ဆွီဒင်နိုင်ငံတွင် အရည်အသွေး မပြည့်မီသဖြင့် အာဏာပိုင်များက သိမ်းဆည်းရမိထားသော ဆန်စာရင်းတွင် ဗီယက်နမ်ဆန်အမည်အား ဖော်ပြထားခြင်းမရှိကြောင်း ယင်းနိုင်ငံရှိ ဗီယက်နမ် ကုန်သွယ်မှုရုံး၏ ပြောကြားချက်အရ သိရသည်။
ဗီယက်နမ်နိုင်ငံသည် ဆွီဒင်နိုင်ငံသို့ စံပယ်ဆန်မွှေးနှင့် ဂျပွန်နီကာဆန်တို့ကို အဓိက တင်ပို့နေပြီး ဆွီဒင်နိုင်ငံမှ လက်ရှိထိန်းသိမ်းထားသည့်ဆန်မှာ ဘာစမာတီဆန် အမျိုးအစားဖြစ်၍ အခြား ဈေးကွက်များမှ တင်သွင်းလာခြင်းဖြစ်သည်ဟု အဆိုပါရုံးမှ ရှင်းပြထားကြောင်း၊ ဆွီဒင်စားနပ်ရိက္ခာအေဂျင်စီ၊ ရဲတပ်ဖွဲ့၊ လုပ်ငန်းပတ်ဝန်းကျင်ဆိုင်ရာ အာဏာပိုင်အဖွဲ့၊ အကောက်ခွန် ဝန်ဆောင်မှုဌာနနှင့် စည်ပင်သာယာရေးအဖွဲ့များသည် မူရင်းရှိသင့်သည်ထက် ပိုမိုကောင်းမွန်သည့် အရည်အသွေးအဆင့်အတန်း တံဆိပ်ကပ်နှိပ်ထားသော ဘာစမာတီဆန် တန်ချိန် ၆၀၀ ကျော်ကို ဖမ်းဆီးထိန်းသိမ်းခဲ့ကြောင်း သိရသည်။
ဆွီဒင်နိုင်ငံအပြင် ပိုမိုကျယ်ပြန့်သော ဥရောပမြောက်ပိုင်း နော်ဒစ်ဒေသတစ်ဝန်း၌ ဆန် အပါအဝင် သွင်းကုန်များအတွက် တင်းကြပ်သော စည်းမျဥ်းများနှင့် စံနှုန်းများစွာကို ချမှတ်ထား သဖြင့် စျေးကွက်ဝေစုကို ဆက်လက် ထိန်းသိမ်းထားရန်အတွက် အဆိုပါစည်းမျဉ်းများကို စီးပွားရေးလုပ်ငန်းရှင်များက အထူးဂရုပြုကြရန် ကုန်သွယ်ရေးသံမှူး Nguyen Thi Hoang Thuy က ပြောကြားခဲ့သည်။
ဆွီဒင်နိုင်ငံသို့ ဗီယက်နမ်၏ ဆန်တင်ပို့မှုတန်ဖိုးသည် လွန်ခဲ့သည့်သုံးနှစ်၌ အမေရိကန် ဒေါ်လာ သောင်းဂဏန်းမျှသာရှိရာမှ ယခုအခါ အမေရိကန်ဒေါ်လာ ၃ သန်းမှ ၄ သန်းအထိသို့ မြင့်တက်လာခဲ့ကြောင်း သိရသည်။ ဤကိန်းဂဏန်းသည် သိသာထင်ရှားခြင်း မရှိသော်လည်း လုပ်ငန်းရှင် အသိုက်အဝန်း၏ စုပေါင်းကြိုးပမ်းမှုဖြင့် ဗီယက်နမ်ဆန်နှင့် အခြားကုန်ပစ္စည်းများသည် ဆွီဒင်နှင့် ကမ္ဘာတစ်ဝှမ်းရှိ အခြားဈေးကွက်များစွာတွင် ၎င်းတို့၏ တည်ရှိမှုကို မြှင့်တင်နိုင်မည်ဟု ယုံကြည်ကြောင်း Nguyen Thi Hoang Thuy က ပြောကြားခဲ့သည်။
Source: Vietnam Plus, 29 Oct 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)