မကွေးတိုင်းဒေသကြီး၊ အထက်မင်းလှမြို့နယ်၊ ပန်းတော်ပြင်ကျေးရွာအုပ်စုရှိ ဥယျာဉ်ကျေးရွာ၌ ဆောင်းသီးနှံကုလားပဲကို တောင်သူ(၆၀)ဦးမှ စိုက်ဧက(၃၀၀)ခန့်အား ၂၀၂၄ခုနှစ်၊ အောက်တိုဘာလ (စတုတ္ထပတ်)တွင် စတင်စိုက်ပျိုးလျက်ရှိကြောင်း သိရသည်။
ဥယျာဉ်ကျေးရွာနေ တောင်သူဦးဇော်အောင်မှ ၎င်းအနေဖြင့် ဆောင်းကုလားပဲကို(၁၀)ဧကခန့် စိုက်ပျိုးထားကြောင်း၊ မျိုးအနေဖြင့် ဒေသခံတောင်သူအချင်းချင်းဆီမှ (၁)တင်းလျှင် ကျပ်(၁)သိန်းခန့်ဖြင့်ဝယ်ယူ၍ ထွန်ကြောင်းဆွဲအစေ့ချစနစ်ဖြင့် စိုက်ပျိုးကြောင်း၊ စိုက်ပျိုးပြီး(၃)လခန့်အကြာတွင် ခူးဆွတ်ရကြောင်း၊ ယခင်နှစ်က (၁)ဧကလျှင် မျိုးခ၊ စိုက်ပျိုးခနှင့်အခြားသွင်းအားစုစရိတ်အပါအဝင် ကျပ်(၄) သိန်းခွဲခန့်ကုန်ကျခဲ့ပြီး ယခုနှစ်တွင် သွင်းအားစုစရိတ်မြင့်တက်လာ၍ ကျပ်(၅)သိန်းခန့်ကုန်ကျပါကြောင်း၊ အထွက်နှုန်းအနေဖြင့် ယခင်နှစ်က (၁)ဧကလျှင် (၁၂)တင်းထွက်ရှိပြီး ဈေးနှုန်းအနေဖြင့် (၁) တင်းလျှင် ကျပ်(၈)သောင်းဈေးရရှိခဲ့ပြီး အကျိုးအမြတ်အနေဖြင့် ကျပ်(၅)သိန်းကျော်ရရှိခဲ့ကြောင်း၊ ယခုနှစ် ဆောင်းကုလားပဲပေါ်ချိန်တွင် အထွက်နှုန်းကောင်းမွန်ပြီး ဈေးကောင်းရရှိပါက အကျိုးအမြတ်များ ပိုမိုရရှိမည်ဖြစ်ပါကြောင်း၊ ဈေးကွက်အနေဖြင့် အထက်မင်းလှမြို့ရှိ ပွဲရုံများသို့ရောင်းချကြောင်း သိရှိရပါသည်။
DOCA(မကွေး)