ဘင်္ဂလားဒေ့ရှ်နိုင်ငံသည် အဓိက စားသုံးကုန်ဖြစ်သော ဆန်တင်သွင်းမှုကို တွန်းအားပေးရန် နှင့် ပြည်တွင်းဈေးကွက်တွင် ရောင်းလိုအားကို တိုးမြှင့်ရန်အတွက် ဆန်တင်သွင်းမှုအပေါ် ကောက်ခံလျက်ရှိသော အခွန်နှုန်းထားကို သိသိသာသာလျှော့ချခဲ့သည်။
အမျိုးသားအခွန်ကြီးကြပ်မှုအဖွဲ့ (NBR) ၏ အောက်တိုဘာ ၂၀ ရက်နေ့၌ ထုတ်ပြန်သည့် ဥပဒေစည်းမျဉ်းအရ ကုန်သည်များအနေဖြင့် ဆန်တင်သွင်းရာ၌ ယခင်က သွင်းကုန်အခွန်စုစုပေါင်း ၆၂ ဒသမ ၅ ရာခိုင်နှုန်း ပေးဆောင်ခဲ့ရာမှ ယခု ၂၅ ရာခိုင်နှုန်းသို့ လျှော့ချ၍ တင်သွင်းနိုင်ပြီဖြစ် သည်။ မကြာသေးမီက ဖြစ်ပေါ်ခဲ့သော ရေကြီးရေလျှံမှုများကြောင့် ဘင်္ဂလားဒေ့ရှ်နိုင်ငံ၏ ဒုတိယ အကြီးဆုံး စပါးသီးနှံရာသီဖြစ်သည့် Aman paddy ခေါ် မိုးစပါး စိုက်ပျိုးမှုကို ထိခိုက်ခဲ့ပြီးနောက် ဆန်ရောင်းလိုအား ကျဆင်းမည့်အရေး စိုးရိမ်မှုများ မြင့်တက်လာပြီး အကောက်ခွန်နှုန်းထားများ လျှော့ချခံရခြင်းဖြစ်သည်။
ယင်းသို့ လျှော့ချခြင်းကြောင့် ဆန်တစ်ကီလိုဂရမ်အတွက် တင်သွင်းမှုကုန်ကျစရိတ်မှာ တာကာငွေ ၁၄.၄၀ လျော့နည်းသက်သာမှုရှိမည်ဖြစ်ကြောင်း၊ နိုင်ငံတွင်း စားနပ်ရိက္ခာဖူလုံမှုကို အာမခံချက်ရှိစေပြီး ဆန်စျေးနှုန်းကို သင့်တင့်သော အခြေအနေတွင် ထိန်းသိမ်းထားနိုင်စေရေး ဆန်ထောက်ပံ့မှု မြှင့်တင်ရန်အတွက် အခွန်လျှော့ချခြင်း ဖြစ်ကြောင်း၊ ၎င်းနှုန်းထားအသစ်မှာ ချက်ချင်းလက်ငင်း သက်ရောက်မှုရှိမည်ဖြစ်ကြောင်း၊ သို့သော်လည်း တင်သွင်းသူများအနေဖြင့် အဆိုပါ အကျိုးဖြစ်ထွန်းမှုကို ရယူခံစားနိုင်ရန်အတွက် စားနပ်ရိက္ခာဝန်ကြီးဌာန၏ အတည်ပြုချက် ရယူရန်လိုအပ်ကြောင်း NBR ပြောကြားခဲ့သည်။
Source: The Daily Star, 21 Oct 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)