ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြမြို့နယ်တာဝန်ခံ ဦးလှထွဋ်ဦးသည် ၂၀၂၂ ခုနှစ်၊ ဧပြီလ ၈ ရက်နေ့၊ နံနက်(၉:၃၀)နာရီအချိန်က မြို့နယ်အစားအသောက်နှင့်ဆေးဝါးကွက်ကဲရေးကော်မတီနှင့် ပူးပေါင်း၍ မြို့နယ်အတွင်း ကျန်းမာရေးဝန်ကြီးဌာနက စားသုံးရန်မသင့် ထုတ်ပြန်ထားသော အသားလုံး၊ အသားချောင်းများအား အဖွဲ့ဖြင့် ကွင်းဆင်းစစ်ဆေးခဲ့ပါသည်။
ထိုသို့စစ်ဆေးရာတွင် အစားအသောက်နှင့်ဆေးဝါးကွပ်ကဲရေးဦးစီးဌာန မှ ၂၀၂၂ ခုနှစ်၊ ဖေဖော်ဝါရီလမှ မတ်လအထိ စားသုံးရန်မသင့်ဟု စစ်ဆေးတွေ့ရှိသည့် အသားလုံး၊ အသားချောင်း (၂၁) မျိုးအား မြောင်းမြမြို့နယ်အတွင်း ရောင်းချခြင်း ရှိ/မရှိ ကွင်းဆင်းစစ်ဆေးခဲ့ရာ စားသုံးရန်မသင့်ဟု ကြေငြာထားသော အသားလုံး၊ အသားချောင်း ရောင်းချသော အရောင်းဆိုင် (၃) ဆိုင်မှ ပစ္စည်းအမျိုးအစား(၃) မျိုး၊ အရေအတွက် (၆)ခု အား အဖွဲ့ဖြင့် သိမ်းဆည်းပြီး မြို့နယ်စည်ပင်သာယာရေးအဖွဲ့ ရုံးဝန်းအတွင်း မြေမြုပ်ဖျက်စီးခဲ့ကြောင်း သိရှိရပါသည်။
အလားတူ မြောင်းမြခရိုင်အတွင်းရှိ အိမ်မဲမြို့နယ်နှင့် ဝါးခယ်မမြို့နယ်များတွင်လည်း ကျန်းမာရေးဝန်ကြီးဌာနက စားသုံးရန်မသင့် ထုတ်ပြန်ထားသောအသားလုံး၊ အသားချောင်း (၂၁)မျိုးအား ပူးပေါင်းအဖွဲ့ဖြင့် ကွင်းဆင်းစစ်ဆေးခဲ့ကြောင်းလည်း သိရှိရပါသည်။
DOCA(ဧရာဝတီ)