်၏ နှစ်(၁၀၀)ပြည့်အခမ်းအနားနှင့် ပထမဆုံး အမျိုးသားရော်ဘာစေးထုတ်ယူခြင်းပြိုင်ပွဲနှင့်ပတ်သက်၍ Heng က စိုက်ပျိုးရေးဝန်ကြီးဌာနနှင့် ရော်ဘာရင်းနှီးမြှုပ်နှံမှုကုမ္ပဏီများသည် ထိုပွဲတော်ကို အပြောင်းအလဲမရှိ ပူးပေါင်းကျင်းပသွားမည်ဖြစ်ကြောင်း၊ ပွဲတော်ကို ကမ္ဘောဒီးယားမှပြည်သူများအား နိုင်ငံ၏ နှစ်(၁၀၀)ကျော် ရော်ဘာစိုက်ပျိုးခြင်းသက်တမ်းကိုပြသရန် ကျင်းပခြင်းဖြစ်ကြောင်းပြောကြားခဲ့ပါသည်။ ထိုပွဲတော်ကို ယခုနှစ် နိုဝင်ဘာလတွင် Thong Khmum ပြည်နယ်ရှိ Chup ရော်ဘာစိုက်ခင်း၌ ကျင်းပပြုလုပ်သွားမည်ဟုသိရပါသည်။ ထိုစိုက်ခင်းတွင် ကမ္ဘာပေါ်၌ အရေအတွက်အများဆုံးအနေဖြင့် ဧရိယာ ၁၄ဟတ်တာတွင် သက်တမ်းရင့်ရော်ဘာပင် ၄၄၈ပင်ရှိပြီး ရာဘာမျိုးကွဲများစွာကိုရှာဖွေနိုင်ရန် အရေးပါသောကဏ္ဍတွင်ရှိနေကြောင်းသိရပါသည်။
Source: Khmer Times
DOCA(ရန်ကုန်)